৪. সুন্দরিকভারদ্ৰাজসুত্তং

এৰং মে সুতং – একং সমযং ভগৰা কোসলেসু ৰিহরতি সুন্দরিকায নদিযা তীরে. তেন খো পন সমযেন সুন্দরিকভারদ্ৰাজো ব্রাহ্মণো সুন্দরিকায নদিযা তীরে অগ্গিং জুহতি, অগ্গিহুত্তং পরিচরতি. অথ খো সুন্দরিকভারদ্ৰাজো ব্রাহ্মণো অগ্গিং জুহিত্ৰা অগ্গিহুত্তং পরিচরিত্ৰা উট্ঠাযাসনা সমন্তা চতুদ্দিসা অনুৰিলোকেসি – ‘‘কো নু খো ইমং হব্যসেসং ভুঞ্জেয্যা’’তি? অদ্দসা খো সুন্দরিকভারদ্ৰাজো ব্রাহ্মণো ভগৰন্তং অৰিদূরে অঞ্ঞতরস্মিং রুক্খমূলে সসীসং পারুতং নিসিন্নং; দিস্ৰান ৰামেন হত্থেন হব্যসেসং গহেত্ৰা দক্খিণেন হত্থেন কমণ্ডলুং গহেত্ৰা যেন ভগৰা তেনুপসঙ্কমি.

অথ খো ভগৰা সুন্দরিকভারদ্ৰাজস্স ব্রাহ্মণস্স পদসদ্দেন সীসং ৰিৰরি. অথ খো সুন্দরিকভারদ্ৰাজো ব্রাহ্মণো – ‘‘মুণ্ডো অযং ভৰং, মুণ্ডকো অযং ভৰ’’ন্তি ততোৰ পুন নিৰত্তিতুকামো অহোসি. অথ খো সুন্দরিকভারদ্ৰাজস্স ব্রাহ্মণস্স এতদহোসি – ‘‘মুণ্ডাপি হি ইধেকচ্চে ব্রাহ্মণা ভৰন্তি, যংনূনাহং উপসঙ্কমিত্ৰা জাতিং পুচ্ছেয্য’’ন্তি. অথ খো সুন্দরিকভারদ্ৰাজো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘কিংজচ্চো ভৰ’’ন্তি?

অথ খো ভগৰা সুন্দরিকভারদ্ৰাজং ব্রাহ্মণং গাথাহি অজ্ঝভাসি –

৪৫৭. ‘‘ন ব্রাহ্মণো নোম্হি ন রাজপুত্তো, ন ৰেস্সাযনো উদ কোচি নোম্হি;

গোত্তং পরিঞ্ঞায পুথুজ্জনানং, অকিঞ্চনো মন্ত চরামি লোকে.

৪৫৮. ‘‘সঙ্ঘাটিৰাসী অগহো চরামি [অগিহো (ক. সী. পী.) অগেহো (কত্থচি)], নিৰুত্তকেসো অভিনিব্বুতত্তো;

অলিপ্পমানো ইধ মাণৰেহি, অকল্লং মং ব্রাহ্মণ পুচ্ছসি গোত্তপঞ্হং’’.

৪৫৯. ‘‘পুচ্ছন্তি ৰে ভো ব্রাহ্মণা, ব্রাহ্মণেভি সহ ব্রাহ্মণো নো ভৰ’’ন্তি.

৪৬০. ‘‘ব্রাহ্মণো হি চে ত্ৰং ব্রূসি, মঞ্চ ব্রূসি অব্রাহ্মণং;

তং তং সাৰিত্তিং পুচ্ছামি, তিপদং চতুৰীসতক্খরং.

৪৬১. ‘‘কিং নিস্সিতা ইসযো মনুজা, খত্তিযা ব্রাহ্মণা [পঠমপাদন্তো] দেৰতানং;

যঞ্ঞমকপ্পযিংসু পুথূ ইধ লোকে [দুতিযপাদন্তো (সী.)].

৪৬২. ‘‘যদন্তগূ ৰেদগূ যঞ্ঞকালে, যস্সাহুতিং লভে তস্সিজ্ঝেতি ব্রূমি’’.

৪৬৩. ‘‘অদ্ধা হি তস্স হুতমিজ্ঝে, (ইতি ব্রাহ্মণো)

যং তাদিসং ৰেদগুমদ্দসাম;

তুম্হাদিসানঞ্হি অদস্সনেন, অঞ্ঞো জনো ভুঞ্জতি পূরল়াসং’’.

