১০. পারাপরিযত্থেরগাথা

৯২০. সমণস্স অহু চিন্তা, পুপ্ফিতম্হি মহাৰনে;

একগ্গস্স নিসিন্নস্স, পৰিৰিত্তস্স ঝাযিনো.

৯২১. ‘‘অঞ্ঞথা লোকনাথম্হি, তিট্ঠন্তে পুরিসুত্তমে;

ইরিযং আসি ভিক্খূনং, অঞ্ঞথা দানি দিস্সতি.

৯২২. ‘‘সীতৰাতপরিত্তানং, হিরিকোপীনছাদনং;

মত্তট্ঠিযং অভুঞ্জিংসু, সন্তুট্ঠা ইতরীতরে.

৯২৩. ‘‘পণীতং যদি ৰা লূখং, অপ্পং ৰা যদি ৰা বহুং;

যাপনত্থং অভুঞ্জিংসু, অগিদ্ধা নাধিমুচ্ছিতা.

৯২৪. ‘‘জীৰিতানং পরিক্খারে, ভেসজ্জে অথ পচ্চযে;

ন বাল়্হং উস্সুকা আসুং, যথা তে আসৰক্খযে.

৯২৫. ‘‘অরঞ্ঞে রুক্খমূলেসু, কন্দরাসু গুহাসু চ;

ৰিৰেকমনুব্রূহন্তা, ৰিহংসু তপ্পরাযনা.

৯২৬. ‘‘নীচা নিৰিট্ঠা সুভরা, মুদূ অত্থদ্ধমানসা;

অব্যাসেকা অমুখরা, অত্থচিন্তা ৰসানুগা.

৯২৭. ‘‘ততো পাসাদিকং আসি, গতং ভুত্তং নিসেৰিতং;

সিনিদ্ধা তেলধারাৰ, অহোসি ইরিযাপথো.

৯২৮. ‘‘সব্বাসৰপরিক্খীণা, মহাঝাযী মহাহিতা;

নিব্বুতা দানি তে থেরা, পরিত্তা দানি তাদিসা.

৯২৯. ‘‘কুসলানঞ্চ ধম্মানং, পঞ্ঞায চ পরিক্খযা;

সব্বাকারৰরূপেতং, লুজ্জতে জিনসাসনং.

৯৩০. ‘‘পাপকানঞ্চ ধম্মানং, কিলেসানঞ্চ যো উতু;

উপট্ঠিতা ৰিৰেকায, যে চ সদ্ধম্মসেসকা.

৯৩১. ‘‘তে কিলেসা পৰড্ঢন্তা, আৰিসন্তি বহুং জনং;

কীল়ন্তি মঞ্ঞে বালেহি, উম্মত্তেহিৰ রক্খসা.

৯৩২. ‘‘কিলেসেহাভিভূতা তে, তেন তেন ৰিধাৰিতা;

নরা কিলেসৰত্থূসু, সসঙ্গামেৰ ঘোসিতে.

৯৩৩. ‘‘পরিচ্চজিত্ৰা সদ্ধম্মং, অঞ্ঞমঞ্ঞেহি ভণ্ডরে;

দিট্ঠিগতানি অন্ৰেন্তা, ইদং সেয্যোতি মঞ্ঞরে.

৯৩৪. ‘‘ধনঞ্চ পুত্তং ভরিযঞ্চ, ছড্ডযিত্ৰান নিগ্গতা;

কটচ্ছুভিক্খহেতূপি, অকিচ্ছানি নিসেৰরে.

৯৩৫. ‘‘উদরাৰদেহকং ভুত্ৰা, সযন্তুত্তানসেয্যকা;

কথং ৰত্তেন্তি [কথা ৰড্ঢেন্তি (সী. ক.)] পটিবুদ্ধা, যা কথা সত্থুগরহিতা.

৯৩৬. ‘‘সব্বকারুকসিপ্পানি, চিত্তিং কত্ৰান [চিত্তীকত্ৰান (সী.), চিত্তং কত্ৰান (স্যা.)] সিক্খরে;

অৰূপসন্তা অজ্ঝত্তং, সামঞ্ঞত্থোতি অচ্ছতি [তিরিঞ্চতি (?)].

৯৩৭. ‘‘মত্তিকং তেলচুণ্ণঞ্চ, উদকাসনভোজনং;

গিহীনং উপনামেন্তি, আকঙ্খন্তা বহুত্তরং.

৯৩৮. ‘‘দন্তপোনং কপিত্থঞ্চ, পুপ্ফং খাদনিযানি চ;

পিণ্ডপাতে চ সম্পন্নে, অম্বে আমলকানি চ.

৯৩৯. ‘‘ভেসজ্জেসু যথা ৰেজ্জা, কিচ্চাকিচ্চে যথা গিহী;

গণিকাৰ ৰিভূসাযং, ইস্সরে খত্তিযা যথা.

৯৪০. ‘‘নেকতিকা ৰঞ্চনিকা, কূটসক্খী অপাটুকা;

বহূহি পরিকপ্পেহি, আমিসং পরিভুঞ্জরে.

৯৪১. ‘‘লেসকপ্পে পরিযাযে, পরিকপ্পেনুধাৰিতা;

জীৰিকত্থা উপাযেন, সঙ্কড্ঢন্তি বহুং ধনং.

৯৪২. ‘‘উপট্ঠাপেন্তি পরিসং, কম্মতো নো চ ধম্মতো;

ধম্মং পরেসং দেসেন্তি, লাভতো নো চ অত্থতো.

৯৪৩. ‘‘সঙ্ঘলাভস্স ভণ্ডন্তি, সঙ্ঘতো পরিবাহিরা;

পরলাভোপজীৰন্তা, অহিরীকা ন লজ্জরে.

৯৪৪. ‘‘নানুযুত্তা তথা একে, মুণ্ডা সঙ্ঘাটিপারুতা;

সম্ভাৰনংযেৰিচ্ছন্তি, লাভসক্কারমুচ্ছিতা.

৯৪৫. ‘‘এৰং নানপ্পযাতম্হি, ন দানি সুকরং তথা;

অফুসিতং ৰা ফুসিতুং, ফুসিতং ৰানুরক্খিতুং.

৯৪৬. ‘‘যথা কণ্টকট্ঠানম্হি, চরেয্য অনুপাহনো;

সতিং উপট্ঠপেত্ৰান, এৰং গামে মুনী চরে.

৯৪৭. ‘‘সরিত্ৰা পুব্বকে যোগী, তেসং ৰত্তমনুস্সরং;

কিঞ্চাপি পচ্ছিমো কালো, ফুসেয্য অমতং পদং.

৯৪৮. ‘‘ইদং ৰত্ৰা সালৰনে, সমণো ভাৰিতিন্দ্রিযো;

ব্রাহ্মণো পরিনিব্বাযী, ইসি খীণপুনব্ভৰো’’তি.

… পারাপরিযো [পারাসরিযো (স্যা.)] থেরো….

ৰীসতিনিপাতো নিট্ঠিতো.