৭. ভদ্দকাপিলানীথেরীঅপদানং

২৪৪. ‘‘পদুমুত্তরো নাম জিনো, সব্বধম্মান পারগূ [সব্বধম্মেসু চক্খুমা (সী. পী.)];

ইতো সতসহস্সম্হি, কপ্পে উপ্পজ্জি নাযকো.

২৪৫. ‘‘তদাহু হংসৰতিযং, ৰিদেহো নাম নামতো [নামকো (স্যা. পী.)];

সেট্ঠী পহূতরতনো, তস্স জাযা অহোসহং.

২৪৬. ‘‘কদাচি সো নরাদিচ্চং, উপেচ্চ সপরিজ্জনো;

ধম্মমস্সোসি বুদ্ধস্স, সব্বদুক্খভযপ্পহং [দুক্খক্খযাৰহং (স্যা.)].

২৪৭. ‘‘সাৰকং ধুতৰাদানং, অগ্গং কিত্তেসি নাযকো;

সুত্ৰা সত্তাহিকং দানং, দত্ৰা বুদ্ধস্স তাদিনো.

২৪৮. ‘‘নিপচ্চ সিরসা পাদে, তং ঠানমভিপত্থযিং;

স হাসযন্তো পরিসং, তদা হি নরপুঙ্গৰো.

২৪৯. ‘‘সেট্ঠিনো অনুকম্পায, ইমা গাথা অভাসথ;

‘লচ্ছসে পত্থিতং ঠানং, নিব্বুতো হোহি পুত্তক.

২৫০. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

২৫১. ‘‘‘তস্স ধম্মেসু দাযাদো, ওরসো ধম্মনিম্মিতো;

কস্সপো নাম গোত্তেন, হেস্সতি সত্থু সাৰকো’.

২৫২. ‘‘তং সুত্ৰা মুদিতো হুত্ৰা, যাৰজীৰং তদা জিনং;

মেত্তচিত্তো পরিচরি, পচ্চযেহি ৰিনাযকং.

২৫৩. ‘‘সাসনং জোতযিত্ৰান, সো মদ্দিত্ৰা কুতিত্থিযে;

ৰেনেয্যং ৰিনযিত্ৰা চ, নিব্বুতো সো সসাৰকো.

২৫৪. ‘‘নিব্বুতে তম্হি লোকগ্গে, পূজনত্থায সত্থুনো;

ঞাতিমিত্তে সমানেত্ৰা, সহ তেহি অকারযি.

২৫৫. ‘‘সত্তযোজনিকং থূপং, উব্বিদ্ধং রতনামযং;

জলন্তং সতরংসিংৰ, সালরাজংৰ ফুল্লিতং.

২৫৬. ‘‘সত্তসতসহস্সানি, পাতিযো [চাতিযো (স্যা.)] তত্থ কারযি;

নল়গ্গী ৰিয জোতন্তী [জোতন্তে (স্যা. পী.)], রতনেহেৰ সত্তহি.

২৫৭. ‘‘গন্ধতেলেন পূরেত্ৰা, দীপানুজ্জলযী তহিং;

পূজনত্থায [পূজত্থায (সী. ক.)] মহেসিস্স, সব্বভূতানুকম্পিনো.

২৫৮. ‘‘সত্তসতসহস্সানি, পুণ্ণকুম্ভানি কারযি;

রতনেহেৰ পুণ্ণানি, পূজনত্থায মহেসিনো.

২৫৯. ‘‘মজ্ঝে অট্ঠট্ঠকুম্ভীনং, উস্সিতা কঞ্চনগ্ঘিযো;

অতিরোচন্তি ৰণ্ণেন, সরদেৰ দিৰাকরো.

২৬০. ‘‘চতুদ্ৰারেসু সোভন্তি, তোরণা রতনামযা;

উস্সিতা ফলকা রম্মা, সোভন্তি রতনামযা.

২৬১. ‘‘ৰিরোচন্তি পরিক্খিত্তা [পরিক্খাযো (স্যা.)], অৰটংসা সুনিম্মিতা;

উস্সিতানি পটাকানি, রতনানি ৰিরোচরে.

