১৩. চূল়রথৰিমানৰত্থু

৯৮১. ‘‘দল়্হধম্মা নিসারস্স, ধনুং ওলুব্ভ তিট্ঠসি;

খত্তিযো নুসি রাজঞ্ঞো, অদু লুদ্দো ৰনেচরো’’তি [ৰনাচরোতি (স্যা. ক.)].

৯৮২. ‘‘অস্সকাধিপতিস্সাহং, ভন্তে পুত্তো ৰনেচরো;

নামং মে ভিক্খু তে ব্রূমি, সুজাতো ইতি মং ৰিদূ [ৰিদুং (সী.)].

৯৮৩. ‘‘মিগে গৰেসমানোহং, ওগাহন্তো ব্রহাৰনং;

মিগং তঞ্চেৰ [মিগং গন্ত্ৰেৰ (স্যা.), মিগৰধঞ্চ (ক.)] নাদ্দক্খিং, তঞ্চ দিস্ৰা ঠিতো অহ’’ন্তি.

৯৮৪. ‘‘স্ৰাগতং তে মহাপুঞ্ঞ, অথো তে অদুরাগতং;

এত্তো উদকমাদায, পাদে পক্খালযস্সু তে.

৯৮৫. ‘‘ইদম্পি পানীযং সীতং, আভতং গিরিগব্ভরা;

রাজপুত্ত ততো পিত্ৰা [পীত্ৰা (সী. স্যা.)], সন্থতস্মিং উপাৰিসা’’তি.

৯৮৬. ‘‘কল্যাণী ৰত তে ৰাচা, সৰনীযা মহামুনি;

নেলা অত্থৰতী [চত্থৰতী (সী.)] ৰগ্গু, মন্ত্ৰা [মন্তা (স্যা. পী. ক.)] অত্থঞ্চ ভাসসি [ভাসসে (সী.)].

৯৮৭. ‘‘কা তে রতি ৰনে ৰিহরতো, ইসিনিসভ ৰদেহি পুট্ঠো;

তৰ ৰচনপথং নিসামযিত্ৰা, অত্থধম্মপদং সমাচরেমসে’’তি.

৯৮৮. ‘‘অহিংসা সব্বপাণীনং, কুমারম্হাক রুচ্চতি;

থেয্যা চ অতিচারা চ, মজ্জপানা চ আরতি.

৯৮৯. ‘‘আরতি সমচরিযা চ, বাহুসচ্চং কতঞ্ঞুতা;

দিট্ঠেৰ ধম্মে পাসংসা, ধম্মা এতে পসংসিযাতি.

৯৯০. ‘‘সন্তিকে মরণং তুয্হং, ওরং মাসেহি পঞ্চহি;

রাজপুত্ত ৰিজানাহি, অত্তানং পরিমোচযা’’তি.

৯৯১. ‘‘কতমং স্ৰাহং জনপদং গন্ত্ৰা, কিং কম্মং কিঞ্চ পোরিসং;

কায ৰা পন ৰিজ্জায, ভৰেয্যং অজরামরো’’তি.

৯৯২. ‘‘ন ৰিজ্জতে সো পদেসো, কম্মং ৰিজ্জা চ পোরিসং;

যত্থ গন্ত্ৰা ভৰে মচ্চো, রাজপুত্তাজরামরো.

৯৯৩. ‘‘মহদ্ধনা মহাভোগা, রট্ঠৰন্তোপি খত্তিযা;

পহূতধনধঞ্ঞাসে, তেপি নো [তেপি ন (বহূসু)] অজরামরা.

৯৯৪. ‘‘যদি তে সুতা অন্ধকৰেণ্ডুপুত্তা [অন্ধকৰেণ্হুপুত্তা (সী.), অণ্ডকৰেণ্ডপুত্তা (স্যা. ক.)], সূরা ৰীরা ৰিক্কন্তপ্পহারিনো;

তেপি আযুক্খযং পত্তা, ৰিদ্ধস্তা সস্সতীসমা.

৯৯৫. ‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

এতে চঞ্ঞে চ জাতিযা, তেপি নো অজরামরা.

৯৯৬. ‘‘যে মন্তং পরিৰত্তেন্তি, ছল়ঙ্গং ব্রহ্মচিন্তিতং;

এতে চঞ্ঞে চ ৰিজ্জায, তেপি নো অজরামরা.

৯৯৭. ‘‘ইসযো চাপি যে সন্তা, সঞ্ঞতত্তা তপস্সিনো;

সরীরং তেপি কালেন, ৰিজহন্তি তপস্সিনো.

