১৭. তিংসনিপাতো

১. ফুস্সত্থেরগাথা

৯৪৯. পাসাদিকে বহূ দিস্ৰা, ভাৰিতত্তে সুসংৰুতে;

ইসি পণ্ডরসগোত্তো [পণ্ডরস্স গোত্তো (সী.)], অপুচ্ছি ফুস্সসৰ্হযং.

৯৫০. ‘‘কিংছন্দা কিমধিপ্পাযা, কিমাকপ্পা ভৰিস্সরে;

অনাগতম্হি কালম্হি, তং মে অক্খাহি পুচ্ছিতো’’.

৯৫১. ‘‘সুণোহি ৰচনং ময্হং, ইসিপণ্ডরসৰ্হয;

সক্কচ্চং উপধারেহি, আচিক্খিস্সাম্যনাগতং.

৯৫২. ‘‘কোধনা উপনাহী চ, মক্খী থম্ভী সঠা বহূ;

উস্সুকী নানাৰাদা চ, ভৰিস্সন্তি অনাগতে.

৯৫৩. ‘‘অঞ্ঞাতমানিনো ধম্মে, গম্ভীরে তীরগোচরা;

লহুকা অগরু ধম্মে, অঞ্ঞমঞ্ঞমগারৰা.

৯৫৪. ‘‘বহূ আদীনৰা লোকে, উপ্পজ্জিস্সন্ত্যনাগতে;

সুদেসিতং ইমং ধম্মং, কিলেসেস্সন্তি [কিলেসিস্সন্তি (সী.), কিলিসিস্সন্তি (স্যা. ক.)] দুম্মতী.

৯৫৫. ‘‘গুণহীনাপি সঙ্ঘম্হি, ৰোহরন্তা ৰিসারদা;

বলৰন্তো ভৰিস্সন্তি, মুখরা অস্সুতাৰিনো.

৯৫৬. ‘‘গুণৰন্তোপি সঙ্ঘম্হি, ৰোহরন্তা যথাত্থতো;

দুব্বলা তে ভৰিস্সন্তি, হিরীমনা অনত্থিকা.

৯৫৭. ‘‘রজতং জাতরূপঞ্চ, খেত্তং ৰত্থুমজেল়কং;

দাসিদাসঞ্চ দুম্মেধা, সাদিযিস্সন্ত্যনাগতে.

৯৫৮. ‘‘উজ্ঝানসঞ্ঞিনো বালা, সীলেসু অসমাহিতা;

উন্নল়া ৰিচরিস্সন্তি, কলহাভিরতা মগা.

৯৫৯. ‘‘উদ্ধতা চ ভৰিস্সন্তি, নীলচীৰরপারুতা;

কুহা থদ্ধা লপা সিঙ্গী, চরিস্সন্ত্যরিযা ৰিয.

৯৬০. ‘‘তেলসণ্ঠেহি কেসেহি, চপলা অঞ্জনক্খিকা;

রথিযায গমিস্সন্তি, দন্তৰণ্ণিকপারুতা.

৯৬১. ‘‘অজেগুচ্ছং ৰিমুত্তেহি, সুরত্তং অরহদ্ধজং;

জিগুচ্ছিস্সন্তি কাসাৰং, ওদাতেসু সমুচ্ছিতা [ওদাতে সুসমুচ্ছিতা (সী.)].

৯৬২. ‘‘লাভকামা ভৰিস্সন্তি, কুসীতা হীনৰীরিযা;

কিচ্ছন্তা ৰনপত্থানি, গামন্তেসু ৰসিস্সরে.

৯৬৩. ‘‘যে যে লাভং লভিস্সন্তি, মিচ্ছাজীৰরতা সদা;

তে তেৰ অনুসিক্খন্তা, ভজিস্সন্তি অসংযতা.

৯৬৪. ‘‘যে যে অলাভিনো লাভং, ন তে পুজ্জা ভৰিস্সরে;

সুপেসলেপি তে ধীরে, সেৰিস্সন্তি ন তে তদা.

৯৬৫. ‘‘মিলক্খুরজনং রত্তং [পিলক্খরজনং রত্তং (?)], গরহন্তা সকং ধজং;

তিত্থিযানং ধজং কেচি, ধারিস্সন্ত্যৰদাতকং.

