১৬. ৰীসতিনিপাতো

১. অধিমুত্তত্থেরগাথা

৭০৫. ‘‘যঞ্ঞত্থং ৰা ধনত্থং ৰা, যে হনাম মযং পুরে;

অৰসেসং [অৰসে তং (সী. অট্ঠ. মূলপাঠো), অৰসেসানং (অট্ঠ.?)] ভযং হোতি, ৰেধন্তি ৰিলপন্তি চ.

৭০৬. ‘‘তস্স তে নত্থি ভীতত্তং, ভিয্যো ৰণ্ণো পসীদতি;

কস্মা ন পরিদেৰেসি, এৰরূপে মহব্ভযে.

৭০৭. ‘‘নত্থি চেতসিকং দুক্খং, অনপেক্খস্স গামণি;

অতিক্কন্তা ভযা সব্বে, খীণসংযোজনস্স ৰে.

৭০৮. ‘‘খীণায ভৰনেত্তিযা, দিট্ঠে ধম্মে যথাতথে;

ন ভযং মরণে হোতি, ভারনিক্খেপনে যথা.

৭০৯. ‘‘সুচিণ্ণং ব্রহ্মচরিযং মে, মগ্গো চাপি সুভাৰিতো;

মরণে মে ভযং নত্থি, রোগানমিৰ সঙ্খযে.

৭১০. ‘‘সুচিণ্ণং ব্রহ্মচরিযং মে, মগ্গো চাপি সুভাৰিতো;

নিরস্সাদা ভৰা দিট্ঠা, ৰিসং পিত্ৰাৰ [পীত্ৰাৰ (সী.)] ছড্ডিতং.

৭১১. ‘‘পারগূ অনুপাদানো, কতকিচ্চো অনাসৰো;

তুট্ঠো আযুক্খযা হোতি, মুত্তো আঘাতনা যথা.

৭১২. ‘‘উত্তমং ধম্মতং পত্তো, সব্বলোকে অনত্থিকো;

আদিত্তাৰ ঘরা মুত্তো, মরণস্মিং ন সোচতি.

৭১৩. ‘‘যদত্থি সঙ্গতং কিঞ্চি, ভৰো ৰা যত্থ লব্ভতি;

সব্বং অনিস্সরং এতং, ইতি ৰুত্তং মহেসিনা.

৭১৪. ‘‘যো তং তথা পজানাতি, যথা বুদ্ধেন দেসিতং;

ন গণ্হাতি ভৰং কিঞ্চি, সুতত্তংৰ অযোগুল়ং.

৭১৫. ‘‘ন মে হোতি ‘অহোসি’ন্তি, ‘ভৰিস্স’ন্তি ন হোতি মে;

সঙ্খারা ৰিগমিস্সন্তি, তত্থ কা পরিদেৰনা.

৭১৬. ‘‘সুদ্ধং ধম্মসমুপ্পাদং, সুদ্ধং সঙ্খারসন্ততিং;

পস্সন্তস্স যথাভূতং, ন ভযং হোতি গামণি.

৭১৭. ‘‘তিণকট্ঠসমং লোকং, যদা পঞ্ঞায পস্সতি;

মমত্তং সো অসংৰিন্দং, ‘নত্থি মে’তি ন সোচতি.

৭১৮. ‘‘উক্কণ্ঠামি সরীরেন, ভৰেনম্হি অনত্থিকো;

সোযং ভিজ্জিস্সতি কাযো, অঞ্ঞো চ ন ভৰিস্সতি.

৭১৯. ‘‘যং ৰো কিচ্চং সরীরেন, তং করোথ যদিচ্ছথ;

ন মে তপ্পচ্চযা তত্থ, দোসো পেমঞ্চ হেহিতি’’.

৭২০. তস্স তং ৰচনং সুত্ৰা, অব্ভুতং লোমহংসনং;

সত্থানি নিক্খিপিত্ৰান, মাণৰা এতদব্রৰুং.

৭২১. ‘‘কিং ভদন্তে করিত্ৰান, কো ৰা আচরিযো তৰ;

কস্স সাসনমাগম্ম, লব্ভতে তং অসোকতা’’.

৭২২. ‘‘সব্বঞ্ঞূ সব্বদস্সাৰী, জিনো আচরিযো মম;

মহাকারুণিকো সত্থা, সব্বলোকতিকিচ্ছকো.

