৫. সূচিলোমসুত্তং

এৰং মে সুতং – একং সমযং ভগৰা গযাযং ৰিহরতি টঙ্কিতমঞ্চে সূচিলোমস্স যক্খস্স ভৰনে. তেন খো পন সমযেন খরো চ যক্খো সূচিলোমো চ যক্খো ভগৰতো অৰিদূরে অতিক্কমন্তি. অথ খো খরো যক্খো সূচিলোমং যক্খং এতদৰোচ – ‘‘এসো সমণো’’তি. ‘‘নেসো সমণো, সমণকো এসো. যাৰাহং জানামি [যাৰ জানামি (সী. পী.)] যদি ৰা সো সমণো [যদি ৰা সমণো (স্যা.)], যদি ৰা সো সমণকো’’তি [যদি ৰা সমণকোতি (সী. স্যা. পী.)].

অথ খো সূচিলোমো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰতো কাযং উপনামেসি. অথ খো ভগৰা কাযং অপনামেসি. অথ খো সূচিলোমো যক্খো ভগৰন্তং এতদৰোচ – ‘‘ভাযসি মং, সমণা’’তি? ‘‘ন খ্ৰাহং তং, আৰুসো, ভাযামি; অপি চ তে সপ্ফস্সো পাপকো’’তি.

‘‘পঞ্হং তং, সমণ, পুচ্ছিস্সামি. সচে মে ন ব্যাকরিস্সসি, চিত্তং ৰা তে খিপিস্সামি, হদযং ৰা তে ফালেস্সামি, পাদেসু ৰা গহেত্ৰা পারগঙ্গায খিপিস্সামী’’তি.

‘‘ন খ্ৰাহং তং, আৰুসো, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যো মে চিত্তং ৰা খিপেয্য হদযং ৰা ফালেয্য পাদেসু ৰা গহেত্ৰা পারগঙ্গায খিপেয্য. অপি চ ত্ৰং, আৰুসো, পুচ্ছ যদাকঙ্খসী’’তি. অথ খো সূচিলোমো যক্খো ভগৰন্তং গাথায অজ্ঝভাসি –

২৭৩. ‘‘রাগো চ দোসো চ কুতোনিদানা, অরতী রতী লোমহংসো কুতোজা;

কুতো সমুট্ঠায মনোৰিতক্কা, কুমারকা ধঙ্কমিৰোস্সজন্তি’’.

২৭৪. ‘‘রাগো চ দোসো চ ইতোনিদানা, অরতী রতী লোমহংসো ইতোজা;

ইতো সমুট্ঠায মনোৰিতক্কা, কুমারকা ধঙ্কমিৰোস্সজন্তি.

২৭৪. ‘‘স্নেহজা অত্তসম্ভূতা, নিগ্রোধস্সেৰ খন্ধজা;

পুথূ ৰিসত্তা কামেসু, মালুৰাৰ ৰিততাৰনে.

২৭৫. ‘‘যে নং পজানন্তি যতোনিদানং, তে নং ৰিনোদেন্তি সুণোহি যক্খ;

তে দুত্তরং ওঘমিমং তরন্তি, অতিণ্ণপুব্বং অপুনব্ভৰাযা’’তি.

সূচিলোমসুত্তং পঞ্চমং নিট্ঠিতং.