৯৬৬. ‘‘অগারৰো চ কাসাৰে, তদা তেসং ভৰিস্সতি;

পটিসঙ্খা চ কাসাৰে, ভিক্খূনং ন ভৰিস্সতি.

৯৬৭. ‘‘অভিভূতস্স দুক্খেন, সল্লৰিদ্ধস্স রুপ্পতো;

পটিসঙ্খা মহাঘোরা, নাগস্সাসি অচিন্তিযা.

৯৬৮. ‘‘ছদ্দন্তো হি তদা দিস্ৰা, সুরত্তং অরহদ্ধজং;

তাৰদেৰ ভণী গাথা, গজো অত্থোপসংহিতা’’.

৯৬৯. [ধ. প. ৯; জা. ১.২.১৪১; ১.১৬.১২২] ‘‘অনিক্কসাৰো কাসাৰং, যো ৰত্থং পরিধস্সতি [পরিদহিস্সতি (সী. স্যা.)];

অপেতো দমসচ্চেন, ন সো কাসাৰমরহতি.

৯৭০. ‘‘যো চ ৰন্তকাসাৰস্স, সীলেসু সুসমাহিতো;

উপেতো দমসচ্চেন, স ৰে কাসাৰমরহতি.

৯৭১. ‘‘ৰিপন্নসীলো দুম্মেধো, পাকটো কামকারিযো;

ৰিব্ভন্তচিত্তো নিস্সুক্কো, ন সো কাসাৰমরহতি.

৯৭২. ‘‘যো চ সীলেন সম্পন্নো, ৰীতরাগো সমাহিতো;

ওদাতমনসঙ্কপ্পো, স ৰে কাসাৰমরহতি.

৯৭৩. ‘‘উদ্ধতো উন্নল়ো বালো, সীলং যস্স ন ৰিজ্জতি;

ওদাতকং অরহতি, কাসাৰং কিং করিস্সতি.

৯৭৪. ‘‘ভিক্খূ চ ভিক্খুনিযো চ, দুট্ঠচিত্তা অনাদরা;

তাদীনং মেত্তচিত্তানং, নিগ্গণ্হিস্সন্ত্যনাগতে.

৯৭৫. ‘‘সিক্খাপেন্তাপি থেরেহি, বালা চীৰরধারণং;

ন সুণিস্সন্তি দুম্মেধা, পাকটা কামকারিযা.

৯৭৬. ‘‘তে তথা সিক্খিতা বালা, অঞ্ঞমঞ্ঞং অগারৰা;

নাদিযিস্সন্তুপজ্ঝাযে, খল়ুঙ্কো ৰিয সারথিং.

৯৭৭. ‘‘এৰং অনাগতদ্ধানং, পটিপত্তি ভৰিস্সতি;

ভিক্খূনং ভিক্খুনীনঞ্চ, পত্তে কালম্হি পচ্ছিমে.

৯৭৮. ‘‘পুরা আগচ্ছতে এতং, অনাগতং মহব্ভযং;

সুব্বচা হোথ সখিলা, অঞ্ঞমঞ্ঞং সগারৰা.

৯৭৯. ‘‘মেত্তচিত্তা কারুণিকা, হোথ সীলেসু সংৰুতা;

আরদ্ধৰীরিযা পহিতত্তা, নিচ্চং দল়্হপরক্কমা.

৯৮০. ‘‘পমাদং ভযতো দিস্ৰা, অপ্পমাদঞ্চ খেমতো;

ভাৰেথট্ঠঙ্গিকং মগ্গং, ফুসন্তা অমতং পদ’’ন্তি.

… ফুস্সো থেরো….

২. সারিপুত্তত্থেরগাথা

৯৮১. ‘‘যথাচারী যথাসতো সতীমা, যতসঙ্কপ্পজ্ঝাযি অপ্পমত্তো;

অজ্ঝত্তরতো সমাহিতত্তো, একো সন্তুসিতো তমাহু ভিক্খুং.

৯৮২. ‘‘অল্লং সুক্খং ৰা ভুঞ্জন্তো, ন বাল়্হং সুহিতো সিযা;

ঊনূদরো মিতাহারো, সতো ভিক্খু পরিব্বজে.

৯৮৩. ‘‘চত্তারো পঞ্চ আলোপে, অভুত্ৰা উদকং পিৰে;

অলং ফাসুৰিহারায, পহিতত্তস্স ভিক্খুনো.

