৬. ছক্কনিপাতো

১. উরুৰেল়কস্সপত্থেরগাথা

৩৭৫. ‘‘দিস্ৰান পাটিহীরানি, গোতমস্স যসস্সিনো;

ন তাৰাহং পণিপতিং, ইস্সামানেন ৰঞ্চিতো.

৩৭৬. ‘‘মম সঙ্কপ্পমঞ্ঞায, চোদেসি নরসারথি;

ততো মে আসি সংৰেগো, অব্ভুতো লোমহংসনো.

৩৭৭. ‘‘পুব্বে জটিলভূতস্স, যা মে সিদ্ধি পরিত্তিকা;

তাহং তদা নিরাকত্ৰা [নিরংকত্ৰা (স্যা. ক.)], পব্বজিং জিনসাসনে.

৩৭৮. ‘‘পুব্বে যঞ্ঞেন সন্তুট্ঠো, কামধাতুপুরক্খতো;

পচ্ছা রাগঞ্চ দোসঞ্চ, মোহঞ্চাপি সমূহনিং.

৩৭৯. ‘‘পুব্বেনিৰাসং জানামি, দিব্বচক্খু ৰিসোধিতং;

ইদ্ধিমা পরচিত্তঞ্ঞূ, দিব্বসোতঞ্চ পাপুণিং.

৩৮০. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি.

… উরুৰেল়কস্সপো থেরো….

২. তেকিচ্ছকারিত্থেরগাথা

৩৮১. ‘‘অতিহিতা ৰীহি, খলগতা সালী;

ন চ লভে পিণ্ডং, কথমহং কস্সং.

৩৮২. ‘‘বুদ্ধমপ্পমেয্যং অনুস্সর পসন্নো;

পীতিযা ফুটসরীরো হোহিসি সততমুদগ্গো.

৩৮৩. ‘‘ধম্মমপ্পমেয্যং অনুস্সর পসন্নো;

পীতিযা ফুটসরীরো হোহিসি সততমুদগ্গো.

৩৮৪. ‘‘সঙ্ঘমপ্পমেয্যং অনুস্সর পসন্নো;

পীতিযা ফুটসরীরো হোহিসি সততমুদগ্গো.

৩৮৫. ‘‘অব্ভোকাসে ৰিহরসি, সীতা হেমন্তিকা ইমা রত্যো;

মা সীতেন পরেতো ৰিহঞ্ঞিত্থো, পৰিস ত্ৰং ৰিহারং ফুসিতগ্গল়ং.

৩৮৬. ‘‘ফুসিস্সং চতস্সো অপ্পমঞ্ঞাযো, তাহি চ সুখিতো ৰিহরিস্সং;

নাহং সীতেন ৰিহঞ্ঞিস্সং, অনিঞ্জিতো ৰিহরন্তো’’তি.

… তেকিচ্ছকারী [তেকিচ্ছকানি (সী. স্যা. পী.)] থেরো….

৩. মহানাগত্থেরগাথা

৩৮৭. ‘‘যস্স সব্রহ্মচারীসু, গারৰো নূপলব্ভতি;

পরিহাযতি সদ্ধম্মা, মচ্ছো অপ্পোদকে যথা.

৩৮৮. ‘‘যস্স সব্রহ্মচারীসু, গারৰো নূপলব্ভতি;

ন ৰিরূহতি সদ্ধম্মে, খেত্তে বীজংৰ পূতিকং.

৩৮৯. ‘‘যস্স সব্রহ্মচারীসু, গারৰো নূপলব্ভতি;

আরকা হোতি নিব্বানা [নিব্বাণা (সী.)], ধম্মরাজস্স সাসনে.

৩৯০. ‘‘যস্স সব্রহ্মচারীসু, গারৰো উপলব্ভতি;

ন ৰিহাযতি সদ্ধম্মা, মচ্ছো বৰ্হোদকে [বহ্ৰোদকে (সী.), বহোদকে (স্যা.)] যথা.

৩৯১. ‘‘যস্স সব্রহ্মচারীসু, গারৰো উপলব্ভতি;

সো ৰিরূহতি সদ্ধম্মে, খেত্তে বীজংৰ ভদ্দকং.

