৪. সকুলাথেরীঅপদানং

১৩১. ‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

১৩২. ‘‘হিতায সব্বসত্তানং, সুখায ৰদতং ৰরো;

অত্থায পুরিসাজঞ্ঞো, পটিপন্নো সদেৰকে.

১৩৩. ‘‘যসগ্গপত্তো সিরিমা, কিত্তিৰণ্ণগতো জিনো;

পূজিতো সব্বলোকস্স, দিসাসব্বাসু ৰিস্সুতো.

১৩৪. ‘‘উত্তিণ্ণৰিচিকিচ্ছো সো, ৰীতিৰত্তকথংকথো;

সম্পুণ্ণমনসঙ্কপ্পো, পত্তো সম্বোধিমুত্তমং.

১৩৫. ‘‘অনুপ্পন্নস্স মগ্গস্স, উপ্পাদেতা নরুত্তমো;

অনক্খাতঞ্চ অক্খাসি, অসঞ্জাতঞ্চ সঞ্জনী.

১৩৬. ‘‘মগ্গঞ্ঞূ চ মগ্গৰিদূ, মগ্গক্খাযী নরাসভো;

মগ্গস্স কুসলো সত্থা, সারথীনং ৰরুত্তমো.

১৩৭. ‘‘মহাকারুণিকো সত্থা, ধম্মং দেসেসি নাযকো;

নিমুগ্গে কামপঙ্কম্হি, সমুদ্ধরতি পাণিনে.

১৩৮. ‘‘তদাহং হংসৰতিযং, জাতা খত্তিযনন্দনা;

সুরূপা সধনা চাপি, দযিতা চ সিরীমতী.

১৩৯. ‘‘আনন্দস্স মহারঞ্ঞো, ধীতা পরমসোভণা;

ৰেমাতা [ৰেমাতু (সী.)] ভগিনী চাপি, পদুমুত্তরনামিনো.

১৪০. ‘‘রাজকঞ্ঞাহি সহিতা, সব্বাভরণভূসিতা;

উপাগম্ম মহাৰীরং, অস্সোসিং ধম্মদেসনং.

১৪১. ‘‘তদা হি সো লোকগরু, ভিক্খুনিং দিব্বচক্খুকং;

কিত্তযং পরিসামজ্ঝে [চতুপরিসায মজ্ঝে (স্যা.)], অগ্গট্ঠানে ঠপেসি তং.

১৪২. ‘‘সুণিত্ৰা তমহং হট্ঠা, দানং দত্ৰান সত্থুনো;

পূজিত্ৰান চ সম্বুদ্ধং, দিব্বচক্খুং অপত্থযিং.

১৪৩. ‘‘ততো অৰোচ মং সত্থা, ‘নন্দে লচ্ছসি পত্থিতং;

পদীপধম্মদানানং, ফলমেতং সুনিচ্ছিতং.

১৪৪. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৪৫. ‘‘‘তস্স ধম্মেসু দাযাদা, ওরসা ধম্মনিম্মিতা;

সকুলা নাম নামেন [সকুলাতি চ নামেন (স্যা.)], হেস্সতি সত্থু সাৰিকা’.

১৪৬. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৪৭. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

১৪৮. ‘‘পরিব্বাজকিনী আসিং, তদাহং একচারিনী;

ভিক্খায ৰিচরিত্ৰান, অলভিং তেলমত্তকং.

১৪৯. ‘‘তেন দীপং পদীপেত্ৰা, উপট্ঠিং সব্বসংৰরিং;

চেতিযং দ্ৰিপদগ্গস্স [দিপদগ্গস্স (সী. স্যা. পী.)], ৰিপ্পসন্নেন চেতসা.

১৫০. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৫১. ‘‘যত্থ যত্থূপপজ্জামি, তস্স কম্মস্স ৰাহসা;

পজ্জলন্তি [সঞ্জলন্তি (স্যা. ক.), সংচরন্তি (পী.)] মহাদীপা, তত্থ তত্থ গতায মে.

১৫২. ‘‘তিরোকুট্টং তিরোসেলং, সমতিগ্গয্হ পব্বতং;

পস্সামহং যদিচ্ছামি, দীপদানস্সিদং ফলং.

১৫৩. ‘‘ৰিসুদ্ধনযনা হোমি, যসসা চ জলামহং;

সদ্ধাপঞ্ঞাৰতী চেৰ, দীপদানস্সিদং ফলং.

১৫৪. ‘‘পচ্ছিমে চ ভৰে দানি, জাতা ৰিপ্পকুলে অহং;

পহূতধনধঞ্ঞম্হি, মুদিতে রাজপূজিতে.

১৫৫. ‘‘অহং সব্বঙ্গসম্পন্না, সব্বাভরণভূসিতা;

পুরপ্পৰেসে সুগতং, ৰাতপানে ঠিতা অহং.

১৫৬. ‘‘দিস্ৰা জলন্তং যসসা, দেৰমনুস্সসক্কতং;

অনুব্যঞ্জনসম্পন্নং, লক্খণেহি ৰিভূসিতং.

১৫৭. ‘‘উদগ্গচিত্তা সুমনা, পব্বজ্জং সমরোচযিং;

ন চিরেনেৰ কালেন, অরহত্তমপাপুণিং.

১৫৮. ‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

১৫৯. ‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

১৬০. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

১৬১. ‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

১৬২. ‘‘ততো মহাকারুণিকো, এতদগ্গে ঠপেসি মং;

দিব্বচক্খুকানং অগ্গা, সকুলাতি নরুত্তমো.

১৬৩. ‘‘কিলেসা ঝাপিতা ময্হং…পে… ৰিহরামি অনাসৰা.

১৬৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং সকুলা ভিক্খুনী ইমা গাথাযো অভাসিত্থাতি.

সকুলাথেরিযাপদানং চতুত্থং.