১১. নালকসুত্তং

৬৮৪. আনন্দজাতে তিদসগণে পতীতে, সক্কঞ্চ ইন্দং সুচিৰসনে চ দেৰে;

দুস্সং গহেত্ৰা অতিরিৰ থোমযন্তে, অসিতো ইসি অদ্দস দিৰাৰিহারে.

৬৮৫. দিস্ৰান দেৰে মুদিতমনে উদগ্গে, চিত্তিং করিত্ৰান ইদমৰোচ [করিত্ৰা ইদমৰোচাসি (সী.)] তত্থ;

‘‘কিং দেৰসঙ্ঘো অতিরিৰ কল্যরূপো, দুস্সং গহেত্ৰা রমযথ [ভমযথ (সী.)] কিং পটিচ্চ.

৬৮৬. ‘‘যদাপি আসী অসুরেহি সঙ্গমো, জযো সুরানং অসুরা পরাজিতা.

তদাপি নেতাদিসো লোমহংসনো, কিমব্ভুতং দট্ঠু মরূ পমোদিতা.

৬৮৭. ‘‘সেল়েন্তি গাযন্তি চ ৰাদযন্তি চ, ভুজানি ফোটেন্তি [পোঠেন্তি (সী. পী.), পোথেন্তি (ক.)] চ নচ্চযন্তি চ;

পুচ্ছামি ৰোহং মেরুমুদ্ধৰাসিনে, ধুনাথ মে সংসযং খিপ্প মারিসা’’.

৬৮৮. ‘‘সো বোধিসত্তো রতনৰরো অতুল্যো, মনুস্সলোকে হিতসুখত্থায [হিতসুখতায (সী. স্যা. পী.)] জাতো;

সক্যান গামে জনপদে লুম্বিনেয্যে, তেনম্হ তুট্ঠা অতিরিৰ কল্যরূপা.

৬৮৯. ‘‘সো সব্বসত্তুত্তমো অগ্গপুগ্গলো, নরাসভো সব্বপজানমুত্তমো;

ৰত্তেস্সতি চক্কমিসিৰ্হযে ৰনে, নদংৰ সীহো বলৰা মিগাভিভূ’’.

৬৯০. তং সদ্দং সুত্ৰা তুরিতমৰসরী সো, সুদ্ধোদনস্স তদ ভৰনং উপাৰিসি [উপাগমি (সী. পী.)];

নিসজ্জ তত্থ ইদমৰোচাসি সক্যে, ‘‘কুহিং কুমারো অহমপি দট্ঠুকামো’’.

৬৯১. ততো কুমারং জলিতমিৰ সুৰণ্ণং, উক্কামুখেৰ সুকুসলসম্পহট্ঠং [সুকুসলেন সম্পহট্ঠং (ক.)];

দদ্দল্লমানং [দদ্দল়্হমানং (ক.)] সিরিযা অনোমৰণ্ণং, দস্সেসু পুত্তং অসিতৰ্হযস্স সক্যা.

৬৯২. দিস্ৰা কুমারং সিখিমিৰ পজ্জলন্তং, তারাসভংৰ নভসিগমং ৰিসুদ্ধং;

সূরিযং তপন্তং সরদরিৰব্ভমুত্তং, আনন্দজাতো ৰিপুলমলত্থ পীতিং.

৬৯৩. অনেকসাখঞ্চ সহস্সমণ্ডলং, ছত্তং মরূ ধারযুমন্তলিক্খে;

সুৰণ্ণদণ্ডা ৰীতিপতন্তি চামরা, ন দিস্সরে চামরছত্তগাহকা.

৬৯৪. দিস্ৰা জটী কণ্হসিরিৰ্হযো ইসি, সুৰণ্ণনিক্খং ৰিয পণ্ডুকম্বলে;

সেতঞ্চ ছত্তং ধরিযন্ত [ধারিযন্ত (স্যা.), ধারযন্তং (সী. ক.)] মুদ্ধনি, উদগ্গচিত্তো সুমনো পটিগ্গহে.

৬৯৫. পটিগ্গহেত্ৰা পন সক্যপুঙ্গৰং, জিগীসতো [জিগিংসকো (সী. স্যা. পী.)] লক্খণমন্তপারগূ;

পসন্নচিত্তো গিরমব্ভুদীরযি, ‘‘অনুত্তরাযং দ্ৰিপদানমুত্তমো’’ [দিপদানমুত্তমো (সী. স্যা. পী.)].