৯৮৪. ‘‘কপ্পিযং তং চে ছাদেতি, চীৰরং ইদমত্থিকং [ইদমত্থিতং (সী.)];

অলং ফাসুৰিহারায, পহিতত্তস্স ভিক্খুনো.

৯৮৫. ‘‘পল্লঙ্কেন নিসিন্নস্স, জণ্ণুকে নাভিৰস্সতি;

অলং ফাসুৰিহারায, পহিতত্তস্স ভিক্খুনো.

৯৮৬. [সং. নি. ৪.২৫৩; ইতিৰু. ৫৩] ‘‘যো সুখং দুক্খতো অদ্দ, দুক্খমদ্দক্খি সল্লতো;

উভযন্তরেন [উভযমন্তরে (সী.)] নাহোসি, কেন লোকস্মি কিং সিযা.

৯৮৭. ‘‘মা মে কদাচি পাপিচ্ছো, কুসীতো হীনৰীরিযো;

অপ্পস্সুতো অনাদরো, কেন লোকস্মি কিং সিযা.

৯৮৮. ‘‘বহুস্সুতো চ মেধাৰী, সীলেসু সুসমাহিতো;

চেতোসমথমনুযুত্তো, অপি মুদ্ধনি তিট্ঠতু.

৯৮৯. ‘‘যো পপঞ্চমনুযুত্তো, পপঞ্চাভিরতো মগো;

ৰিরাধযী সো নিব্বানং, যোগক্খেমং অনুত্তরং.

৯৯০. ‘‘যো চ পপঞ্চং হিত্ৰান, নিপ্পপঞ্চপথে রতো;

আরাধযী সো নিব্বানং, যোগক্খেমং অনুত্তরং.

৯৯১. [ধ. প. ৯৮] ‘‘গামে ৰা যদি ৰারঞ্ঞে, নিন্নে ৰা যদি ৰা থলে;

যত্থ অরহন্তো ৰিহরন্তি, তং ভূমিরামণেয্যকং.

৯৯২. ‘‘রমণীযানি অরঞ্ঞানি, যত্থ ন রমতী জনো;

ৰীতরাগা রমিস্সন্তি, ন তে কামগৰেসিনো.

৯৯৩. [ধ. প. ৭৬] ‘‘নিধীনংৰ পৰত্তারং, যং পস্সে ৰজ্জদস্সিনং;

নিগ্গয্হৰাদিং মেধাৰিং, তাদিসং পণ্ডিতং ভজে;

তাদিসং ভজমানস্স, সেয্যো হোতি ন পাপিযো.

৯৯৪. [ধ. প. ৭৭] ‘‘ওৰদেয্যানুসাসেয্য, অসব্ভা চ নিৰারযে;

সতঞ্হি সো পিযো হোতি, অসতং হোতি অপ্পিযো.

৯৯৫. ‘‘অঞ্ঞস্স ভগৰা বুদ্ধো, ধম্মং দেসেসি চক্খুমা;

ধম্মে দেসিযমানম্হি, সোতমোধেসিমত্থিকো;

তং মে অমোঘং সৰনং, ৰিমুত্তোম্হি অনাসৰো.

৯৯৬. ‘‘নেৰ পুব্বেনিৰাসায, নপি দিব্বস্স চক্খুনো;

চেতোপরিযায ইদ্ধিযা, চুতিযা উপপত্তিযা;

সোতধাতুৰিসুদ্ধিযা, পণিধী মে ন ৰিজ্জতি [কথা. ৩৭৮].

৯৯৭. ‘‘রুক্খমূলংৰ নিস্সায, মুণ্ডো সঙ্ঘাটিপারুতো;

পঞ্ঞায উত্তমো থেরো, উপতিস্সোৰ [উপতিস্সো চ (সী. ক.)] ঝাযতি.

৯৯৮. ‘‘অৰিতক্কং সমাপন্নো, সম্মাসম্বুদ্ধসাৰকো;

অরিযেন তুণ্হীভাৰেন, উপেতো হোতি তাৰদে.

৯৯৯. [উদা. ২৪] ‘‘যথাপি পব্বতো সেলো, অচলো সুপ্পতিট্ঠিতো;

এৰং মোহক্খযা ভিক্খু, পব্বতোৰ ন ৰেধতি.