৭২৩. ‘‘তেনাযং দেসিতো ধম্মো, খযগামী অনুত্তরো;

তস্স সাসনমাগম্ম, লব্ভতে তং অসোকতা’’.

৭২৪. সুত্ৰান চোরা ইসিনো সুভাসিতং, নিক্খিপ্প সত্থানি চ আৰুধানি চ;

তম্হা চ কম্মা ৰিরমিংসু একে, একে চ পব্বজ্জমরোচযিংসু.

৭২৫. তে পব্বজিত্ৰা সুগতস্স সাসনে, ভাৰেত্ৰ বোজ্ঝঙ্গবলানি পণ্ডিতা;

উদগ্গচিত্তা সুমনা কতিন্দ্রিযা, ফুসিংসু নিব্বানপদং অসঙ্খতন্তি.

…অধিমুত্তো থেরো….

২. পারাপরিযত্থেরগাথা

৭২৬. ‘‘সমণস্স অহু চিন্তা, পারাপরিযস্স ভিক্খুনো;

এককস্স নিসিন্নস্স, পৰিৰিত্তস্স ঝাযিনো.

৭২৭. ‘‘কিমানুপুব্বং পুরিসো, কিং ৰতং কিং সমাচারং;

অত্তনো কিচ্চকারীস্স, ন চ কঞ্চি ৰিহেঠযে.

৭২৮. ‘‘ইন্দ্রিযানি মনুস্সানং, হিতায অহিতায চ;

অরক্খিতানি অহিতায, রক্খিতানি হিতায চ.

৭২৯. ‘‘ইন্দ্রিযানেৰ সারক্খং, ইন্দ্রিযানি চ গোপযং;

অত্তনো কিচ্চকারীস্স, ন চ কঞ্চি ৰিহেঠযে.

৭৩০. ‘‘চক্খুন্দ্রিযং চে রূপেসু, গচ্ছন্তং অনিৰারযং;

অনাদীনৰদস্সাৰী, সো দুক্খা ন হি মুচ্চতি.

৭৩১. ‘‘সোতিন্দ্রিযং চে সদ্দেসু, গচ্ছন্তং অনিৰারযং;

অনাদীনৰদস্সাৰী, সো দুক্খা ন হি মুচ্চতি.

৭৩২. ‘‘অনিস্সরণদস্সাৰী, গন্ধে চে পটিসেৰতি;

ন সো মুচ্চতি দুক্খম্হা, গন্ধেসু অধিমুচ্ছিতো.

৭৩৩. ‘‘অম্বিলং মধুরগ্গঞ্চ, তিত্তকগ্গমনুস্সরং;

রসতণ্হায গধিতো, হদযং নাৰবুজ্ঝতি.

৭৩৪. ‘‘সুভান্যপ্পটিকূলানি, ফোট্ঠব্বানি অনুস্সরং;

রত্তো রাগাধিকরণং, ৰিৰিধং ৰিন্দতে দুখং.

৭৩৫. ‘‘মনং চেতেহি ধম্মেহি, যো ন সক্কোতি রক্খিতুং;

ততো নং দুক্খমন্ৰেতি, সব্বেহেতেহি পঞ্চহি.

৭৩৬. ‘‘পুব্বলোহিতসম্পুণ্ণং, বহুস্স কুণপস্স চ;

নরৰীরকতং ৰগ্গুং, সমুগ্গমিৰ চিত্তিতং.

৭৩৭. ‘‘কটুকং মধুরস্সাদং, পিযনিবন্ধনং দুখং;

খুরংৰ মধুনা লিত্তং, উল্লিহং নাৰবুজ্ঝতি.

৭৩৮. ‘‘ইত্থিরূপে ইত্থিসরে, ফোট্ঠব্বেপি চ ইত্থিযা;

ইত্থিগন্ধেসু সারত্তো, ৰিৰিধং ৰিন্দতে দুখং.

৭৩৯. ‘‘ইত্থিসোতানি সব্বানি, সন্দন্তি পঞ্চ পঞ্চসু;

তেসমাৰরণং কাতুং, যো সক্কোতি ৰীরিযৰা.

