৫. নন্দাথেরীঅপদানং

১৬৬. ‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

১৬৭. ‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

১৬৮. ‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

১৬৯. ‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

১৭০. ‘‘রতনানট্ঠপঞ্ঞাসং, উগ্গতোৰ মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

১৭১. ‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

১৭২. ‘‘তদাহং হংসৰতিযং, জাতা সেট্ঠিকুলে অহুং;

নানারতনপজ্জোতে, মহাসুখসমপ্পিতা.

১৭৩. ‘‘উপেত্ৰা তং মহাৰীরং, অস্সোসিং ধম্মদেসনং;

অমতং পরমস্সাদং, পরমত্থনিৰেদকং.

১৭৪. ‘‘তদা নিমন্তযিত্ৰান, সসঙ্ঘং লোকনাযকং;

দত্ৰা তস্স মহাদানং, পসন্না সেহি পাণিভি.

১৭৫. ‘‘ঝাযিনীনং ভিক্খুনীনং, অগ্গট্ঠানমপত্থযিং;

নিপচ্চ সিরসা ধীরং, সসঙ্ঘং লোকনাযকং.

১৭৬. ‘‘তদা অদন্তদমকো, তিলোকসরণো পভূ;

ব্যাকাসি নরসারথি, ‘লচ্ছসে তং সুপত্থিতং.

১৭৭. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৭৮. ‘‘‘তস্স ধম্মেসু দাযাদা, ওরসা ধম্মনিম্মিতা;

নন্দাতি নাম নামেন, হেস্সতি সত্থু সাৰিকা’.

১৭৯. ‘‘তং সুত্ৰা মুদিতা হুত্ৰা, যাৰজীৰং তদা জিনং;

মেত্তচিত্তা পরিচরিং, পচ্চযেহি ৰিনাযকং.

১৮০. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৮১. ‘‘ততো চুতা যামমগং, ততোহং তুসিতং গতা [অগং (সী. পী. ক.)];

ততো চ নিম্মানরতিং, ৰসৰত্তিপুরং ততো [গতা (স্যা.)].

১৮২. ‘‘যত্থ যত্থূপপজ্জামি, তস্স কম্মস্স ৰাহসা;

তত্থ তত্থেৰ রাজূনং, মহেসিত্তমকারযিং.

১৮৩. ‘‘ততো চুতা মনুস্সত্তে, রাজানং চক্কৰত্তিনং;

মণ্ডলীনঞ্চ রাজূনং, মহেসিত্তমকারযিং.

১৮৪. ‘‘সম্পত্তিং অনুভোত্ৰান, দেৰেসু মনুজেসু চ;

সব্বত্থ সুখিতা হুত্ৰা, নেককপ্পেসু সংসরিং.

১৮৫. ‘‘পচ্ছিমে ভৰে সম্পত্তে, সুরম্মে [পুরস্মিং (স্যা.)] কপিলৰ্হযে;

রঞ্ঞো সুদ্ধোদনস্সাহং, ধীতা আসিং অনিন্দিতা.

১৮৬. ‘‘সিরিযা [সিরিংৰ (সী.), রংসিরিৰ (স্যা.)] রূপিনিং দিস্ৰা, নন্দিতং আসি তং কুলং;

তেন নন্দাতি মে নামং, সুন্দরং পৰরং অহু.

১৮৭. ‘‘যুৰতীনঞ্চ সব্বাসং, কল্যাণীতি চ ৰিস্সুতা;

তস্মিম্পি নগরে রম্মে, ঠপেত্ৰা তং যসোধরং.

১৮৮. ‘‘জেট্ঠো ভাতা তিলোকগ্গো, পচ্ছিমো [মজ্ঝিমো (পী.)] অরহা তথা;

একাকিনী গহট্ঠাহং, মাতরা পরিচোদিতা.

১৮৯. ‘‘‘সাকিযম্হি কুলে জাতা, পুত্তে বুদ্ধানুজা তুৰং;

নন্দেনপি ৰিনা ভূতা, অগারে কিং নু অচ্ছসি.

১৯০. ‘‘‘জরাৰসানং যোব্বঞ্ঞং, রূপং অসুচিসম্মতং;

রোগন্তমপিচারোগ্যং, জীৰিতং মরণন্তিকং.

১৯১. ‘‘‘ইদম্পি তে সুভং রূপং, সসীকন্তং মনোহরং;

ভূসনানং অলঙ্কারং, সিরিসঙ্ঘাটসন্নিভং.

১৯২. ‘‘‘পুঞ্জিতং লোকসারংৰ, নযনানং রসাযনং;

পুঞ্ঞানং কিত্তিজননং, উক্কাককুলনন্দনং.

১৯৩. ‘‘‘ন চিরেনেৰ কালেন, জরা সমধিসেস্সতি [সমভিভোস্সতি (সী. স্যা.), সমধিহেস্সতি (পী.)];

ৰিহায গেহং কারুঞ্ঞে [কারুঞ্ঞে (সী. পী.), পারয্হিং (স্যা.)], চর ধম্মমনিন্দিতে’.

১৯৪. ‘‘সুত্ৰাহং মাতু ৰচনং, পব্বজিং অনগারিযং;

দেহেন ন তু চিত্তেন, রূপযোব্বনলাল়িতা.

১৯৫. ‘‘মহতা চ পযত্তেন, ঝানজ্ঝেন পরং মম;

কাতুঞ্চ ৰদতে মাতা, ন চাহং তত্থ উস্সুকা.

