৩. ধম্মদিন্নাথেরীঅপদানং

৯৫. ‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

৯৬. ‘‘তদাহং হংসৰতিযং, কুলে অঞ্ঞতরে অহুং;

পরকম্মকারী আসিং, নিপকা সীলসংৰুতা.

৯৭. ‘‘পদুমুত্তরবুদ্ধস্স, সুজাতো অগ্গসাৰকো;

ৰিহারা অভিনিক্খম্ম, পিণ্ডপাতায [পত্তমাদায (ক.)] গচ্ছতি.

৯৮. ‘‘ঘটং গহেত্ৰা গচ্ছন্তী, তদা উদকহারিকা;

তং দিস্ৰা অদদং পূপং, পসন্না সেহি পাণিভি.

৯৯. ‘‘পটিগ্গহেত্ৰা তত্থেৰ, নিসিন্নো পরিভুঞ্জি সো;

ততো নেত্ৰান তং গেহং, অদাসিং তস্স ভোজনং.

১০০. ‘‘ততো মে অয্যকো তুট্ঠো, অকরী সুণিসং সকং;

সস্সুযা সহ গন্ত্ৰান, সম্বুদ্ধং অভিৰাদযিং.

১০১. ‘‘তদা সো ধম্মকথিকং, ভিক্খুনিং পরিকিত্তযং;

ঠপেসি এতদগ্গম্হি, তং সুত্ৰা মুদিতা অহং.

১০২. ‘‘নিমন্তযিত্ৰা সুগতং, সসঙ্ঘং লোকনাযকং;

মহাদানং দদিত্ৰান, তং ঠানমভিপত্থযিং.

১০৩. ‘‘ততো মং সুগতো আহ, ঘননিন্নাদসুস্সরো [ঘননিন্নাদসুস্সরে (ক.)];

‘মমুপট্ঠাননিরতে, সসঙ্ঘপরিৰেসিকে.

১০৪. ‘‘‘সদ্ধম্মস্সৰনে যুত্তে, গুণৰদ্ধিতমানসে;

ভদ্দে ভৰস্সু মুদিতা, লচ্ছসে পণিধীফলং.

১০৫. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১০৬. ‘‘‘তস্স ধম্মেসু দাযাদা, ওরসা ধম্মনিম্মিতা;

ধম্মদিন্নাতি নামেন, হেস্সতি সত্থু সাৰিকা’.

১০৭. ‘‘তং সুত্ৰা মুদিতা হুত্ৰা, যাৰজীৰং মহামুনিং;

মেত্তচিত্তা পরিচরিং, পচ্চযেহি ৰিনাযকং.

১০৮. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১০৯. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

১১০. ‘‘উপট্ঠাকো মহেসিস্স, তদা আসি নরিস্সরো;

কাসিরাজা কিকী নাম, বারাণসিপুরুত্তমে.

১১১. ‘‘ছট্ঠা তস্সাসহং ধীতা, সুধম্মা ইতি ৰিস্সুতা;

ধম্মং সুত্ৰা জিনগ্গস্স, পব্বজ্জং সমরোচযিং.

১১২. ‘‘অনুজানি ন নো তাতো, অগারেৰ তদা মযং;

ৰীসৰস্সসহস্সানি, ৰিচরিম্হ অতন্দিতা.

ততিযং ভাণৰারং.

১১৩. ‘‘কোমারিব্রহ্মচরিযং, রাজকঞ্ঞা সুখেধিতা;

বুদ্ধোপট্ঠাননিরতা, মুদিতা সত্ত ধীতরো.

১১৪. ‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৰ সুধম্মা চ, সত্তমী সঙ্ঘদাযিকা.

১১৫. ‘‘খেমা উপ্পলৰণ্ণা চ, পটাচারা চ কুণ্ডলা;

গোতমী চ অহঞ্চেৰ, ৰিসাখা হোতি সত্তমী.

১১৬. ‘‘তেহি কম্মেহি সুকতেহি, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১১৭. ‘‘পচ্ছিমে চ ভৰে দানি, গিরিব্বজপুরুত্তমে;

জাতা সেট্ঠিকুলে ফীতে, সব্বকামসমিদ্ধিনে.

১১৮. ‘‘যদা রূপগুণূপেতা, পঠমে যোব্বনে ঠিতা;

তদা পরকুলং গন্ত্ৰা, ৰসিং সুখসমপ্পিতা.

১১৯. ‘‘উপেত্ৰা লোকসরণং, সুণিত্ৰা ধম্মদেসনং;

অনাগামিফলং পত্তো, সামিকো মে সুবুদ্ধিমা.

১২০. ‘‘তদাহং অনুজানেত্ৰা, পব্বজিং অনগারিযং;

ন চিরেনেৰ কালেন, অরহত্তমপাপুণিং.

১২১. ‘‘তদা উপাসকো সো মং, উপগন্ত্ৰা অপুচ্ছথ;

গম্ভীরে নিপুণে পঞ্হে, তে সব্বে ব্যাকরিং অহং.

১২২. ‘‘জিনো তস্মিং গুণে তুট্ঠো, এতদগ্গে ঠপেসি মং;

‘ভিক্খুনিং ধম্মকথিকং, নাঞ্ঞং পস্সামি এদিসিং.

১২৩. ‘ধম্মদিন্না যথা ধীরা, এৰং ধারেথ ভিক্খৰো’;

‘‘এৰাহং পণ্ডিতা হোমি [জাতা (সী.), নাম (স্যা.)], নাযকেনানুকম্পিতা.

১২৪. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

১২৫. ‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

১২৬. ‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

১২৭. ‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

১২৮. ‘‘কিলেসা ঝাপিতা ময্হং…পে… ৰিহরামি অনাসৰা.

১২৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং ধম্মদিন্না ভিক্খুনী ইমা গাথাযো অভাসিত্থাতি.

ধম্মদিন্নাথেরিযাপদানং ততিযং.