২. কিসাগোতমীথেরীঅপদানং

৫৫. ‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

৫৬. ‘‘তদাহং হংসৰতিযং, জাতা অঞ্ঞতরে কুলে;

উপেত্ৰা তং নরৰরং, সরণং সমুপাগমিং.

৫৭. ‘‘ধম্মঞ্চ তস্স অস্সোসিং, চতুসচ্চূপসঞ্হিতং;

মধুরং পরমস্সাদং, ৰট্টসন্তিসুখাৰহং [চিত্তসন্তি … (স্যা.)].

৫৮. ‘‘তদা চ ভিক্খুনিং ৰীরো, লূখচীৰরধারিনিং;

ঠপেন্তো এতদগ্গম্হি, ৰণ্ণযী পুরিসুত্তমো.

৫৯. ‘‘জনেত্ৰানপ্পকং পীতিং, সুত্ৰা ভিক্খুনিযা গুণে;

কারং কত্ৰান বুদ্ধস্স, যথাসত্তি যথাবলং.

৬০. ‘‘নিপচ্চ মুনিৰরং তং, তং ঠানমভিপত্থযিং;

তদানুমোদি সম্বুদ্ধো, ঠানলাভায নাযকো.

৬১. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬২. ‘‘‘তস্স ধম্মেসু দাযাদা, ওরসা ধম্মনিম্মিতা;

কিসাগোতমী [গোতমী নাম (সী. ক.)] নামেন, হেস্সতি সত্থু সাৰিকা’.

৬৩. ‘‘তং সুত্ৰা মুদিতা হুত্ৰা, যাৰজীৰং তদা জিনং;

মেত্তচিত্তা পরিচরিং, পচ্চযেহি ৰিনাযকং.

৬৪. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৬৫. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

৬৬. ‘‘উপট্ঠাকো মহেসিস্স, তদা আসি নরিস্সরো;

কাসিরাজা কিকী নাম, বারাণসিপুরুত্তমে.

৬৭. ‘‘পঞ্চমী তস্স ধীতাসিং, ধম্মা নামেন ৰিস্সুতা;

ধম্মং সুত্ৰা জিনগ্গস্স, পব্বজ্জং সমরোচযিং.

৬৮. ‘‘অনুজানি ন নো তাতো, অগারেৰ তদা মযং;

ৰীসৰস্সসহস্সানি, ৰিচরিম্হ অতন্দিতা.

৬৯. ‘‘কোমারিব্রহ্মচরিযং, রাজকঞ্ঞা সুখেধিতা;

বুদ্ধোপট্ঠাননিরতা, মুদিতা সত্ত ধীতরো.

৭০. ‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৰ সুধম্মা চ, সত্তমী সঙ্ঘদাযিকা.

৭১. ‘‘খেমা উপ্পলৰণ্ণা চ, পটাচারা চ কুণ্ডলা;

অহঞ্চ ধম্মদিন্না চ, ৰিসাখা হোতি সত্তমী.

৭২. ‘‘তেহি কম্মেহি সুকতেহি, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৭৩. ‘‘পচ্ছিমে চ ভৰে দানি, জাতা সেট্ঠিকুলে অহং;

দুগ্গতে অধনে নট্ঠে [নীচে (স্যা.), নিদ্ধে (পী.)], গতা চ সধনং কুলং.

৭৪. ‘‘পতিং ঠপেত্ৰা সেসা মে, দেস্সন্তি অধনা ইতি;

যদা চ পসূতা [সসুতা (সী. পী.)] আসিং, সব্বেসং দযিতা তদা.

৭৫. ‘‘যদা সো তরুণো ভদ্দো [পুত্তো (সী. স্যা.)], কোমলকো [কোমারকো (স্যা.), কোমলঙ্গো (সী. পী.)] সুখেধিতো;

সপাণমিৰ কন্তো মে, তদা যমৰসং গতো.

৭৬. ‘‘সোকট্টা দীনৰদনা, অস্সুনেত্তা রুদম্মুখা;

মতং কুণপমাদায, ৰিলপন্তী গমামহং.

৭৭. ‘‘তদা একেন সন্দিট্ঠা, উপেত্ৰাভিসক্কুত্তমং;

অৰোচং দেহি ভেসজ্জং, পুত্তসঞ্জীৰনন্তি ভো.

৭৮. ‘‘ন ৰিজ্জন্তে মতা যস্মিং, গেহে সিদ্ধত্থকং ততো;

আহরাতি জিনো আহ, ৰিনযোপাযকোৰিদো.

৭৯. ‘‘তদা গমিত্ৰা সাৰত্থিং, ন লভিং তাদিসং ঘরং;

কুতো সিদ্ধত্থকং তস্মা, ততো লদ্ধা সতিং অহং.

৮০. ‘‘কুণপং ছড্ডযিত্ৰান, উপেসিং লোকনাযকং;

দূরতোৰ মমং দিস্ৰা, অৰোচ মধুরস্সরো.

৮১. ‘‘‘যো চ ৰস্সসতং জীৰে, অপস্সং উদযব্বযং;

একাহং জীৰিতং সেয্যো, পস্সতো উদযব্বযং.

৮২. ‘‘‘ন গামধম্মো নিগমস্স ধম্মো, ন চাপিযং এককুলস্স ধম্মো;

সব্বস্স লোকস্স সদেৰকস্স, এসেৰ ধম্মো যদিদং অনিচ্চতা’.

৮৩. ‘‘সাহং সুত্ৰানিমা [সহসুত্ৰানিমা (ক.)] গাথা, ধম্মচক্খুং ৰিসোধযিং;

ততো ৰিঞ্ঞাতসদ্ধম্মা, পব্বজিং অনগারিযং.

৮৪. ‘‘তথা পব্বজিতা সন্তী, যুঞ্জন্তী জিনসাসনে;

ন চিরেনেৰ কালেন, অরহত্তমপাপুণিং.

৮৫. ‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

৮৬. ‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

৮৭. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৮৮. ‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৮৯. ‘‘অত্থধম্মনিরুত্তীসু, পটিভানে তথেৰ চ;

ঞাণং মে ৰিমলং সুদ্ধং, বুদ্ধসেট্ঠস্স ৰাহসা.

৯০. ‘‘সঙ্কারকূটা আহিত্ৰা, সুসানা রথিযাপি চ;

ততো সঙ্ঘাটিকং কত্ৰা, লূখং ধারেমি চীৰরং.

৯১. ‘‘জিনো তস্মিং গুণে তুট্ঠো, লূখচীৰরধারণে;

ঠপেসি এতদগ্গম্হি, পরিসাসু ৰিনাযকো.

৯২. ‘‘কিলেসা ঝাপিতা ময্হং…পে… ৰিহরামি অনাসৰা.

৯৩. ‘‘স্ৰাগতং ৰত মে আসি…পে… কতং বুদ্ধস্স সাসনং.

৯৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং কিসাগোতমী ভিক্খুনী ইমা গাথাযো অভাসিত্থাতি.

কিসাগোতমীথেরিযাপদানং দুতিযং.