৪৬৪. ‘‘তস্মাতিহ ত্ৰং ব্রাহ্মণ অত্থেন, অত্থিকো উপসঙ্কম্ম পুচ্ছ;

সন্তং ৰিধূমং অনীঘং নিরাসং, অপ্পেৰিধ অভিৰিন্দে সুমেধং’’.

৪৬৫. ‘‘যঞ্ঞে রতোহং ভো গোতম, যঞ্ঞং যিট্ঠুকামো নাহং পজানামি;

অনুসাসতু মং ভৰং, যত্থ হুতং ইজ্ঝতে ব্রূহি মে তং’’.

‘‘তেন হি ত্ৰং, ব্রাহ্মণ, ওদহস্সু সোতং; ধম্মং তে দেসেস্সামি –

৪৬৬. ‘‘মা জাতিং পুচ্ছী চরণঞ্চ পুচ্ছ, কট্ঠা হৰে জাযতি জাতৰেদো;

নীচাকুলীনোপি মুনী ধিতীমা, আজানিযো হোতি হিরীনিসেধো.

৪৬৭. ‘‘সচ্চেন দন্তো দমসা উপেতো, ৰেদন্তগূ ৰূসিতব্রহ্মচরিযো;

কালেন তম্হি হব্যং পৰেচ্ছে, যো ব্রাহ্মণো পুঞ্ঞপেক্খো [পুঞ্ঞপেখো (সী. পী.)] যজেথ.

৪৬৮. ‘‘যে কামে হিত্ৰা অগহা চরন্তি, সুসঞ্ঞতত্তা তসরংৰ উজ্জুং;

কালেন তেসু হব্যং পৰেচ্ছে, যো ব্রাহ্মণো পুঞ্ঞপেক্খো যজেথ.

৪৬৯. ‘‘যে ৰীতরাগা সুসমাহিতিন্দ্রিযা, চন্দোৰ রাহুগ্গহণা পমুত্তা;

কালেন তেসু হব্যং পৰেচ্ছে, যো ব্রাহ্মণো পুঞ্ঞপেক্খো যজেথ.

৪৭০. ‘‘অসজ্জমানা ৰিচরন্তি লোকে, সদা সতা হিত্ৰা মমাযিতানি;

কালেন তেসু হব্যং পৰেচ্ছে, যো ব্রাহ্মণো পুঞ্ঞপেক্খো যজেথ.

৪৭১. ‘‘যো কামে হিত্ৰা অভিভুয্যচারী, যো ৰেদি জাতীমরণস্স অন্তং;

পরিনিব্বুতো উদকরহদোৰ সীতো, তথাগতো অরহতি পূরল়াসং.

৪৭২. ‘‘সমো সমেহি ৰিসমেহি দূরে, তথাগতো হোতি অনন্তপঞ্ঞো;

অনূপলিত্তো ইধ ৰা হুরং ৰা, তথাগতো অরহতি পূরল়াসং.

৪৭৩. ‘‘যম্হি ন মাযা ৰসতি ন মানো, যো ৰীতলোভো অমমো নিরাসো;

পনুণ্ণকোধো অভিনিব্বুতত্তো, যো ব্রাহ্মণো সোকমলং অহাসি;

তথাগতো অরহতি পূরল়াসং.

৪৭৪.

‘‘নিৰেসনং যো মনসো অহাসি, পরিগ্গহা যস্স ন সন্তি কেচি;

অনুপাদিযানো ইধ ৰা হুরং ৰা, তথাগতো অরহতি পূরল়াসং.

৪৭৫. ‘‘সমাহিতো যো উদতারি ওঘং, ধম্মং চঞ্ঞাসি পরমায দিট্ঠিযা;

খীণাসৰো অন্তিমদেহধারী, তথাগতো অরহতি পূরল়াসং.

৪৭৬. ‘‘ভৰাসৰা যস্স ৰচী খরা চ, ৰিধূপিতা অত্থগতা ন সন্তি;

স ৰেদগূ সব্বধি ৰিপ্পমুত্তো, তথাগতো অরহতি পূরল়াসং.

৪৭৭. ‘‘সঙ্গাতিগো যস্স ন সন্তি সঙ্গা, যো মানসত্তেসু অমানসত্তো;

দুক্খং পরিঞ্ঞায সখেত্তৰত্থুং, তথাগতো অরহতি পূরল়াসং.