৭৪০. ‘‘সো অত্থৰা সো ধম্মট্ঠো, সো দক্খো সো ৰিচক্খণো;

করেয্য রমমানোপি, কিচ্চং ধম্মত্থসংহিতং.

৭৪১. ‘‘অথো সীদতি সঞ্ঞুত্তং, ৰজ্জে কিচ্চং নিরত্থকং;

‘ন তং কিচ্চ’ন্তি মঞ্ঞিত্ৰা, অপ্পমত্তো ৰিচক্খণো.

৭৪২. ‘‘যঞ্চ অত্থেন সঞ্ঞুত্তং, যা চ ধম্মগতা রতি;

তং সমাদায ৰত্তেথ, সা হি ৰে উত্তমা রতি.

৭৪৩. ‘‘উচ্চাৰচেহুপাযেহি, পরেসমভিজিগীসতি;

হন্ত্ৰা ৰধিত্ৰা অথ সোচযিত্ৰা, আলোপতি সাহসা যো পরেসং.

৭৪৪. ‘‘তচ্ছন্তো আণিযা আণিং, নিহন্তি বলৰা যথা;

ইন্দ্রিযানিন্দ্রিযেহেৰ, নিহন্তি কুসলো তথা.

৭৪৫. ‘‘সদ্ধং ৰীরিযং সমাধিঞ্চ, সতিপঞ্ঞঞ্চ ভাৰযং;

পঞ্চ পঞ্চহি হন্ত্ৰান, অনীঘো যাতি ব্রাহ্মণো.

৭৪৬. ‘‘সো অত্থৰা সো ধম্মট্ঠো, কত্ৰা ৰাক্যানুসাসনিং;

সব্বেন সব্বং বুদ্ধস্স, সো নরো সুখমেধতী’’তি.

…পারাপরিযো থেরো….

৩. তেলকানিত্থেরগাথা

৭৪৭. ‘‘চিররত্তং ৰতাতাপী, ধম্মং অনুৰিচিন্তযং;

সমং চিত্তস্স নালত্থং, পুচ্ছং সমণব্রাহ্মণে.

৭৪৮. ‘‘‘কো সো পারঙ্গতো লোকে, কো পত্তো অমতোগধং;

কস্স ধম্মং পটিচ্ছামি, পরমত্থৰিজাননং’.

৭৪৯. ‘‘অন্তোৰঙ্কগতো আসি, মচ্ছোৰ ঘসমামিসং;

বদ্ধো মহিন্দপাসেন, ৰেপচিত্যসুরো যথা.

৭৫০. ‘‘অঞ্ছামি নং ন মুঞ্চামি, অস্মা সোকপরিদ্দৰা;

কো মে বন্ধং মুঞ্চং লোকে, সম্বোধিং ৰেদযিস্সতি.

৭৫১. ‘‘সমণং ব্রাহ্মণং ৰা কং, আদিসন্তং পভঙ্গুনং.

কস্স ধম্মং পটিচ্ছামি, জরামচ্চুপৰাহনং.

৭৫২. ‘‘ৰিচিকিচ্ছাকঙ্খাগন্থিতং, সারম্ভবলসঞ্ঞুতং;

কোধপ্পত্তমনত্থদ্ধং, অভিজপ্পপ্পদারণং.

৭৫৩. ‘‘তণ্হাধনুসমুট্ঠানং, দ্ৰে চ পন্নরসাযুতং [দ্ৰেধাপন্নরসাযুতং (?)];

পস্স ওরসিকং বাল়্হং, ভেত্ৰান যদি [যদ (সী. অট্ঠ.) হদি (?) ‘‘হদযে’’তি তংসংৰণ্ণনা] তিট্ঠতি.

৭৫৪. ‘‘অনুদিট্ঠীনং অপ্পহানং, সঙ্কপ্পপরতেজিতং;

তেন ৰিদ্ধো পৰেধামি, পত্তংৰ মালুতেরিতং.

৭৫৫. ‘‘অজ্ঝত্তং মে সমুট্ঠায, খিপ্পং পচ্চতি মামকং;

ছফস্সাযতনী কাযো, যত্থ সরতি সব্বদা.

৭৫৬. ‘‘তং ন পস্সামি তেকিচ্ছং, যো মেতং সল্লমুদ্ধরে;

নানারজ্জেন সত্থেন [নারগ্গেন ন সত্থেন (?)], নাঞ্ঞেন ৰিচিকিচ্ছিতং.