২৬২. ‘‘সুরত্তং সুকতং চিত্তং, চেতিযং রতনামযং;

অতিরোচতি ৰণ্ণেন, সসঞ্ঝোৰ [সসজ্ঝাৰ (স্যা. ক.), সসঞ্জাৰ (পী.)] দিৰাকরো.

২৬৩. ‘‘থূপস্স ৰেদিযো তিস্সো, হরিতালেন পূরযি;

একং মনোসিলাযেকং, অঞ্জনেন চ একিকং.

২৬৪. ‘‘পূজং এতাদিসং রম্মং, কারেত্ৰা ৰরৰাদিনো;

অদাসি দানং সঙ্ঘস্স, যাৰজীৰং যথাবলং.

২৬৫. ‘‘সহাৰ সেট্ঠিনা তেন, তানি পুঞ্ঞানি সব্বসো;

যাৰজীৰং করিত্ৰান, সহাৰ সুগতিং গতা.

২৬৬. ‘‘সম্পত্তিযোনুভোত্ৰান, দেৰত্তে অথ মানুসে;

ছাযা ৰিয সরীরেন, সহ তেনেৰ সংসরিং.

২৬৭. ‘‘একনৰুতিতো কপ্পে, ৰিপস্সী নাম নাযকো;

উপ্পজ্জি চারুদস্সনো, সব্বধম্মৰিপস্সকো.

২৬৮. ‘‘তদাযং বন্ধুমতিযং, ব্রাহ্মণো সাধুসম্মতো;

অড্ঢো সন্তো গুণেনাপি [সত্থাগমেনাসি (সী.)], ধনেন চ সুদুগ্গতো.

২৬৯. ‘‘তদাপি তস্সাহং আসিং, ব্রাহ্মণী সমচেতসা;

কদাচি সো দিজৰরো, সঙ্গমেসি মহামুনিং.

২৭০. ‘‘নিসিন্নং জনকাযম্হি, দেসেন্তং অমতং পদং;

সুত্ৰা ধম্মং পমুদিতো, অদাসি একসাটকং.

২৭১. ‘‘ঘরমেকেন ৰত্থেন, গন্ত্ৰানেতং স মব্রৰি [মমব্রৰি (সী. স্যা. পী.)];

‘অনুমোদ মহাপুঞ্ঞং [মহাপঞ্ঞে (সী.), মহাপুঞ্ঞে (স্যা. ক.)], দিন্নং বুদ্ধস্স সাটকং’.

২৭২. ‘‘তদাহং অঞ্জলিং কত্ৰা, অনুমোদিং সুপীণিতা [সুৰিদিতা (স্যা.), সুপীতিযা (ক.)];

‘সুদিন্নো সাটকো সামি, বুদ্ধসেট্ঠস্স তাদিনো’.

২৭৩. ‘‘সুখিতো সজ্জিতো হুত্ৰা, সংসরন্তো ভৰাভৰে;

বারাণসিপুরে রম্মে, রাজা আসি মহীপতি.

২৭৪. ‘‘তদা তস্স মহেসীহং, ইত্থিগুম্বস্স উত্তমা;

তস্সাতি দযিতা [তস্সাৰি দুতিযিকা (স্যা.)] আসিং, পুব্বস্নেহেন ভত্তুনো [চুত্তরি (স্যা. পী. ক.)].

২৭৫. ‘‘পিণ্ডায ৰিচরন্তে তে [সো (সী. স্যা. পী.)], অট্ঠ পচ্চেকনাযকে;

দিস্ৰা পমুদিতো হুত্ৰা, দত্ৰা পিণ্ডং মহারহং.

২৭৬. ‘‘পুনো নিমন্তযিত্ৰান, কত্ৰা রতনমণ্ডপং;

কম্মারেহি কতং পত্তং [কতং ছত্তং (সী.), কতমট্ঠং (স্যা.)], সোৰণ্ণং ৰত তত্তকং.

