৭. সত্তকনিপাতো

১. সুন্দরসমুদ্দত্থেরগাথা

৪৫৯. ‘‘অলঙ্কতা সুৰসনা, মালধারী [মালাভারী (সী.), মালভারী (স্যা.)] ৰিভূসিতা;

অলত্তককতাপাদা, পাদুকারুয্হ ৰেসিকা.

৪৬০. ‘‘পাদুকা ওরুহিত্ৰান, পুরতো পঞ্জলীকতা;

সা মং সণ্হেন মুদুনা, ম্হিতপুব্বং [মিহিতপুব্বং (সী.)] অভাসথ’’.

৪৬১. ‘‘যুৰাসি ত্ৰং পব্বজিতো, তিট্ঠাহি মম সাসনে;

ভুঞ্জ মানুসকে কামে, অহং ৰিত্তং দদামি তে;

সচ্চং তে পটিজানামি, অগ্গিং ৰা তে হরামহং.

৪৬২. ‘‘যদা জিণ্ণা ভৰিস্সাম, উভো দণ্ডপরাযনা;

উভোপি পব্বজিস্সাম, উভযত্থ কটগ্গহো’’.

৪৬৩. ‘‘তঞ্চ দিস্ৰান যাচন্তিং, ৰেসিকং পঞ্জলীকতং;

অলঙ্কতং সুৰসনং, মচ্চুপাসংৰ ওড্ডিতং.

৪৬৪. ‘‘ততো মে মনসীকারো…পে… নিব্বিদা সমতিট্ঠথ.

৪৬৫. ‘‘ততো চিত্তং ৰিমুচ্চি মে…পে… কতং বুদ্ধস্স সাসন’’ন্তি.

… সুন্দরসমুদ্দো থেরো….

২. লকুণ্ডকভদ্দিযত্থেরগাথা

৪৬৬. পরে অম্বাটকারামে, ৰনসণ্ডম্হি ভদ্দিযো;

সমূলং তণ্হমব্বুয্হ, তত্থ ভদ্দোৰ ঝাযতি [ভদ্দো’ধিঝাযাযতি (সী.), ভদ্দো ঝিযাযতি (স্যা. সী. অট্ঠ.)].

৪৬৭. ‘‘রমন্তেকে মুদিঙ্গেহি [মুতিঙ্গেহি (সী. অট্ঠ.)], ৰীণাহি পণৰেহি চ;

অহঞ্চ রুক্খমূলস্মিং, রতো বুদ্ধস্স সাসনে.

৪৬৮. ‘‘বুদ্ধো চে [বুদ্ধো চ (সব্বত্থ)] মে ৰরং দজ্জা, সো চ লব্ভেথ মে ৰরো;

গণ্হেহং সব্বলোকস্স, নিচ্চং কাযগতং সতিং.

৪৬৯. ‘‘যে মং রূপেন পামিংসু, যে চ ঘোসেন অন্ৰগূ;

ছন্দরাগৰসূপেতা, ন মং জানন্তি তে জনা.

৪৭০. ‘‘অজ্ঝত্তঞ্চ ন জানাতি, বহিদ্ধা চ ন পস্সতি;

সমন্তাৰরণো বালো, স ৰে ঘোসেন ৰুয্হতি.

৪৭১. ‘‘অজ্ঝত্তঞ্চ ন জানাতি, বহিদ্ধা চ ৰিপস্সতি;

বহিদ্ধা ফলদস্সাৰী, সোপি ঘোসেন ৰুয্হতি.

৪৭২. ‘‘অজ্ঝত্তঞ্চ পজানাতি, বহিদ্ধা চ ৰিপস্সতি;

অনাৰরণদস্সাৰী, ন সো ঘোসেন ৰুয্হতী’’তি.

… লকুণ্ডকভদ্দিযো থেরো….

৩. ভদ্দত্থেরগাথা

৪৭৩. ‘‘একপুত্তো অহং আসিং, পিযো মাতু পিযো পিতু;

বহূহি ৰতচরিযাহি, লদ্ধো আযাচনাহি চ.

৪৭৪. ‘‘তে চ মং অনুকম্পায, অত্থকামা হিতেসিনো;

উভো পিতা চ মাতা চ, বুদ্ধস্স উপনামযুং’’.

৪৭৫. ‘‘কিচ্ছা লদ্ধো অযং পুত্তো, সুখুমালো সুখেধিতো;

ইমং দদাম তে নাথ, জিনস্স পরিচারকং’’.

৪৭৬. ‘‘সত্থা চ মং পটিগ্গয্হ, আনন্দং এতদব্রৰি;

‘পব্বাজেহি ইমং খিপ্পং, হেস্সত্যাজানিযো অযং.

