১৩. মহাব্যূহসুত্তং

৯০১. যে কেচিমে দিট্ঠিপরিব্বসানা, ইদমেৰ সচ্চন্তি ৰিৰাদযন্তি [ৰিৰাদিযন্তি (সী. পী.)];

সব্বেৰ তে নিন্দমন্ৰানযন্তি, অথো পসংসম্পি লভন্তি তত্থ.

৯০২. অপ্পঞ্হি এতং ন অলং সমায, দুৰে ৰিৰাদস্স ফলানি ব্রূমি;

এতম্পি দিস্ৰা ন ৰিৰাদযেথ, খেমাভিপস্সং অৰিৰাদভূমিং.

৯০৩. যা কাচিমা সম্মুতিযো পুথুজ্জা, সব্বাৰ এতা ন উপেতি ৰিদ্ৰা;

অনূপযো সো উপযং কিমেয্য, দিট্ঠে সুতে খন্তিমকুব্বমানো.

৯০৪. সীলুত্তমা সঞ্ঞমেনাহু সুদ্ধিং, ৰতং সমাদায উপট্ঠিতাসে;

ইধেৰ সিক্খেম অথস্স সুদ্ধিং, ভৰূপনীতা কুসলা ৰদানা.

৯০৫. সচে চুতো সীলৰততো হোতি, পৰেধতী [স ৰেধতি (সী. পী.)] কম্ম ৰিরাধযিত্ৰা;

পজপ্পতী পত্থযতী চ সুদ্ধিং, সত্থাৰ হীনো পৰসং ঘরম্হা.

৯০৬. সীলব্বতং ৰাপি পহায সব্বং, কম্মঞ্চ সাৰজ্জনৰজ্জমেতং;

সুদ্ধিং অসুদ্ধিন্তি অপত্থযানো, ৰিরতো চরে সন্তিমনুগ্গহায.

৯০৭. তমূপনিস্সায জিগুচ্ছিতং ৰা, অথৰাপি দিট্ঠং ৰ সুতং মুতং ৰা;

উদ্ধংসরা সুদ্ধিমনুত্থুনন্তি, অৰীততণ্হাসে ভৰাভৰেসু.

৯০৮. পত্থযমানস্স হি জপ্পিতানি, পৰেধিতং ৰাপি পকপ্পিতেসু;

চুতূপপাতো ইধ যস্স নত্থি, স কেন ৰেধেয্য কুহিংৰ জপ্পে [কুহিঞ্চি জপ্পে (সী. স্যা. ক.), কুহিং পজপ্পে (পী.) নিদ্দেসো পস্সিতব্বো].

৯০৯. যমাহু ধম্মং পরমন্তি একে, তমেৰ হীনন্তি পনাহু অঞ্ঞে;

সচ্চো নু ৰাদো কতমো ইমেসং, সব্বেৰ হীমে কুসলা ৰদানা.

৯১০. সকঞ্হি ধম্মং পরিপুণ্ণমাহু, অঞ্ঞস্স ধম্মং পন হীনমাহু;

এৰম্পি ৰিগ্গয্হ ৰিৰাদযন্তি, সকং সকং সম্মুতিমাহু সচ্চং.

৯১১. পরস্স চে ৰম্ভযিতেন হীনো, ন কোচি ধম্মেসু ৰিসেসি অস্স;

পুথূ হি অঞ্ঞস্স ৰদন্তি ধম্মং, নিহীনতো সম্হি দল়্হং ৰদানা.

৯১২. সদ্ধম্মপূজাপি নেসং তথেৰ, যথা পসংসন্তি সকাযনানি;

সব্বেৰ ৰাদা [সব্বে পৰাদা (স্যা.)] তথিযা [তথিৰা (সব্বত্থ)] ভৰেয্যুং, সুদ্ধী হি নেসং পচ্চত্তমেৰ.

৯১৩. ন ব্রাহ্মণস্স পরনেয্যমত্থি, ধম্মেসু নিচ্ছেয্য সমুগ্গহীতং;

তস্মা ৰিৰাদানি উপাতিৰত্তো, ন হি সেট্ঠতো পস্সতি ধম্মমঞ্ঞং.

৯১৪. জানামি পস্সামি তথেৰ এতং, দিট্ঠিযা একে পচ্চেন্তি সুদ্ধিং;

অদ্দক্খি চে কিঞ্হি তুমস্স তেন, অতিসিত্ৰা অঞ্ঞেন ৰদন্তি সুদ্ধিং.

৯১৫. পস্সং নরো দক্খতি [দক্খিতি (সী.)] নামরূপং, দিস্ৰান ৰা ঞস্সতি তানিমেৰ;

কামং বহুং পস্সতু অপ্পকং ৰা, ন হি তেন সুদ্ধিং কুসলা ৰদন্তি.

৯১৬. নিৰিস্সৰাদী ন হি সুব্বিনাযো, পকপ্পিতং দিট্ঠি পুরেক্খরানো;

যং নিস্সিতো তত্থ সুভং ৰদানো, সুদ্ধিংৰদো তত্থ তথদ্দসা সো.

৯১৭. ন ব্রাহ্মণো কপ্পমুপেতি সঙ্খা [সঙ্খং (সী. স্যা. পী.)], ন দিট্ঠিসারী নপি ঞাণবন্ধু;

ঞত্ৰা চ সো সম্মুতিযো [সম্মতিযো (স্যা.)] পুথুজ্জা, উপেক্খতী উগ্গহণন্তি মঞ্ঞে.

৯১৮. ৰিস্সজ্জ গন্থানি মুনীধ লোকে, ৰিৰাদজাতেসু ন ৰগ্গসারী;

সন্তো অসন্তেসু উপেক্খকো সো, অনুগ্গহো উগ্গহণন্তি মঞ্ঞে.

৯১৯. পুব্বাসৰে হিত্ৰা নৰে অকুব্বং, ন ছন্দগূ নোপি নিৰিস্সৰাদী;

স ৰিপ্পমুত্তো দিট্ঠিগতেহি ধীরো, ন লিম্পতি [ন লিপ্পতি (সী. পী.)] লোকে অনত্তগরহী.

৯২০. স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰা;

স পন্নভারো মুনি ৰিপ্পমুত্তো, ন কপ্পিযো নূপরতো ন পত্থিযোতি.

মহাব্যূহসুত্তং তেরসমং নিট্ঠিতং.