১৯৬. ‘‘ততো মহাকারুণিকো, দিস্ৰা মং কামলালসং [কমলাননং (স্যা.)];

নিব্বিন্দনত্থং রূপস্মিং, মম চক্খুপথে জিনো.

১৯৭. ‘‘সকেন আনুভাৰেন, ইত্থিং মাপেসি সোভিনিং;

দস্সনীযং সুরুচিরং, মমতোপি সুরূপিনিং.

১৯৮. ‘‘তমহং ৰিম্হিতা দিস্ৰা, অতিৰিম্হিতদেহিনিং;

চিন্তযিং সফলং মেতি, নেত্তলাভঞ্চ মানুসং.

১৯৯. ‘‘তমহং এহি সুভগে, যেনত্থো তং ৰদেহি মে;

কুলং তে নামগোত্তঞ্চ, ৰদ মে যদি তে পিযং.

২০০. ‘ন ৰঞ্চকালো সুভগে [পঞ্হকালো সুভণে (সী. স্যা. পী.)], উচ্ছঙ্গে মং নিৰাসয;

সীদন্তীৰ মমঙ্গানি, পসুপ্পয মুহুত্তকং’.

২০১. ‘‘ততো সীসং মমঙ্কে সা, কত্ৰা সযি সুলোচনা;

তস্সা নলাটে পতিতা, লুদ্ধা [লূতা (স্যা.)] পরমদারুণা.

২০২. ‘‘সহ তস্সা নিপাতেন, পিল়কা উপপজ্জথ;

পগ্ঘরিংসু পভিন্না চ, কুণপা পুব্বলোহিতা.

২০৩. ‘‘পভিন্নং ৰদনঞ্চাপি, কুণপং পূতিগন্ধনং;

উদ্ধুমাতং ৰিনিলঞ্চ, পুব্বঞ্চাপি সরীরকং.

২০৪. ‘‘সা পৰেদিতসব্বঙ্গী, নিস্সসন্তী মুহুং মুহুং;

ৰেদযন্তী সকং দুক্খং, করুণং পরিদেৰযি.

২০৫. ‘‘‘দুক্খেন দুক্খিতা হোমি, ফুসযন্তি চ ৰেদনা;

মহাদুক্খে নিমুগ্গম্হি, সরণং হোহি মে সখী’.

২০৬. ‘‘‘কুহিং ৰদনসোভং তে, কুহিং তে তুঙ্গনাসিকা;

তম্ববিম্বৰরোট্ঠং তে, ৰদনং তে কুহিং গতং.

২০৭. ‘‘‘কুহিং সসীনিভং ৰণ্ণং, কম্বুগীৰা কুহিং গতা;

দোল়ালোলাৰ [দামামালঞ্চ (স্যা.), দোলোলুল্লাৰ (ক.)] তে কণ্ণা, ৰেৰণ্ণং সমুপাগতা.

২০৮. ‘‘‘মকুল়খারকাকারা [মকুলম্বুরূহাকারা (সী.), মকুল়পদুমাকারা (স্যা.)], কলিকাৰ [কলসাৰ (সী. স্যা. পী.)] পযোধরা;

পভিন্না পূতিকুণপা, দুট্ঠগন্ধিত্তমাগতা.

২০৯. ‘‘‘ৰেদিমজ্ঝাৰ সুস্সোণী [তনুমজ্ঝা পুথুস্সোণী (সী. স্যা.), ৰেদিমজ্ঝা পুথুস্সোণী (পী.)], সূনাৰ নীতকিব্বিসা;

জাতা অমেজ্ঝভরিতা, অহো রূপমসস্সতং.

২১০. ‘‘‘সব্বং সরীরসঞ্জাতং, পূতিগন্ধং ভযানকং;

সুসানমিৰ বীভচ্ছং, রমন্তে যত্থ বালিসা’.

২১১. ‘‘তদা মহাকারুণিকো, ভাতা মে লোকনাযকো;

দিস্ৰা সংৰিগ্গচিত্তং মং, ইমা গাথা অভাসথ.

২১২. ‘‘‘আতুরং কুণপং পূতিং, পস্স নন্দে সমুস্সযং;

অসুভায চিত্তং ভাৰেহি, একগ্গং সুসমাহিতং.

২১৩. ‘‘‘যথা ইদং তথা এতং, যথা এতং তথা ইদং;

দুগ্গন্ধং পূতিকং ৰাতি, বালানং অভিনন্দিতং.

২১৪. ‘‘‘এৰমেতং অৰেক্খন্তী, রত্তিন্দিৰমতন্দিতা;

ততো সকায পঞ্ঞায, অভিনিব্বিজ্ঝ দক্খসি’.

২১৫. ‘‘ততোহং অতিসংৰিগ্গা, সুত্ৰা গাথা সুভাসিতা;

তত্রট্ঠিতাৰহং সন্তী, অরহত্তমপাপুণিং.

২১৬. ‘‘যত্থ যত্থ নিসিন্নাহং, সদা ঝানপরাযনা;

জিনো তস্মিং গুণে তুট্ঠো, এতদগ্গে ঠপেসি মং.

২১৭. ‘‘কিলেসা ঝাপিতা ময্হং…পে… ৰিহরামি অনাসৰা.

২১৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

২১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নন্দা ভিক্খুনী জনপদকল্যাণী ইমা গাথাযো অভাসিত্থাতি.

নন্দাথেরিযাপদানং পঞ্চমং.