১৬. সারিপুত্তসুত্তং

৯৬১. ‘‘ন মে দিট্ঠো ইতো পুব্বে, (ইচ্চাযস্মা সারিপুত্তো)

ন সুতো উদ কস্সচি;

এৰং ৰগ্গুৰদো সত্থা,

তুসিতা গণিমাগতো.

৯৬২. ‘‘সদেৰকস্স লোকস্স, যথা দিস্সতি চক্খুমা;

সব্বং তমং ৰিনোদেত্ৰা, একোৰ রতিমজ্ঝগা.

৯৬৩. ‘‘তং বুদ্ধং অসিতং তাদিং, অকুহং গণিমাগতং;

বহূনমিধ বদ্ধানং, অত্থি পঞ্হেন আগমং.

৯৬৪. ‘‘ভিক্খুনো ৰিজিগুচ্ছতো, ভজতো রিত্তমাসনং;

রুক্খমূলং সুসানং ৰা, পব্বতানং গুহাসু ৰা.

৯৬৫. ‘‘উচ্চাৰচেসু সযনেসু, কীৰন্তো তত্থ ভেরৰা;

যেহি ভিক্খু ন ৰেধেয্য, নিগ্ঘোসে সযনাসনে.

৯৬৬. ‘‘কতী পরিস্সযা লোকে, গচ্ছতো অগতং দিসং;

যে ভিক্খু অভিসম্ভৰে, পন্তম্হি সযনাসনে.

৯৬৭. ‘‘ক্যাস্স ব্যপ্পথযো অস্সু, ক্যাস্সস্সু ইধ গোচরা;

কানি সীলব্বতানাস্সু, পহিতত্তস্স ভিক্খুনো.

৯৬৮. ‘‘কং সো সিক্খং সমাদায, একোদি নিপকো সতো;

কম্মারো রজতস্সেৰ, নিদ্ধমে মলমত্তনো’’.

৯৬৯. ‘‘ৰিজিগুচ্ছমানস্স যদিদং ফাসু, (সারিপুত্তাতি ভগৰা)

রিত্তাসনং সযনং সেৰতো চে;

সম্বোধিকামস্স যথানুধম্মং,

তং তে পৰক্খামি যথা পজানং.

৯৭০. ‘‘পঞ্চন্নং ধীরো ভযানং ন ভাযে, ভিক্খু সতো সপরিযন্তচারী;

ডংসাধিপাতানং সরীসপানং, মনুস্সফস্সানং চতুপ্পদানং.

৯৭১. ‘‘পরধম্মিকানম্পি ন সন্তসেয্য, দিস্ৰাপি তেসং বহুভেরৰানি;

অথাপরানি অভিসম্ভৰেয্য, পরিস্সযানি কুসলানুএসী.

৯৭২. ‘‘আতঙ্কফস্সেন খুদায ফুট্ঠো, সীতং অতুণ্হং [অচ্চুণ্হং (সী. স্যা.)] অধিৰাসযেয্য;

সো তেহি ফুট্ঠো বহুধা অনোকো, ৰীরিযং পরক্কম্মদল়্হং করেয্য.

৯৭৩. ‘‘থেয্যং ন কারে [ন করেয্য (সী. স্যা. ক.)] ন মুসা ভণেয্য, মেত্তায ফস্সে তসথাৰরানি;

যদাৰিলত্তং মনসো ৰিজঞ্ঞা, কণ্হস্স পক্খোতি ৰিনোদযেয্য.

৯৭৪. ‘‘কোধাতিমানস্স ৰসং ন গচ্ছে, মূলম্পি তেসং পলিখঞ্ঞ তিট্ঠে;

অথপ্পিযং ৰা পন অপ্পিযং ৰা, অদ্ধা ভৰন্তো অভিসম্ভৰেয্য.

৯৭৫. ‘‘পঞ্ঞং পুরক্খত্ৰা কল্যাণপীতি, ৰিক্খম্ভযে তানি পরিস্সযানি;

অরতিং সহেথ সযনম্হি পন্তে, চতুরো সহেথ পরিদেৰধম্মে.

৯৭৬. ‘‘কিংসূ অসিস্সামি কুৰং ৰা [কুধ ৰা (ক.), কুথ ৰা (নিদ্দেস)] অসিস্সং, দুক্খং ৰত সেত্থ ক্ৰজ্জ সেস্সং;

এতে ৰিতক্কে পরিদেৰনেয্যে, ৰিনযেথ সেখো অনিকেতচারী.

৯৭৭. ‘‘অন্নঞ্চ লদ্ধা ৰসনঞ্চ কালে, মত্তং সো জঞ্ঞা ইধ তোসনত্থং;

সো তেসু গুত্তো যতচারি গামে, রুসিতোপি ৰাচং ফরুসং ন ৰজ্জা.

৯৭৮. ‘‘ওক্খিত্তচক্খু ন চ পাদলোলো, ঝানানুযুত্তো বহুজাগরস্স;

উপেক্খমারব্ভ সমাহিতত্তো, তক্কাসযং কুক্কুচ্চিযূপছিন্দে.

৯৭৯. ‘‘চুদিতো ৰচীভি সতিমাভিনন্দে, সব্রহ্মচারীসু খিলং পভিন্দে;

ৰাচং পমুঞ্চে কুসলং নাতিৰেলং, জনৰাদধম্মায ন চেতযেয্য.

৯৮০. ‘‘অথাপরং পঞ্চ রজানি লোকে, যেসং সতীমা ৰিনযায সিক্খে;

রূপেসু সদ্দেসু অথো রসেসু, গন্ধেসু ফস্সেসু সহেথ রাগং.

৯৮১. ‘‘এতেসু ধম্মেসু ৰিনেয্য ছন্দং, ভিক্খু সতিমা সুৰিমুত্তচিত্তো;

কালেন সো সম্মা ধম্মং পরিৰীমংসমানো,

একোদিভূতো ৰিহনে তমং সো’’তি.

সারিপুত্তসুত্তং সোল়সমং নিট্ঠিতং.

অট্ঠকৰগ্গো চতুত্থো