৯৯৮. ‘‘ভাৰিতত্তাপি অরহন্তো, কতকিচ্চা অনাসৰা;

নিক্খিপন্তি ইমং দেহং, পুঞ্ঞপাপপরিক্খযা’’তি.

৯৯৯. ‘‘সুভাসিতা অত্থৰতী, গাথাযো তে মহামুনি;

নিজ্ঝত্তোম্হি সুভট্ঠেন, ত্ৰঞ্চ মে সরণং ভৰা’’তি.

১০০০. ‘‘মা মং ত্ৰং সরণং গচ্ছ, তমেৰ সরণং ৰজ [ভজ (ক.)];

সক্যপুত্তং মহাৰীরং, যমহং সরণং গতো’’তি.

১০০১. ‘‘কতরস্মিং সো জনপদে, সত্থা তুম্হাক মারিস;

অহম্পি দট্ঠুং গচ্ছিস্সং, জিনং অপ্পটিপুগ্গল’’ন্তি.

১০০২. ‘‘পুরত্থিমস্মিং জনপদে, ওক্কাককুলসম্ভৰো;

তত্থাসি পুরিসাজঞ্ঞো, সো চ খো পরিনিব্বুতো’’তি.

১০০৩. ‘‘সচে হি বুদ্ধো তিট্ঠেয্য, সত্থা তুম্হাক মারিস;

যোজনানি সহস্সানি, গচ্ছেয্যং [গচ্ছে (স্যা. পী. ক.)] পযিরুপাসিতুং.

১০০৪. ‘‘যতো চ খো [যতা খো (পী. ক.)] পরিনিব্বুতো, সত্থা তুম্হাক মারিস;

নিব্বুতম্পি [পরিনিব্বুতং (স্যা. ক.)] মহাৰীরং, গচ্ছামি সরণং অহং.

১০০৫. ‘‘উপেমি সরণং বুদ্ধং, ধম্মঞ্চাপি অনুত্তরং;

সঙ্ঘঞ্চ নরদেৰস্স, গচ্ছামি সরণং অহং.

১০০৬. ‘‘পাণাতিপাতা ৰিরমামি খিপ্পং, লোকে অদিন্নং পরিৰজ্জযামি;

অমজ্জপো নো চ মুসা ভণামি, সকেন দারেন চ হোমি তুট্ঠো’’তি.

১০০৭. ‘‘সহস্সরংসীৰ যথা মহপ্পভো, দিসং যথা ভাতি নভে অনুক্কমং;

তথাপকারো [তথপ্পকারো (সী. স্যা.)] তৰাযং [তৰযং (সী. পী.)] মহারথো, সমন্ততো যোজনসত্তমাযতো.

১০০৮. ‘‘সুৰণ্ণপট্টেহি সমন্তমোত্থটো, উরস্স মুত্তাহি মণীহি চিত্তিতো;

লেখা সুৰণ্ণস্স চ রূপিযস্স চ, সোভেন্তি ৰেল়ুরিযমযা সুনিম্মিতা.

১০০৯. ‘‘সীসঞ্চিদং ৰেল়ুরিযস্স নিম্মিতং, যুগঞ্চিদং লোহিতকায চিত্তিতং;

যুত্তা সুৰণ্ণস্স চ রূপিযস্স চ, সোভন্তি অস্সা চ ইমে মনোজৰা.

১০১০. ‘‘সো তিট্ঠসি হেমরথে অধিট্ঠিতো, দেৰানমিন্দোৰ সহস্সৰাহনো;

পুচ্ছামি তাহং যসৰন্ত কোৰিদং [কোৰিদ (ক.)], কথং তযা লদ্ধো অযং উল়ারো’’তি.

১০১১. ‘‘সুজাতো নামহং ভন্তে, রাজপুত্তো পুরে অহুং;

ত্ৰঞ্চ মং অনুকম্পায, সঞ্ঞমস্মিং নিৰেসযি.

১০১২. ‘‘খীণাযুকঞ্চ মং ঞত্ৰা, সরীরং পাদাসি সত্থুনো;

ইমং সুজাত পূজেহি, তং তে অত্থায হেহিতি.

১০১৩. ‘‘তাহং গন্ধেহি মালেহি, পূজযিত্ৰা সমুয্যুতো;

পহায মানুসং দেহং, উপপন্নোম্হি নন্দনং.

১০১৪. ‘‘নন্দনে চ ৰনে [নন্দনোপৰনে (সী.), নন্দনে পৰনে (স্যা. ক.)] রম্মে, নানাদিজগণাযুতে;

রমামি নচ্চগীতেহি, অচ্ছরাহি পুরক্খতো’’তি.

চূল়রথৰিমানং তেরসমং.