১৫. অত্তদণ্ডসুত্তং

৯৪১. ‘‘অত্তদণ্ডা ভযং জাতং, জনং পস্সথ মেধগং;

সংৰেগং কিত্তযিস্সামি, যথা সংৰিজিতং মযা.

৯৪২. ‘‘ফন্দমানং পজং দিস্ৰা, মচ্ছে অপ্পোদকে যথা;

অঞ্ঞমঞ্ঞেহি ব্যারুদ্ধে, দিস্ৰা মং ভযমাৰিসি.

৯৪৩. ‘‘সমন্তমসারো লোকো, দিসা সব্বা সমেরিতা;

ইচ্ছং ভৰনমত্তনো, নাদ্দসাসিং অনোসিতং.

৯৪৪. ‘‘ওসানেত্ৰেৰ ব্যারুদ্ধে, দিস্ৰা মে অরতী অহু;

অথেত্থ সল্লমদ্দক্খিং, দুদ্দসং হদযনিস্সিতং.

৯৪৫. ‘‘যেন সল্লেন ওতিণ্ণো, দিসা সব্বা ৰিধাৰতি;

তমেৰ সল্লমব্বুয্হ, ন ধাৰতি ন সীদতি.

৯৪৬. ‘‘তত্থ সিক্খানুগীযন্তি [সিক্খানুকিরিযন্তি (ক.)], যানি লোকে গধিতানি;

ন তেসু পসুতো সিযা, নিব্বিজ্ঝ সব্বসো কামে;

সিক্খে নিব্বানমত্তনো.

৯৪৭. ‘‘সচ্চো সিযা অপ্পগব্ভো, অমাযো রিত্তপেসুণো;

অক্কোধনো লোভপাপং, ৰেৰিচ্ছং ৰিতরে মুনি.

৯৪৮. ‘‘নিদ্দং তন্দিং সহে থীনং, পমাদেন ন সংৰসে;

অতিমানে ন তিট্ঠেয্য, নিব্বানমনসো নরো.

৯৪৯. ‘‘মোসৰজ্জে ন নীযেথ, রূপে স্নেহং ন কুব্বযে;

মানঞ্চ পরিজানেয্য, সাহসা ৰিরতো চরে.

৯৫০. ‘‘পুরাণং নাভিনন্দেয্য, নৰে খন্তিং ন কুব্বযে;

হিয্যমানে ন সোচেয্য, আকাসং ন সিতো সিযা.

৯৫১. ‘‘গেধং ব্রূমি মহোঘোতি, আজৰং ব্রূমি জপ্পনং;

আরম্মণং পকপ্পনং, কামপঙ্কো দুরচ্চযো.

৯৫২. ‘‘সচ্চা অৰোক্কম্ম [অৰোক্কমং (নিদ্দেস)] মুনি, থলে তিট্ঠতি ব্রাহ্মণো;

সব্বং সো [সব্বসো (স্যা. ক.)] পটিনিস্সজ্জ, স ৰে সন্তোতি ৰুচ্চতি.

৯৫৩. ‘‘স ৰে ৰিদ্ৰা স ৰেদগূ, ঞত্ৰা ধম্মং অনিস্সিতো;

সম্মা সো লোকে ইরিযানো, ন পিহেতীধ কস্সচি.

৯৫৪. ‘‘যোধ কামে অচ্চতরি, সঙ্গং লোকে দুরচ্চযং;

ন সো সোচতি নাজ্ঝেতি, ছিন্নসোতো অবন্ধনো.

৯৫৫. ‘‘যং পুব্বে তং ৰিসোসেহি, পচ্ছা তে মাহু কিঞ্চনং;

মজ্ঝে চে নো গহেস্সসি, উপসন্তো চরিস্সসি.

৯৫৬. ‘‘সব্বসো নামরূপস্মিং, যস্স নত্থি মমাযিতং;

অসতা চ ন সোচতি, স ৰে লোকে ন জীযতি.

৯৫৭. ‘‘যস্স নত্থি ইদং মেতি, পরেসং ৰাপি কিঞ্চনং;

মমত্তং সো অসংৰিন্দং, নত্থি মেতি ন সোচতি.

৯৫৮. ‘‘অনিট্ঠুরী অননুগিদ্ধো, অনেজো সব্বধী সমো;

তমানিসংসং পব্রূমি, পুচ্ছিতো অৰিকম্পিনং.

৯৫৯. ‘‘অনেজস্স ৰিজানতো, নত্থি কাচি নিসঙ্খতি [নিসঙ্খিতি (সী. পী.)].

ৰিরতো সো ৰিযারব্ভা, খেমং পস্সতি সব্বধি.

৯৬০. ‘‘ন সমেসু ন ওমেসু, ন উস্সেসু ৰদতে মুনি;

সন্তো সো ৰীতমচ্ছরো, নাদেতি ন নিরস্সতী’’তি.

অত্তদণ্ডসুত্তং পন্নরসমং নিট্ঠিতং.