১১. কলহৰিৰাদসুত্তং

৮৬৮. ‘‘কুতোপহূতা কলহা ৰিৰাদা, পরিদেৰসোকা সহমচ্ছরা চ;

মানাতিমানা সহপেসুণা চ, কুতোপহূতা তে তদিঙ্ঘ ব্রূহি’’.

৮৬৯. ‘‘পিযপ্পহূতা কলহা ৰিৰাদা,

পরিদেৰসোকা সহমচ্ছরা চ;

মানাতিমানা সহপেসুণা চ,

মচ্ছেরযুত্তা কলহা ৰিৰাদা;

ৰিৰাদজাতেসু চ পেসুণানি’’.

৮৭০. ‘‘পিযা সু [পিযানু (স্যা.), পিযস্সু (ক.)] লোকস্মিং কুতোনিদানা, যে চাপি [যে ৰাপি (সী. স্যা. পী.)] লোভা ৰিচরন্তি লোকে;

আসা চ নিট্ঠা চ কুতোনিদানা, যে সম্পরাযায নরস্স হোন্তি’’.

৮৭১. ‘‘ছন্দানিদানানি পিযানি লোকে, যে চাপি লোভা ৰিচরন্তি লোকে;

আসা চ নিট্ঠা চ ইতোনিদানা, যে সম্পরাযায নরস্স হোন্তি’’.

৮৭২. ‘‘ছন্দো নু লোকস্মিং কুতোনিদানো, ৰিনিচ্ছযা চাপি [ৰাপি (সী. স্যা. পী.)] কুতোপহূতা;

কোধো মোসৰজ্জঞ্চ কথংকথা চ, যে ৰাপি ধম্মা সমণেন ৰুত্তা’’.

৮৭৩. ‘‘সাতং অসাতন্তি যমাহু লোকে, তমূপনিস্সায পহোতি ছন্দো;

রূপেসু দিস্ৰা ৰিভৰং ভৰঞ্চ, ৰিনিচ্ছযং কুব্বতি [কুরুতে (বহূসু)] জন্তু লোকে.

৮৭৪. ‘‘কোধো মোসৰজ্জঞ্চ কথংকথা চ, এতেপি ধম্মা দ্ৰযমেৰ সন্তে;

কথংকথী ঞাণপথায সিক্খে, ঞত্ৰা পৰুত্তা সমণেন ধম্মা’’.

৮৭৫. ‘‘সাতং অসাতঞ্চ কুতোনিদানা, কিস্মিং অসন্তে ন ভৰন্তি হেতে;

ৰিভৰং ভৰঞ্চাপি যমেতমত্থং, এতং মে পব্রূহি যতোনিদানং’’.

৮৭৬. ‘‘ফস্সনিদানং সাতং অসাতং, ফস্সে অসন্তে ন ভৰন্তি হেতে;

ৰিভৰং ভৰঞ্চাপি যমেতমত্থং, এতং তে পব্রূমি ইতোনিদানং’’.

৮৭৭. ‘‘ফস্সো নু লোকস্মি কুতোনিদানো, পরিগ্গহা চাপি কুতোপহূতা;

কিস্মিং অসন্তে ন মমত্তমত্থি, কিস্মিং ৰিভূতে ন ফুসন্তি ফস্সা’’.

৮৭৮. ‘‘নামঞ্চ রূপঞ্চ পটিচ্চ ফস্সো, ইচ্ছানিদানানি পরিগ্গহানি;

ইচ্ছাযসন্ত্যা ন মমত্তমত্থি, রূপে ৰিভূতে ন ফুসন্তি ফস্সা’’.

৮৭৯. ‘‘কথংসমেতস্স ৰিভোতি রূপং, সুখং দুখঞ্চাপি [দুখং ৰাপি (সী. স্যা.)] কথং ৰিভোতি;

এতং মে পব্রূহি যথা ৰিভোতি, তং জানিযামাতি [জানিস্সামাতি (সী. ক.)] মে মনো অহু’’.

৮৮০. ‘‘ন সঞ্ঞসঞ্ঞী ন ৰিসঞ্ঞসঞ্ঞী, নোপি অসঞ্ঞী ন ৰিভূতসঞ্ঞী;

এৰংসমেতস্স ৰিভোতি রূপং, সঞ্ঞানিদানা হি পপঞ্চসঙ্খা’’.

৮৮১. ‘‘যং তং অপুচ্ছিম্হ অকিত্তযী নো,

অঞ্ঞং তং পুচ্ছাম তদিঙ্ঘ ব্রূহি;

এত্তাৰতগ্গং নু [নো (সী. স্যা.)] ৰদন্তি হেকে,

যক্খস্স সুদ্ধিং ইধ পণ্ডিতাসে;

উদাহু অঞ্ঞম্পি ৰদন্তি এত্তো.

৮৮২. ‘‘এত্তাৰতগ্গম্পি ৰদন্তি হেকে, যক্খস্স সুদ্ধিং ইধ পণ্ডিতাসে;

তেসং পনেকে সমযং ৰদন্তি, অনুপাদিসেসে কুসলা ৰদানা.

৮৮৩. ‘‘এতে চ ঞত্ৰা উপনিস্সিতাতি, ঞত্ৰা মুনী নিস্সযে সো ৰিমংসী;

ঞত্ৰা ৰিমুত্তো ন ৰিৰাদমেতি, ভৰাভৰায ন সমেতি ধীরো’’তি.

কলহৰিৰাদসুত্তং একাদসমং নিট্ঠিতং.