৭৫৭. ‘‘কো মে অসত্থো অৰণো, সল্লমব্ভন্তরপস্সযং;

অহিংসং সব্বগত্তানি, সল্লং মে উদ্ধরিস্সতি.

৭৫৮. ‘‘ধম্মপ্পতি হি সো সেট্ঠো, ৰিসদোসপ্পৰাহকো;

গম্ভীরে পতিতস্স মে, থলং পাণিঞ্চ দস্সযে.

৭৫৯. ‘‘রহদেহমস্মি ওগাল়্হো, অহারিযরজমত্তিকে;

মাযাউসূযসারম্ভ, থিনমিদ্ধমপত্থটে.

৭৬০. ‘‘উদ্ধচ্চমেঘথনিতং, সংযোজনৰলাহকং;

ৰাহা ৰহন্তি কুদ্দিট্ঠিং [দুদ্দিট্ঠিং (সী. ধ. প. ৩৩৯)], সঙ্কপ্পা রাগনিস্সিতা.

৭৬১. ‘‘সৰন্তি সব্বধি সোতা, লতা উব্ভিজ্জ তিট্ঠতি;

তে সোতে কো নিৰারেয্য, তং লতং কো হি ছেচ্ছতি.

৭৬২. ‘‘ৰেলং করোথ ভদ্দন্তে, সোতানং সন্নিৰারণং;

মা তে মনোমযো সোতো, রুক্খংৰ সহসা লুৰে.

৭৬৩. ‘‘এৰং মে ভযজাতস্স, অপারা পারমেসতো;

তাণো পঞ্ঞাৰুধো সত্থা, ইসিসঙ্ঘনিসেৰিতো.

৭৬৪. ‘‘সোপাণং সুগতং সুদ্ধং, ধম্মসারমযং দল়্হং;

পাদাসি ৰুয্হমানস্স, ‘মা ভাযী’তি চ মব্রৰি.

৭৬৫. ‘‘সতিপট্ঠানপাসাদং, আরুয্হ পচ্চৰেক্খিসং;

যং তং পুব্বে অমঞ্ঞিস্সং, সক্কাযাভিরতং পজং.

৭৬৬. ‘‘যদা চ মগ্গমদ্দক্খিং, নাৰায অভিরূহনং;

অনধিট্ঠায অত্তানং, তিত্থমদ্দক্খিমুত্তমং.

৭৬৭. ‘‘সল্লং অত্তসমুট্ঠানং, ভৰনেত্তিপ্পভাৰিতং;

এতেসং অপ্পৰত্তায [অপ্পৰত্তিযা (?)], দেসেসি মগ্গমুত্তমং.

৭৬৮. ‘‘দীঘরত্তানুসযিতং, চিররত্তমধিট্ঠিতং;

বুদ্ধো মেপানুদী গন্থং, ৰিসদোসপ্পৰাহনো’’তি.

…তেলকানি থেরো….

৪. রট্ঠপালত্থেরগাথা

৭৬৯. [ম. নি. ২.৩০২] ‘‘পস্স চিত্তকতং বিম্বং, অরুকাযং সমুস্সিতং;

আতুরং বহুসঙ্কপ্পং, যস্স নত্থি ধুৰং ঠিতি.

৭৭০. ‘‘পস্স চিত্তকতং রূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৰত্থেহি সোভতি.

৭৭১. ‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পারগৰেসিনো.

৭৭২. ‘‘অট্ঠপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পারগৰেসিনো.

৭৭৩. ‘‘অঞ্জনীৰ নৰা চিত্তা, পূতিকাযো অলঙ্কতো;

অলং বালস্স মোহায, নো চ পারগৰেসিনো.

৭৭৪. ‘‘ওদহি মিগৰো পাসং, নাসদা ৰাগুরং মিগো;

ভুত্ৰা নিৰাপং গচ্ছাম, কন্দন্তে মিগবন্ধকে.

৭৭৫. ‘‘ছিন্নো পাসো মিগৰস্স, নাসদা ৰাগুরং মিগো;

ভুত্ৰা নিৰাপং গচ্ছাম, সোচন্তে মিগলুদ্দকে.