১৪. তুৰটকসুত্তং

৯২১. ‘‘পুচ্ছামি তং আদিচ্চবন্ধু [আদিচ্চবন্ধুং (সী. স্যা.)], ৰিৰেকং সন্তিপদঞ্চ মহেসি;

কথং দিস্ৰা নিব্বাতি ভিক্খু, অনুপাদিযানো লোকস্মিং কিঞ্চি’’.

৯২২. ‘‘মূলং পপঞ্চসঙ্খায, (ইতি ভগৰা)

মন্তা অস্মীতি সব্বমুপরুন্ধে [সব্বমুপরুদ্ধে (স্যা. পী. ক.)];

যা কাচি তণ্হা অজ্ঝত্তং,

তাসং ৰিনযা [ৰিনযায (?)] সদা সতো সিক্খে.

৯২৩. ‘‘যং কিঞ্চি ধম্মমভিজঞ্ঞা, অজ্ঝত্তং অথৰাপি বহিদ্ধা;

ন তেন থামং [মানং (সী. ক.)] কুব্বেথ, ন হি সা নিব্বুতি সতং ৰুত্তা.

৯২৪. ‘‘সেয্যো ন তেন মঞ্ঞেয্য, নীচেয্যো অথৰাপি সরিক্খো;

ফুট্ঠো [পুট্ঠো (সী. স্যা. ক.)] অনেকরূপেহি, নাতুমানং ৰিকপ্পযং তিট্ঠে.

৯২৫. ‘‘অজ্ঝত্তমেৰুপসমে, ন অঞ্ঞতো ভিক্খু সন্তিমেসেয্য;

অজ্ঝত্তং উপসন্তস্স, নত্থি অত্তা কুতো নিরত্তা ৰা.

৯২৬. ‘‘মজ্ঝে যথা সমুদ্দস্স, ঊমি নো জাযতী ঠিতো হোতি;

এৰং ঠিতো অনেজস্স, উস্সদং ভিক্খু ন করেয্য কুহিঞ্চি’’.

৯২৭. ‘‘অকিত্তযী ৰিৰটচক্খু, সক্খিধম্মং পরিস্সযৰিনযং;

পটিপদং ৰদেহি ভদ্দন্তে, পাতিমোক্খং অথৰাপি সমাধিং’’.

৯২৮. ‘‘চক্খূহি নেৰ লোলস্স, গামকথায আৰরযে সোতং;

রসে চ নানুগিজ্ঝেয্য, ন চ মমাযেথ কিঞ্চি লোকস্মিং.

৯২৯. ‘‘ফস্সেন যদা ফুট্ঠস্স, পরিদেৰং ভিক্খু ন করেয্য কুহিঞ্চি;

ভৰঞ্চ নাভিজপ্পেয্য, ভেরৰেসু চ ন সম্পৰেধেয্য.

৯৩০. ‘‘অন্নানমথো পানানং, খাদনীযানং অথোপি ৰত্থানং;

লদ্ধা ন সন্নিধিং কযিরা, ন চ পরিত্তসে তানি অলভমানো.

৯৩১. ‘‘ঝাযী ন পাদলোলস্স, ৰিরমে কুক্কুচ্চা নপ্পমজ্জেয্য;

অথাসনেসু সযনেসু, অপ্পসদ্দেসু ভিক্খু ৰিহরেয্য.

৯৩২. ‘‘নিদ্দং ন বহুলীকরেয্য, জাগরিযং ভজেয্য আতাপী;

তন্দিং মাযং হস্সং খিড্ডং, মেথুনং ৰিপ্পজহে সৰিভূসং.

৯৩৩. ‘‘আথব্বণং সুপিনং লক্খণং, নো ৰিদহে অথোপি নক্খত্তং;

ৰিরুতঞ্চ গব্ভকরণং, তিকিচ্ছং মামকো ন সেৰেয্য.

৯৩৪. ‘‘নিন্দায নপ্পৰেধেয্য, ন উণ্ণমেয্য পসংসিতো ভিক্খু;

লোভং সহ মচ্ছরিযেন, কোধং পেসুণিযঞ্চ পনুদেয্য.

৯৩৫. ‘‘কযৰিক্কযে ন তিট্ঠেয্য, উপৰাদং ভিক্খু ন করেয্য কুহিঞ্চি;

গামে চ নাভিসজ্জেয্য, লাভকম্যা জনং ন লপযেয্য.

৯৩৬. ‘‘ন চ কত্থিতা সিযা ভিক্খু, ন চ ৰাচং পযুত্তং ভাসেয্য;

পাগব্ভিযং ন সিক্খেয্য, কথং ৰিগ্গাহিকং ন কথযেয্য.

৯৩৭. ‘‘মোসৰজ্জে ন নীযেথ, সম্পজানো সঠানি ন কযিরা;

অথ জীৰিতেন পঞ্ঞায, সীলব্বতেন নাঞ্ঞমতিমঞ্ঞে.

৯৩৮. ‘‘সুত্ৰা রুসিতো বহুং ৰাচং, সমণানং ৰা পুথুজনানং [পুথুৰচনানং (সী. স্যা. পী.)];

ফরুসেন নে ন পটিৰজ্জা, ন হি সন্তো পটিসেনিকরোন্তি.

৯৩৯. ‘‘এতঞ্চ ধম্মমঞ্ঞায, ৰিচিনং ভিক্খু সদা সতো সিক্খে;

সন্তীতি নিব্বুতিং ঞত্ৰা, সাসনে গোতমস্স ন পমজ্জেয্য.

৯৪০. ‘‘অভিভূ হি সো অনভিভূতো, সক্খিধম্মমনীতিহমদস্সী;

তস্মা হি তস্স ভগৰতো সাসনে, অপ্পমত্তো সদা নমস্সমনুসিক্খে’’তি.

তুৰটকসুত্তং চুদ্দসমং নিট্ঠিতং.