৪৭৭. ‘‘পব্বাজেত্ৰান মং সত্থা, ৰিহারং পাৰিসী জিনো;

অনোগ্গতস্মিং সূরিযস্মিং, ততো চিত্তং ৰিমুচ্চি মে.

৪৭৮. ‘‘ততো সত্থা নিরাকত্ৰা, পটিসল্লানৰুট্ঠিতো;

‘এহি ভদ্দা’তি মং আহ, সা মে আসূপসম্পদা.

৪৭৯. ‘‘জাতিযা সত্তৰস্সেন, লদ্ধা মে উপসম্পদা;

তিস্সো ৰিজ্জা অনুপ্পত্তা, অহো ধম্মসুধম্মতা’’তি.

… ভদ্দো থেরো….

৪. সোপাকত্থেরগাথা

৪৮০. ‘‘দিস্ৰা পাসাদছাযাযং, চঙ্কমন্তং নরুত্তমং;

তত্থ নং উপসঙ্কম্ম, ৰন্দিস্সং [ৰন্দিসং (সী. পী.)] পুরিসুত্তমং.

৪৮১. ‘‘একংসং চীৰরং কত্ৰা, সংহরিত্ৰান পাণযো;

অনুচঙ্কমিস্সং ৰিরজং, সব্বসত্তানমুত্তমং.

৪৮২. ‘‘ততো পঞ্হে অপুচ্ছি মং, পঞ্হানং কোৰিদো ৰিদূ;

অচ্ছম্ভী চ অভীতো চ, ব্যাকাসিং সত্থুনো অহং.

৪৮৩. ‘‘ৰিস্সজ্জিতেসু পঞ্হেসু, অনুমোদি তথাগতো;

ভিক্খুসঙ্ঘং ৰিলোকেত্ৰা, ইমমত্থং অভাসথ’’.

৪৮৪. ‘‘লাভা অঙ্গানং মগধানং, যেসাযং পরিভুঞ্জতি;

চীৰরং পিণ্ডপাতঞ্চ, পচ্চযং সযনাসনং;

পচ্চুট্ঠানঞ্চ সামীচিং, তেসং লাভা’’তি চাব্রৰি.

৪৮৫. ‘‘অজ্জতগ্গে মং সোপাক, দস্সনাযোপসঙ্কম;

এসা চেৰ তে সোপাক, ভৰতু উপসম্পদা’’.

৪৮৬. ‘‘জাতিযা সত্তৰস্সোহং, লদ্ধান উপসম্পদং;

ধারেমি অন্তিমং দেহং, অহো ধম্মসুধম্মতা’’তি.

… সোপাকো থেরো….

৫. সরভঙ্গত্থেরগাথা

৪৮৭. ‘‘সরে হত্থেহি ভঞ্জিত্ৰা, কত্ৰান কুটিমচ্ছিসং;

তেন মে সরভঙ্গোতি, নামং সম্মুতিযা অহু.

৪৮৮. ‘‘ন ময্হং কপ্পতে অজ্জ, সরে হত্থেহি ভঞ্জিতুং;

সিক্খাপদা নো পঞ্ঞত্তা, গোতমেন যসস্সিনা.

৪৮৯. ‘‘সকলং সমত্তং রোগং, সরভঙ্গো নাদ্দসং পুব্বে;

সোযং রোগো দিট্ঠো, ৰচনকরেনাতিদেৰস্স.

৪৯০. ‘‘যেনেৰ মগ্গেন গতো ৰিপস্সী, যেনেৰ মগ্গেন সিখী চ ৰেস্সভূ;

ককুসন্ধকোণাগমনো চ কস্সপো, তেনঞ্জসেন অগমাসি গোতমো.

৪৯১. ‘‘ৰীততণ্হা অনাদানা, সত্ত বুদ্ধা খযোগধা;

যেহাযং দেসিতো ধম্মো, ধম্মভূতেহি তাদিভি.

৪৯২. ‘‘চত্তারি অরিযসচ্চানি, অনুকম্পায পাণিনং;

দুক্খং সমুদযো মগ্গো, নিরোধো দুক্খসঙ্খযো.

৪৯৩. ‘‘যস্মিং নিৰত্ততে [যস্মিং ন নিব্বত্ততে (ক.)] দুক্খং, সংসারস্মিং অনন্তকং;

ভেদা ইমস্স কাযস্স, জীৰিতস্স চ সঙ্খযা;

অঞ্ঞো পুনব্ভৰো নত্থি, সুৰিমুত্তোম্হি সব্বধী’’তি.

… সরভঙ্গো থেরো….

সত্তকনিপাতো নিট্ঠিতো.