৮. অট্ঠকনিপাতো

১. মহাকচ্চাযনত্থেরগাথা

৪৯৪. ‘‘কম্মং বহুকং ন কারযে, পরিৰজ্জেয্য জনং ন উয্যমে;

সো উস্সুক্কো রসানুগিদ্ধো, অত্থং রিঞ্চতি যো সুখাধিৰাহো.

৪৯৫. ‘‘পঙ্কোতি হি নং অৰেদযুং, যাযং ৰন্দনপূজনা কুলেসু;

সুখুমং সল্লং দুরুব্বহং, সক্কারো কাপুরিসেন দুজ্জহো.

৪৯৬. ‘‘ন পরস্সুপনিধায, কম্মং মচ্চস্স পাপকং;

অত্তনা তং ন সেৰেয্য, কম্মবন্ধূহি মাতিযা.

৪৯৭. ‘‘ন পরে ৰচনা চোরো, ন পরে ৰচনা মুনি;

অত্তা চ নং যথাৰেদি [যথা ৰেত্তি (সী.)], দেৰাপি নং তথা ৰিদূ.

৪৯৮. ‘‘পরে চ ন ৰিজানন্তি, মযমেত্থ যমামসে;

যে চ তত্থ ৰিজানন্তি, ততো সম্মন্তি মেধগা.

৪৯৯. ‘‘জীৰতে ৰাপি সপ্পঞ্ঞো, অপি ৰিত্তপরিক্খযো;

পঞ্ঞায চ অলাভেন [অভাৰেন (সী. অট্ঠ.)], ৰিত্তৰাপি ন জীৰতি.

৫০০. ‘‘সব্বং সুণাতি সোতেন, সব্বং পস্সতি চক্খুনা;

ন চ দিট্ঠং সুতং ধীরো, সব্বং উজ্ঝিতুমরহতি.

৫০১. ‘‘চক্খুমাস্স যথা অন্ধো, সোতৰা বধিরো যথা;

পঞ্ঞৰাস্স যথা মূগো, বলৰা দুব্বলোরিৰ;

অথ অত্থে সমুপ্পন্নে, সযেথ [পস্সেথ (ক.)] মতসাযিক’’ন্তি.

… মহাকচ্চাযনো থেরো….

২. সিরিমিত্তত্থেরগাথা

৫০২. ‘‘অক্কোধনোনুপনাহী, অমাযো রিত্তপেসুণো;

স ৰে তাদিসকো ভিক্খু, এৰং পেচ্চ ন সোচতি.

৫০৩. ‘‘অক্কোধনোনুপনাহী, অমাযো রিত্তপেসুণো;

গুত্তদ্ৰারো সদা ভিক্খু, এৰং পেচ্চ ন সোচতি.

৫০৪. ‘‘অক্কোধনোনুপনাহী, অমাযো রিত্তপেসুণো;

কল্যাণসীলো সো [যো (স্যা.)] ভিক্খু, এৰং পেচ্চ ন সোচতি.

৫০৫. ‘‘অক্কোধনোনুপনাহী, অমাযো রিত্তপেসুণো;

কল্যাণমিত্তো সো ভিক্খু, এৰং পেচ্চ ন সোচতি.

৫০৬. ‘‘অক্কোধনোনুপনাহী, অমাযো রিত্তপেসুণো;

কল্যাণপঞ্ঞো সো ভিক্খু, এৰং পেচ্চ ন সোচতি.

৫০৭. ‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

৫০৮. ‘‘সঙ্ঘে পসাদো যস্সত্থি, উজুভূতঞ্চ দস্সনং;

‘অদলিদ্দো’তি তং আহু, অমোঘং তস্স জীৰিতং.

৫০৯. ‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধান সাসন’’ন্তি.

… সিরিমিত্তো থেরো….

৩. মহাপন্থকত্থেরগাথা

৫১০. ‘‘যদা পঠমমদ্দক্খিং, সত্থারমকুতোভযং;

ততো মে অহু সংৰেগো, পস্সিত্ৰা পুরিসুত্তমং.

৫১১. ‘‘সিরিং হত্থেহি পাদেহি, যো পণামেয্য আগতং;

এতাদিসং সো সত্থারং, আরাধেত্ৰা ৰিরাধযে.

৫১২. ‘‘তদাহং পুত্তদারঞ্চ, ধনধঞ্ঞঞ্চ ছড্ডযিং;

কেসমস্সূনি ছেদেত্ৰা, পব্বজিং অনগারিযং.

৫১৩. ‘‘সিক্খাসাজীৰসম্পন্নো, ইন্দ্রিযেসু সুসংৰুতো;

নমস্সমানো সম্বুদ্ধং, ৰিহাসিং অপরাজিতো.

৫১৪. ‘‘ততো মে পণিধী আসি, চেতসো অভিপত্থিতো;

ন নিসীদে মুহুত্তম্পি, তণ্হাসল্লে অনূহতে.

৫১৫. ‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৫১৬. ‘‘পুব্বেনিৰাসং জানামি, দিব্বচক্খু ৰিসোধিতং;

অরহা দক্খিণেয্যোম্হি, ৰিপ্পমুত্তো নিরূপধি.

৫১৭. ‘‘ততো রত্যা ৰিৰসানে [ৰিৰসনে (সী. স্যা.)], সূরিযস্সুগ্গমনং পতি;

সব্বং তণ্হং ৰিসোসেত্ৰা, পল্লঙ্কেন উপাৰিসি’’ন্তি.

… মহাপন্থকো থেরো….

অট্ঠকনিপাতো নিট্ঠিতো.