৩৯২. ‘‘যস্স সব্রহ্মচারীসু, গারৰো উপলব্ভতি;

সন্তিকে হোতি নিব্বানং [নিব্বাণং (সী.)], ধম্মরাজস্স সাসনে’’তি.

… মহানাগো থেরো….

৪. কুল্লত্থেরগাথা

৩৯৩. ‘‘কুল্লো সিৰথিকং গন্ত্ৰা, অদ্দস ইত্থিমুজ্ঝিতং;

অপৰিদ্ধং সুসানস্মিং, খজ্জন্তিং কিমিহী ফুটং.

৩৯৪. ‘‘আতুরং অসুচিং পূতিং, পস্স কুল্ল সমুস্সযং;

উগ্ঘরন্তং পগ্ঘরন্তং, বালানং অভিনন্দিতং.

৩৯৫. ‘‘ধম্মাদাসং গহেত্ৰান, ঞাণদস্সনপত্তিযা;

পচ্চৰেক্খিং ইমং কাযং, তুচ্ছং সন্তরবাহিরং.

৩৯৬. ‘‘যথা ইদং তথা এতং, যথা এতং তথা ইদং;

যথা অধো তথা উদ্ধং, যথা উদ্ধং তথা অধো.

৩৯৭. ‘‘যথা দিৰা তথা রত্তিং, যথা রত্তিং তথা দিৰা;

যথা পুরে তথা পচ্ছা, যথা পচ্ছা তথা পুরে.

৩৯৮. ‘‘পঞ্চঙ্গিকেন তুরিযেন, ন রতী হোতি তাদিসী;

যথা একগ্গচিত্তস্স, সম্মা ধম্মং ৰিপস্সতো’’তি.

… কুল্লো থেরো….

৫. মালুক্যপুত্তত্থেরগাথা

৩৯৯. ‘‘মনুজস্স পমত্তচারিনো, তণ্হা ৰড্ঢতি মালুৰা ৰিয;

সো প্লৰতী [প্লৰতি (সী. পী. ক.), পরিপ্লৰতি (স্যা.)] হুরা হুরং, ফলমিচ্ছংৰ ৰনস্মি ৰানরো.

৪০০. ‘‘যং এসা সহতে [সহতি (পী. ক.)] জম্মী, তণ্হা লোকে ৰিসত্তিকা;

সোকা তস্স পৰড্ঢন্তি, অভিৰট্ঠংৰ [অভিৰুট্ঠংৰ (স্যা.), অভিৰড্ঢংৰ (ক.)] বীরণং.

৪০১. ‘‘যো চেতং সহতে [সহতি (পী. ক.)] জম্মিং, তণ্হং লোকে দুরচ্চযং;

সোকা তম্হা পপতন্তি, উদবিন্দূৰ পোক্খরা.

৪০২. ‘‘তং ৰো ৰদামি ভদ্দং ৰো, যাৰন্তেত্থ সমাগতা;

তণ্হায মূলং খণথ, উসীরত্থোৰ বীরণং;

মা ৰো নল়ংৰ সোতোৰ, মারো ভঞ্জি পুনপ্পুনং.

৪০৩. ‘‘করোথ বুদ্ধৰচনং, খণো ৰো মা উপচ্চগা;

খণাতীতা হি সোচন্তি, নিরযম্হি সমপ্পিতা.

৪০৪. ‘‘পমাদো রজো পমাদো [সব্বদা (সী. ক.), সুত্তনিপাতট্ঠকথাযং উট্ঠানসুত্তৰণ্ণনা ওলোকেতব্বা], পমাদানুপতিতো রজো;

অপ্পমাদেন ৰিজ্জায, অব্বহে সল্লমত্তনো’’তি.

… মালুক্যপুত্তো [মালুঙ্ক্যপুত্তো (সী. স্যা. পী.)] থেরো….

৬. সপ্পদাসত্থেরগাথা

৪০৫. ‘‘পণ্ণৰীসতিৰস্সানি, যতো পব্বজিতো অহং;

অচ্ছরাসঙ্ঘাতমত্তম্পি, চেতোসন্তিমনজ্ঝগং.