৬৯৬. অথত্তনো গমনমনুস্সরন্তো, অকল্যরূপো গল়যতি অস্সুকানি;

দিস্ৰান সক্যা ইসিমৰোচুং রুদন্তং,

‘‘নো চে কুমারে ভৰিস্সতি অন্তরাযো’’.

৬৯৭. দিস্ৰান সক্যে ইসিমৰোচ অকল্যে, ‘‘নাহং কুমারে অহিতমনুস্সরামি;

ন চাপিমস্স ভৰিস্সতি অন্তরাযো, ন ওরকাযং অধিমানসা [অধিমনসা (সী. স্যা.)] ভৰাথ.

৬৯৮. ‘‘সম্বোধিযগ্গং ফুসিস্সতাযং কুমারো, সো ধম্মচক্কং পরমৰিসুদ্ধদস্সী;

ৰত্তেস্সতাযং বহুজনহিতানুকম্পী, ৰিত্থারিকস্স ভৰিস্সতি ব্রহ্মচরিযং.

৬৯৯. ‘‘মমঞ্চ আযু ন চিরমিধাৰসেসো, অথন্তরা মে ভৰিস্সতি কালকিরিযা;

সোহং ন সোস্সং [সুস্সং (সী. স্যা.)] অসমধুরস্স ধম্মং, তেনম্হি অট্টো ব্যসনংগতো অঘাৰী’’.

৭০০. সো সাকিযানং ৰিপুলং জনেত্ৰা পীতিং, অন্তেপুরম্হা নিগ্গমা [নিরগমা (সী. স্যা.), নিগমা (ক. সী.), নিরগম (পী.)] ব্রহ্মচারী;

সো ভাগিনেয্যং সযং অনুকম্পমানো, সমাদপেসি অসমধুরস্স ধম্মে.

৭০১. ‘‘বুদ্ধোতি ঘোসং যদ [যদি (স্যা. ক.)] পরতো সুণাসি, সম্বোধিপত্তো ৰিৰরতি ধম্মমগ্গং;

গন্ত্ৰান তত্থ সমযং পরিপুচ্ছমানো [সযং পরিপুচ্ছিযানো (সী. স্যা.)], চরস্সু তস্মিং ভগৰতি ব্রহ্মচরিযং’’.

৭০২. তেনানুসিট্ঠো হিতমনেন তাদিনা, অনাগতে পরমৰিসুদ্ধদস্সিনা;

সো নালকো উপচিতপুঞ্ঞসঞ্চযো, জিনং পতিক্খং [পতি + ইক্খং = পতিক্খং] পরিৰসি রক্খিতিন্দ্রিযো.

৭০৩. সুত্ৰান ঘোসং জিনৰরচক্কৰত্তনে, গন্ত্ৰান দিস্ৰা ইসিনিসভং পসন্নো;

মোনেয্যসেট্ঠং মুনিপৰরং অপুচ্ছি, সমাগতে অসিতাৰ্হযস্স সাসনেতি.

ৰত্থুগাথা নিট্ঠিতা.

৭০৪. ‘‘অঞ্ঞাতমেতং ৰচনং, অসিতস্স যথাতথং;

তং তং গোতম পুচ্ছামি, সব্বধম্মান পারগুং.

৭০৫. ‘‘অনগারিযুপেতস্স, ভিক্খাচরিযং জিগীসতো;

মুনি পব্রূহি মে পুট্ঠো, মোনেয্যং উত্তমং পদং’’.

৭০৬. ‘‘মোনেয্যং তে উপঞ্ঞিস্সং, (ইতি ভগৰা) দুক্করং দুরভিসম্ভৰং;

হন্দ তে নং পৰক্খামি, সন্থম্ভস্সু দল়্হো ভৰ.

৭০৭. ‘‘সমানভাগং কুব্বেথ, গামে অক্কুট্ঠৰন্দিতং;

মনোপদোসং রক্খেয্য, সন্তো অনুণ্ণতো চরে.

৭০৮. ‘‘উচ্চাৰচা নিচ্ছরন্তি, দাযে অগ্গিসিখূপমা;

নারিযো মুনিং পলোভেন্তি, তাসু তং মা পলোভযুং.

৭০৯. ‘‘ৰিরতো মেথুনা ধম্মা, হিত্ৰা কামে পরোপরে [পরোৰরে (সী. পী.), ৰরাৰরে (স্যা.)];

অৰিরুদ্ধো অসারত্তো, পাণেসু তসথাৰরে.