৪৭৮. ‘‘আসং অনিস্সায ৰিৰেকদস্সী, পরৰেদিযং দিট্ঠিমুপাতিৰত্তো;

আরম্মণা যস্স ন সন্তি কেচি, তথাগতো অরহতি পূরল়াসং.

৪৭৯. ‘‘পরোপরা [পরোৰরা (সী. পী.)] যস্স সমেচ্চ ধম্মা, ৰিধূপিতা অত্থগতা ন সন্তি;

সন্তো উপাদানখযে ৰিমুত্তো, তথাগতো অরহতি পূরল়াসং.

৪৮০. ‘‘সংযোজনং জাতিখযন্তদস্সী, যোপানুদি রাগপথং অসেসং;

সুদ্ধো নিদোসো ৰিমলো অকাচো [অকামো (সী. স্যা.)], তথাগতো অরহতি পূরল়াসং.

৪৮১. ‘‘যো অত্তনো অত্তানং [অত্তনাত্তানং (সী. স্যা.)] নানুপস্সতি, সমাহিতো উজ্জুগতো ঠিতত্তো;

স ৰে অনেজো অখিলো অকঙ্খো, তথাগতো অরহতি পূরল়াসং.

৪৮২. ‘‘মোহন্তরা যস্স ন সন্তি কেচি, সব্বেসু ধম্মেসু চ ঞাণদস্সী;

সরীরঞ্চ অন্তিমং ধারেতি, পত্তো চ সম্বোধিমনুত্তরং সিৰং;

এত্তাৰতা যক্খস্স সুদ্ধি, তথাগতো অরহতি পূরল়াসং’’.

৪৮৩. ‘‘হুতঞ্চ [হুত্তঞ্চ (সী. ক.)] ময্হং হুতমত্থু সচ্চং, যং তাদিসং ৰেদগুনং অলত্থং;

ব্রহ্মা হি সক্খি পটিগণ্হাতু মে ভগৰা, ভুঞ্জতু মে ভগৰা পূরল়াসং’’.

৪৮৪. ‘‘গাথাভিগীতং মে অভোজনেয্যং, সম্পস্সতং ব্রাহ্মণ নেস ধম্মো;

গাথাভিগীতং পনুদন্তি বুদ্ধা, ধম্মে সতী ব্রাহ্মণ ৰুত্তিরেসা.

৪৮৫. ‘‘অঞ্ঞেন চ কেৰলিনং মহেসিং, খীণাসৰং কুক্কুচ্চৰূপসন্তং;

অন্নেন পানেন উপট্ঠহস্সু, খেত্তঞ্হি তং পুঞ্ঞপেক্খস্স হোতি’’.

৪৮৬. ‘‘সাধাহং ভগৰা তথা ৰিজঞ্ঞং, যো দক্খিণং ভুঞ্জেয্য মাদিসস্স;

যং যঞ্ঞকালে পরিযেসমানো, পপ্পুয্য তৰ সাসনং’’.

৪৮৭. ‘‘সারম্ভা যস্স ৰিগতা, চিত্তং যস্স অনাৰিলং;

ৰিপ্পমুত্তো চ কামেহি, থিনং যস্স পনূদিতং.

৪৮৮. ‘‘সীমন্তানং ৰিনেতারং, জাতিমরণকোৰিদং;

মুনিং মোনেয্যসম্পন্নং, তাদিসং যঞ্ঞমাগতং.

৪৮৯. ‘‘ভকুটিং [ভূকুটিং (ক. সী.), ভাকুটিং (ক. সী., ম. নি. ১.২২৬)] ৰিনযিত্ৰান, পঞ্জলিকা নমস্সথ;

পূজেথ অন্নপানেন, এৰং ইজ্ঝন্তি দক্খিণা.

৪৯০. ‘‘বুদ্ধো ভৰং অরহতি পূরল়াসং, পুঞ্ঞখেত্তমনুত্তরং;

আযাগো সব্বলোকস্স, ভোতো দিন্নং মহপ্ফল’’ন্তি.

অথ খো সুন্দরিকভারদ্ৰাজো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি; এৰমেৰং ভোতা গোতমেন অনেকপরিযাযেন ধম্মো পকাসিতো. এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. লভেয্যাহং ভোতো গোতমস্স সন্তিকে পব্বজ্জং, লভেয্যং উপসম্পদ’’ন্তি. অলত্থ খো সুন্দরিকভারদ্ৰাজো ব্রাহ্মণো…পে… অরহতং অহোসীতি.

সুন্দরিকভারদ্ৰাজসুত্তং চতুত্থং নিট্ঠিতং.