২৭৭. ‘‘সমানেত্ৰান তে সব্বে, তেসং দানমদাসি সো;

সোণ্ণাসনে পৰিট্ঠানং, পসন্নো সেহি পাণিভি.

২৭৮. ‘‘তম্পি দানং সহাদাসিং, কাসিরাজেনহং তদা;

পুনাহং বারাণসিযং, জাতা কাসিকগামকে.

২৭৯. ‘‘কুটুম্বিককুলে ফীতে, সুখিতো সো সভাতুকো;

জেট্ঠস্স ভাতুনো জাযা, অহোসিং সুপতিব্বতা.

২৮০. ‘‘পচ্চেকবুদ্ধং দিস্ৰান, কনিযস্স মম ভত্তুনো [ভত্তুকনিযসো (স্যা.)];

ভাগন্নং তস্স দত্ৰান, আগতে তম্হি পাৰদিং.

২৮১. ‘‘নাভিনন্দিত্থ সো দানং, ততো তস্স অদাসহং;

উখা [বুদ্ধা (স্যা.)] আনিয তং অন্নং, পুনো তস্সেৰ সো অদা.

২৮২. ‘‘তদন্নং ছড্ডযিত্ৰান, দুট্ঠা বুদ্ধস্সহং তদা;

পত্তং কললপুণ্ণং তং, অদাসিং তস্স তাদিনো.

২৮৩. ‘‘দানে চ গহণে চেৰ, অপচে পদুসেপি চ;

সমচিত্তমুখং দিস্ৰা, তদাহং সংৰিজিং ভুসং.

২৮৪. ‘‘পুনো পত্তং গহেত্ৰান, সোধযিত্ৰা সুগন্ধিনা;

পসন্নচিত্তা পূরেত্ৰা, সঘতং সক্করং অদং.

২৮৫. ‘‘যত্থ যত্থূপপজ্জামি, সুরূপা হোমি দানতো;

বুদ্ধস্স অপকারেন, দুগ্গন্ধা ৰদনেন চ.

২৮৬. ‘‘পুন কস্সপৰীরস্স, নিধাযন্তম্হি চেতিযে;

সোৰণ্ণং ইট্ঠকং ৰরং, অদাসিং মুদিতা অহং.

২৮৭. ‘‘চতুজ্জাতেন গন্ধেন, নিচযিত্ৰা তমিট্ঠকং;

মুত্তা দুগ্গন্ধদোসম্হা, সব্বঙ্গসুসমাগতা.

২৮৮. ‘‘সত্তপাতিসহস্সানি, রতনেহেৰ সত্তহি;

কারেত্ৰা ঘতপূরানি, ৰট্টীনি [ৰট্টীযো (সী.)] চ সহস্সসো.

২৮৯. ‘‘পক্খিপিত্ৰা পদীপেত্ৰা, ঠপযিং সত্তপন্তিযো;

পূজনত্থং লোকনাথস্স, ৰিপ্পসন্নেন চেতসা.

২৯০. ‘‘তদাপি তম্হি পুঞ্ঞম্হি, ভাগিনীযি ৰিসেসতো;

পুন কাসীসু সঞ্জাতো, সুমিত্তা ইতি ৰিস্সুতো.

২৯১. ‘‘তস্সাহং ভরিযা আসিং, সুখিতা সজ্জিতা পিযা;

তদা পচ্চেকমুনিনো, অদাসিং ঘনৰেঠনং.

২৯২. ‘‘তস্সাপি ভাগিনী আসিং, মোদিত্ৰা দানমুত্তমং;

পুনাপি কাসিরট্ঠম্হি, জাতো কোলিযজাতিযা.

২৯৩. ‘‘তদা কোলিযপুত্তানং, সতেহি সহ পঞ্চহি;

পঞ্চপচ্চেকবুদ্ধানং, সতানি সমুপট্ঠহি.

২৯৪. ‘‘তেমাসং তপ্পযিত্ৰান [ৰাসযিত্ৰান (স্যা. পী.)], অদাসি চ তিচীৰরে [তিচীৰরং (স্যা.)];

জাযা তস্স তদা আসিং, পুঞ্ঞকম্মপথানুগা.