৭১০. ‘‘যথা অহং তথা এতে, যথা এতে তথা অহং;

অত্তানং উপমং কত্ৰা, ন হনেয্য ন ঘাতযে.

৭১১. ‘‘হিত্ৰা ইচ্ছঞ্চ লোভঞ্চ, যত্থ সত্তো পুথুজ্জনো;

চক্খুমা পটিপজ্জেয্য, তরেয্য নরকং ইমং.

৭১২. ‘‘ঊনূদরো মিতাহারো, অপ্পিচ্ছস্স অলোলুপো;

সদা [স ৰে (পী.)] ইচ্ছায নিচ্ছাতো, অনিচ্ছো হোতি নিব্বুতো.

৭১৩. ‘‘স পিণ্ডচারং চরিত্ৰা, ৰনন্তমভিহারযে;

উপট্ঠিতো রুক্খমূলস্মিং, আসনূপগতো মুনি.

৭১৪. ‘‘স ঝানপসুতো ধীরো, ৰনন্তে রমিতো সিযা;

ঝাযেথ রুক্খমূলস্মিং, অত্তানমভিতোসযং.

৭১৫. ‘‘ততো রত্যা ৰিৰসানে [ৰিৰসনে (সী. স্যা. পী.)], গামন্তমভিহারযে;

অৰ্হানং নাভিনন্দেয্য, অভিহারঞ্চ গামতো.

৭১৬. ‘‘ন মুনী গামমাগম্ম, কুলেসু সহসা চরে;

ঘাসেসনং ছিন্নকথো, ন ৰাচং পযুতং ভণে.

৭১৭. ‘‘অলত্থং যদিদং সাধু, নালত্থং কুসলং ইতি;

উভযেনেৰ সো তাদী, রুক্খংৰুপনিৰত্ততি [রুক্খংৰু’পতিৰত্ততি (ক.), রুক্খংৰ উপাতিৰত্ততি (স্যা.)].

৭১৮. ‘‘স পত্তপাণি ৰিচরন্তো, অমূগো মূগসম্মতো;

অপ্পং দানং ন হীল়েয্য, দাতারং নাৰজানিযা.

৭১৯. ‘‘উচ্চাৰচা হি পটিপদা, সমণেন পকাসিতা;

ন পারং দিগুণং যন্তি, নযিদং একগুণং মুতং.

৭২০. ‘‘যস্স চ ৰিসতা নত্থি, ছিন্নসোতস্স ভিক্খুনো;

কিচ্চাকিচ্চপ্পহীনস্স, পরিল়াহো ন ৰিজ্জতি.

৭২১. ‘‘মোনেয্যং তে উপঞ্ঞিস্সং, খুরধারূপমো ভৰে;

জিৰ্হায তালুমাহচ্চ, উদরে সঞ্ঞতো সিযা.

৭২২. ‘‘অলীনচিত্তো চ সিযা, ন চাপি বহু চিন্তযে;

নিরামগন্ধো অসিতো, ব্রহ্মচরিযপরাযণো.

৭২৩. ‘‘একাসনস্স সিক্খেথ, সমণূপাসনস্স চ;

একত্তং মোনমক্খাতং, একো চে অভিরমিস্সসি;

অথ ভাহিসি [ভাসিহি (সী. স্যা. পী.)] দসদিসা.

৭২৪. ‘‘সুত্ৰা ধীরানং নিগ্ঘোসং, ঝাযীনং কামচাগিনং;

ততো হিরিঞ্চ সদ্ধঞ্চ, ভিয্যো কুব্বেথ মামকো.

৭২৫. ‘‘তং নদীহি ৰিজানাথ, সোব্ভেসু পদরেসু চ;

সণন্তা যন্তি কুসোব্ভা [কুস্সুব্ভা (সী.)], তুণ্হীযন্তি মহোদধী.

৭২৬. ‘‘যদূনকং তং সণতি, যং পূরং সন্তমেৰ তং;

অড্ঢকুম্ভূপমো বালো, রহদো পূরোৰ পণ্ডিতো.

৭২৭. ‘‘যং সমণো বহুং ভাসতি, উপেতং অত্থসঞ্হিতং;

জানং সো ধম্মং দেসেতি, জানং সো বহু ভাসতি.

৭২৮. ‘‘যো চ জানং সংযতত্তো, জানং ন বহু ভাসতি;

স মুনী মোনমরহতি, স মুনী মোনমজ্ঝগা’’তি.

নালকসুত্তং একাদসমং নিট্ঠিতং.