৪০৬. ‘‘অলদ্ধা চিত্তস্সেকগ্গং, কামরাগেন অট্টিতো [অদ্দিতো (স্যা. সী. অট্ঠ.), অড্ডিতো (ক.)];

বাহা পগ্গয্হ কন্দন্তো, ৰিহারা উপনিক্খমিং [নূপনিক্খমিং (সব্বত্থ), দুপনিক্খমিং (?)].

৪০৭. ‘‘সত্থং ৰা আহরিস্সামি, কো অত্থো জীৰিতেন মে;

কথং হি সিক্খং পচ্চক্খং, কালং কুব্বেথ মাদিসো.

৪০৮. ‘‘তদাহং খুরমাদায, মঞ্চকম্হি উপাৰিসিং;

পরিনীতো খুরো আসি, ধমনিং ছেত্তুমত্তনো.

৪০৯. ‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৪১০. ‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… সপ্পদাসো থেরো….

৭.কাতিযানত্থেরগাথা

৪১১. ‘‘উট্ঠেহি নিসীদ কাতিযান, মা নিদ্দাবহুলো অহু জাগরস্সু;

মা তং অলসং পমত্তবন্ধু, কূটেনেৰ জিনাতু মচ্চুরাজা.

৪১২. ‘‘সেয্যথাপি [সযথাপি (সী. পী.)] মহাসমুদ্দৰেগো, এৰং জাতিজরাতিৰত্ততে তং;

সো করোহি সুদীপমত্তনো ত্ৰং, ন হি তাণং তৰ ৰিজ্জতেৰ অঞ্ঞং.

৪১৩. ‘‘সত্থা হি ৰিজেসি মগ্গমেতং, সঙ্গা জাতিজরাভযা অতীতং;

পুব্বাপররত্তমপ্পমত্তো, অনুযুঞ্জস্সু দল়্হং করোহি যোগং.

৪১৪. ‘‘পুরিমানি পমুঞ্চ বন্ধনানি, সঙ্ঘাটিখুরমুণ্ডভিক্খভোজী;

মা খিড্ডারতিঞ্চ মা নিদ্দং, অনুযুঞ্জিত্থ ঝায কাতিযান.

৪১৫. ‘‘ঝাযাহি জিনাহি কাতিযান, যোগক্খেমপথেসু কোৰিদোসি;

পপ্পুয্য অনুত্তরং ৰিসুদ্ধিং, পরিনিব্বাহিসি ৰারিনাৰ জোতি.

৪১৬. ‘‘পজ্জোতকরো পরিত্তরংসো, ৰাতেন ৰিনম্যতে লতাৰ;

এৰম্পি তুৰং অনাদিযানো, মারং ইন্দসগোত্ত নিদ্ধুনাহি;

সো ৰেদযিতাসু ৰীতরাগো, কালং কঙ্খ ইধেৰ সীতিভূতো’’তি.

… কাতিযানো থেরো….

৮. মিগজালত্থেরগাথা

৪১৭. ‘‘সুদেসিতো চক্খুমতা, বুদ্ধেনাদিচ্চবন্ধুনা;

সব্বসংযোজনাতীতো, সব্বৰট্টৰিনাসনো.

৪১৮. ‘‘নিয্যানিকো উত্তরণো, তণ্হামূলৰিসোসনো;

ৰিসমূলং আঘাতনং, ছেত্ৰা পাপেতি নিব্বুতিং.

৪১৯. ‘‘অঞ্ঞাণমূলভেদায, কম্মযন্তৰিঘাটনো;

ৰিঞ্ঞাণানং পরিগ্গহে, ঞাণৰজিরনিপাতনো.

৪২০. ‘‘ৰেদনানং ৰিঞ্ঞাপনো, উপাদানপ্পমোচনো;

ভৰং অঙ্গারকাসুংৰ, ঞাণেন অনুপস্সনো [অনুপস্সকো (সী. পী.)].