২৯৫. ‘‘ততো চুতো অহু রাজা, নন্দো নাম মহাযসো;

তস্সাপি মহেসী আসিং, সব্বকামসমিদ্ধিনী.

২৯৬. ‘‘তদা রাজা ভৰিত্ৰান, ব্রহ্মদত্তো মহীপতি;

পদুমৰতীপুত্তানং, পচ্চেকমুনিনং তদা.

২৯৭. ‘‘সতানি পঞ্চনূনানি, যাৰজীৰং উপট্ঠহিং;

রাজুয্যানে নিৰাসেত্ৰা, নিব্বুতানি চ পূজযিং.

২৯৮. ‘‘চেতিযানি চ কারেত্ৰা, পব্বজিত্ৰা উভো মযং;

ভাৰেত্ৰা অপ্পমঞ্ঞাযো, ব্রহ্মলোকং অগম্হসে.

২৯৯. ‘‘ততো চুতো মহাতিত্থে, সুজাতো পিপ্ফলাযনো;

মাতা সুমনদেৰীতি, কোসিগোত্তো দিজো পিতা.

৩০০. ‘‘অহং মদ্দে জনপদে, সাকলায পুরুত্তমে;

কপ্পিলস্স দিজস্সাসিং, ধীতা মাতা সুচীমতি.

৩০১. ‘‘ঘনকঞ্চনবিম্বেন, নিম্মিনিত্ৰান মং পিতা;

অদা কস্সপধীরস্স, কামেহি ৰজ্জিতস্সমং.

৩০২. ‘‘কদাচি সো কারুণিকো, গন্ত্ৰা কম্মন্তপেক্খকো;

কাকাদিকেহি খজ্জন্তে, পাণে দিস্ৰান সংৰিজি.

৩০৩. ‘‘ঘরেৰাহং তিলে জাতে, দিস্ৰানাতপতাপনে;

কিমি কাকেহি খজ্জন্তে, সংৰেগমলভিং তদা.

৩০৪. ‘‘তদা সো পব্বজী ধীরো, অহং তমনুপব্বজিং;

পঞ্চৰস্সানি নিৰসিং, পরিব্বাজৰতে [পরিব্বাজপথে (স্যা. পী.)] অহং.

৩০৫. ‘‘যদা পব্বজিতা আসি, গোতমী জিনপোসিকা;

তদাহং তমুপগন্ত্ৰা, বুদ্ধেন অনুসাসিতা.

৩০৬. ‘‘ন চিরেনেৰ কালেন, অরহত্তমপাপুণিং;

অহো কল্যাণমিত্তত্তং, কস্সপস্স সিরীমতো.

৩০৭. ‘‘সুতো বুদ্ধস্স দাযাদো, কস্সপো সুসমাহিতো;

পুব্বেনিৰাসং যো ৰেদি, সগ্গাপাযঞ্চ পস্সতি.

৩০৮. ‘‘অথো জাতিক্খযং পত্তো, অভিঞ্ঞাৰোসিতো মুনি;

এতাহি তীহি ৰিজ্জাহি, তেৰিজ্জো হোতি ব্রাহ্মণো.

৩০৯. ‘‘তথেৰ ভদ্দকাপিলানী [ভদ্দাকাপিলানী (সী. পী.)], তেৰিজ্জা মচ্চুহাযিনী;

ধারেতি অন্তিমং দেহং, জিত্ৰা মারং সৰাহনং.

৩১০. ‘‘দিস্ৰা আদীনৰং লোকে, উভো পব্বজিতা মযং;

ত্যম্হ খীণাসৰা দন্তা, সীতিভূতাম্হ নিব্বুতা.

৩১১. ‘‘কিলেসা ঝাপিতা ময্হং…পে… ৰিহরামি অনাসৰা.

৩১২. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং ভদ্দকাপিলানী ভিক্খুনী ইমা গাথাযো অভাসিত্থাতি.

ভদ্দকাপিলানীথেরিযাপদানং সত্তমং.