১০০০. ‘‘অনঙ্গণস্স পোসস্স, নিচ্চং সুচিগৰেসিনো;

ৰালগ্গমত্তং পাপস্স, অব্ভমত্তংৰ খাযতি.

১০০১. ‘‘নাভিনন্দামি মরণং, নাভিনন্দামি জীৰিতং;

নিক্খিপিস্সং ইমং কাযং, সম্পজানো পতিস্সতো.

১০০২. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, নিব্বিসং ভতকো যথা.

১০০৩. ‘‘উভযেন মিদং মরণমেৰ, নামরণং পচ্ছা ৰা পুরে ৰা;

পটিপজ্জথ মা ৰিনস্সথ, খণো ৰো মা উপচ্চগা.

১০০৪. ‘‘নগরং যথা পচ্চন্তং, গুত্তং সন্তরবাহিরং;

এৰং গোপেথ অত্তানং, খণো ৰো মা উপচ্চগা;

খণাতীতা হি সোচন্তি, নিরযম্হি সমপ্পিতা.

১০০৫. ‘‘উপসন্তো উপরতো, মন্তভাণী [মত্তভাণী (সী.)] অনুদ্ধতো;

ধুনাতি পাপকে ধম্মে, দুমপত্তংৰ মালুতো.

১০০৬. ‘‘উপসন্তো উপরতো, মন্তভাণী অনুদ্ধতো;

অপ্পাসি [অব্বহি (স্যা.), অভাসি (?)] পাপকে ধম্মে, দুমপত্তংৰ মালুতো.

১০০৭. ‘‘উপসন্তো অনাযাসো, ৰিপ্পসন্নো অনাৰিলো;

কল্যাণসীলো মেধাৰী, দুক্খস্সন্তকরো সিযা.

১০০৮. ‘‘ন ৰিস্সসে একতিযেসু এৰং, অগারিসু পব্বজিতেসু চাপি;

সাধূপি হুত্ৰা ন অসাধু হোন্তি, অসাধু হুত্ৰা পুন সাধু হোন্তি.

১০০৯. ‘‘কামচ্ছন্দো চ ব্যাপাদো, থিনমিদ্ধঞ্চ ভিক্খুনো;

উদ্ধচ্চং ৰিচিকিচ্ছা চ, পঞ্চেতে চিত্তকেলিসা.

১০১০. ‘‘যস্স সক্করিযমানস্স, অসক্কারেন চূভযং;

সমাধি ন ৰিকম্পতি, অপ্পমাদৰিহারিনো.

১০১১. ‘‘তং ঝাযিনং সাততিকং, সুখুমদিট্ঠিৰিপস্সকং;

উপাদানক্খযারামং, আহু সপ্পুরিসো ইতি.

১০১২. ‘‘মহাসমুদ্দো পথৰী, পব্বতো অনিলোপি চ;

উপমায ন যুজ্জন্তি, সত্থু ৰরৰিমুত্তিযা.

১০১৩. ‘‘চক্কানুৰত্তকো থেরো, মহাঞাণী সমাহিতো;

পথৰাপগ্গিসমানো, ন রজ্জতি ন দুস্সতি.

১০১৪. ‘‘পঞ্ঞাপারমিতং পত্তো, মহাবুদ্ধি মহামতি;

অজল়ো জল়সমানো, সদা চরতি নিব্বুতো.

১০১৫. ‘‘পরিচিণ্ণো মযা সত্থা…পে… ভৰনেত্তি সমূহতা.

১০১৬. ‘‘সম্পাদেথপ্পমাদেন, এসা মে অনুসাসনী;

হন্দাহং পরিনিব্বিস্সং, ৰিপ্পমুত্তোম্হি সব্বধী’’তি.

… সারিপুত্তো থেরো….

৩. আনন্দত্থেরগাথা

১০১৭. ‘‘পিসুণেন চ কোধনেন চ, মচ্ছরিনা চ ৰিভূতনন্দিনা;

সখিতং ন করেয্য পণ্ডিতো, পাপো কাপুরিসেন সঙ্গমো.

১০১৮. ‘‘সদ্ধেন চ পেসলেন চ, পঞ্ঞৰতা বহুস্সুতেন চ;

সখিতং করেয্য পণ্ডিতো, ভদ্দো সপ্পুরিসেন সঙ্গমো.

১০১৯. ‘‘পস্স চিত্তকতং বিম্বং…পে… যস্স নত্থি ধুৰং ঠিতি.