৪২১. ‘‘মহারসো সুগম্ভীরো, জরামচ্চুনিৰারণো;

অরিযো অট্ঠঙ্গিকো মগ্গো, দুক্খূপসমনো সিৰো.

৪২২. ‘‘কম্মং কম্মন্তি ঞত্ৰান, ৰিপাকঞ্চ ৰিপাকতো;

পটিচ্চুপ্পন্নধম্মানং, যথাৰালোকদস্সনো;

মহাখেমঙ্গমো সন্তো, পরিযোসানভদ্দকো’’তি.

… মিগজালো থেরো….

৯. পুরোহিতপুত্তজেন্তত্থেরগাথা

৪২৩. ‘‘জাতিমদেন মত্তোহং, ভোগইস্সরিযেন চ;

সণ্ঠানৰণ্ণরূপেন, মদমত্তো অচারিহং.

৪২৪. ‘‘নাত্তনো সমকং কঞ্চি, অতিরেকং চ মঞ্ঞিসং;

অতিমানহতো বালো, পত্থদ্ধো উস্সিতদ্ধজো.

৪২৫. ‘‘মাতরং পিতরঞ্চাপি, অঞ্ঞেপি গরুসম্মতে;

ন কঞ্চি অভিৰাদেসিং, মানত্থদ্ধো অনাদরো.

৪২৬. ‘‘দিস্ৰা ৰিনাযকং অগ্গং, সারথীনং ৰরুত্তমং;

তপন্তমিৰ আদিচ্চং, ভিক্খুসঙ্ঘপুরক্খতং.

৪২৭. ‘‘মানং মদঞ্চ ছড্ডেত্ৰা, ৰিপ্পসন্নেন চেতসা;

সিরসা অভিৰাদেসিং, সব্বসত্তানমুত্তমং.

৪২৮. ‘‘অতিমানো চ ওমানো, পহীনা সুসমূহতা;

অস্মিমানো সমুচ্ছিন্নো, সব্বে মানৰিধা হতা’’তি.

… জেন্তো পুরোহিতপুত্তো থেরো….

১০. সুমনত্থেরগাথা

৪২৯. ‘‘যদা নৰো পব্বজিতো, জাতিযা সত্তৰস্সিকো;

ইদ্ধিযা অভিভোত্ৰান, পন্নগিন্দং মহিদ্ধিকং.

৪৩০. ‘‘উপজ্ঝাযস্স উদকং, অনোতত্তা মহাসরা;

আহরামি ততো দিস্ৰা, মং সত্থা এতদব্রৰি’’.

৪৩১. ‘‘সারিপুত্ত ইমং পস্স, আগচ্ছন্তং কুমারকং;

উদককুম্ভমাদায, অজ্ঝত্তং সুসমাহিতং.

৪৩২. ‘‘পাসাদিকেন ৰত্তেন, কল্যাণইরিযাপথো;

সামণেরোনুরুদ্ধস্স, ইদ্ধিযা চ ৰিসারদো.

৪৩৩. ‘‘আজানীযেন আজঞ্ঞো, সাধুনা সাধুকারিতো;

ৰিনীতো অনুরুদ্ধেন, কতকিচ্চেন সিক্খিতো.

৪৩৪. ‘‘সো পত্ৰা পরমং সন্তিং, সচ্ছিকত্ৰা অকুপ্পতং;

সামণেরো স সুমনো, মা মং জঞ্ঞাতি ইচ্ছতী’’তি.

… সুমনো থেরো….

১১. ন্হাতকমুনিত্থেরগাথা

৪৩৫. ‘‘ৰাতরোগাভিনীতো ত্ৰং, ৰিহরং কাননে ৰনে;

পৰিদ্ধগোচরে লূখে, কথং ভিক্খু করিস্সসি’’.

৪৩৬. ‘‘পীতিসুখেন ৰিপুলেন, ফরিত্ৰান সমুস্সযং;

লূখম্পি অভিসম্ভোন্তো, ৰিহরিস্সামি কাননে.

৪৩৭. ‘‘ভাৰেন্তো সত্ত বোজ্ঝঙ্গে, ইন্দ্রিযানি বলানি চ;