১৪. সব্বকামিত্থেরগাথা

৪৫৩. ‘‘দ্ৰিপাদকোযং অসুচি, দুগ্গন্ধো পরিহীরতি [পরিহরতি (ক.)];

নানাকুণপপরিপূরো, ৰিস্সৰন্তো ততো ততো.

৪৫৪. ‘‘মিগং নিলীনং কূটেন, বল়িসেনেৰ অম্বুজং;

ৰানরং ৰিয লেপেন, বাধযন্তি পুথুজ্জনং.

৪৫৫. ‘‘রূপা সদ্দা রসা গন্ধা, ফোট্ঠব্বা চ মনোরমা;

পঞ্চ কামগুণা এতে, ইত্থিরূপস্মি দিস্সরে.

৪৫৬. ‘‘যে এতা উপসেৰন্তি, রত্তচিত্তা পুথুজ্জনা;

ৰড্ঢেন্তি কটসিং ঘোরং, আচিনন্তি পুনব্ভৰং.

৪৫৭. ‘‘যো চেতা পরিৰজ্জেতি, সপ্পস্সেৰ পদা সিরো;

সোমং ৰিসত্তিকং লোকে, সতো সমতিৰত্ততি.

৪৫৮. ‘‘কামেস্ৰাদীনৰং দিস্ৰা, নেক্খম্মং দট্ঠু খেমতো;

নিস্সটো সব্বকামেহি, পত্তো মে আসৰক্খযো’’তি.

… সব্বকামিত্থেরো….

ছক্কনিপাতো নিট্ঠিতো.