১২. চূল়ব্যূহসুত্তং [চূল়ৰিযূহসুত্তং (সী. স্যা. নিদ্দেস)]

৮৮৪. সকংসকংদিট্ঠিপরিব্বসানা, ৰিগ্গয্হ নানা কুসলা ৰদন্তি;

যো এৰং জানাতি স ৰেদি ধম্মং, ইদং পটিক্কোসমকেৰলী সো.

৮৮৫. এৰম্পি ৰিগ্গয্হ ৰিৰাদযন্তি, বালো পরো অক্কুসলোতি [অকুসলোতি (সী. স্যা. পী.)] চাহু;

সচ্চো নু ৰাদো কতমো ইমেসং, সব্বেৰ হীমে কুসলা ৰদানা.

৮৮৬. পরস্স চে ধম্মমনানুজানং, বালোমকো [বালো মগো (সী. স্যা. ক.)] হোতি নিহীনপঞ্ঞো;

সব্বেৰ বালা সুনিহীনপঞ্ঞা, সব্বেৰিমে দিট্ঠিপরিব্বসানা.

৮৮৭. সন্দিট্ঠিযা চেৰ ন ৰীৰদাতা, সংসুদ্ধপঞ্ঞা কুসলা মুতীমা;

ন তেসং কোচি পরিহীনপঞ্ঞো [কোচিপি নিহীনপঞ্ঞো (সী. স্যা. ক.)], দিট্ঠী হি তেসম্পি তথা সমত্তা.

৮৮৮. ন ৰাহমেতং তথিযন্তি [তথিৰন্তি (স্যা. ক.)] ব্রূমি, যমাহু বালা মিথু অঞ্ঞমঞ্ঞং;

সকংসকংদিট্ঠিমকংসু সচ্চং, তস্মা হি বালোতি পরং দহন্তি.

৮৮৯. যমাহু সচ্চং তথিযন্তি একে, তমাহু অঞ্ঞে [অঞ্ঞেপি (স্যা.), অঞ্ঞে চ (?)] তুচ্ছং মুসাতি;

এৰম্পি ৰিগয্হ ৰিৰাদযন্তি, কস্মা ন একং সমণা ৰদন্তি.

৮৯০. একঞ্হি সচ্চং ন দুতীযমত্থি, যস্মিং পজা নো ৰিৰদে পজানং;

নানা তে [নানাতো (ক.)] সচ্চানি সযং থুনন্তি, তস্মা ন একং সমণা ৰদন্তি.

৮৯১. কস্মা নু সচ্চানি ৰদন্তি নানা, পৰাদিযাসে কুসলা ৰদানা;

সচ্চানি সুতানি বহূনি নানা, উদাহু তে তক্কমনুস্সরন্তি.

৮৯২. ন হেৰ সচ্চানি বহূনি নানা, অঞ্ঞত্র সঞ্ঞায নিচ্চানি লোকে;

তক্কঞ্চ দিট্ঠীসু পকপ্পযিত্ৰা, সচ্চং মুসাতি দ্ৰযধম্মমাহু.

৮৯৩. দিট্ঠে সুতে সীলৰতে মুতে ৰা, এতে চ নিস্সায ৰিমানদস্সী;

ৰিনিচ্ছযে ঠত্ৰা পহস্সমানো, বালো পরো অক্কুসলোতি চাহ.

৮৯৪. যেনেৰ বালোতি পরং দহাতি, তেনাতুমানং কুসলোতি চাহ;

সযমত্তনা সো কুসলো ৰদানো, অঞ্ঞং ৰিমানেতি তদেৰ পাৰ.

৮৯৫. অতিসারদিট্ঠিযাৰ সো সমত্তো, মানেন মত্তো পরিপুণ্ণমানী;

সযমেৰ সামং মনসাভিসিত্তো, দিট্ঠী হি সা তস্স তথা সমত্তা.

৮৯৬. পরস্স চে হি ৰচসা নিহীনো, তুমো সহা হোতি নিহীনপঞ্ঞো;

অথ চে সযং ৰেদগূ হোতি ধীরো, ন কোচি বালো সমণেসু অত্থি.

৮৯৭. অঞ্ঞং ইতো যাভিৰদন্তি ধম্মং, অপরদ্ধা সুদ্ধিমকেৰলী তে [সুদ্ধিমকেৰলীনো (সী.)];

এৰম্পি তিত্থ্যা পুথুসো ৰদন্তি, সন্দিট্ঠিরাগেন হি তেভিরত্তা [ত্যাভিরত্তা (স্যা. ক.)].

৮৯৮. ইধেৰ সুদ্ধি ইতি ৰাদযন্তি, নাঞ্ঞেসু ধম্মেসু ৰিসুদ্ধিমাহু;

এৰম্পি তিত্থ্যা পুথুসো নিৰিট্ঠা, সকাযনে তত্থ দল়্হং ৰদানা.

৮৯৯. সকাযনে ৰাপি দল়্হং ৰদানো, কমেত্থ বালোতি পরং দহেয্য;

সযমেৰ সো মেধগমাৰহেয্য [মেধকং আৰহেয্য (সী. পী.)], পরং ৰদং বালমসুদ্ধিধম্মং.

৯০০. ৰিনিচ্ছযে ঠত্ৰা সযং পমায, উদ্ধং স [উদ্দং সো (সী. স্যা. পী.)] লোকস্মিং ৰিৰাদমেতি;

হিত্ৰান সব্বানি ৰিনিচ্ছযানি, ন মেধগং কুব্বতি জন্তু লোকেতি.

চূল়ব্যূহসুত্তং দ্ৰাদসমং নিট্ঠিতং.