৬. ধম্মচরিযসুত্তং

২৭৬. ধম্মচরিযং ব্রহ্মচরিযং, এতদাহু ৰসুত্তমং;

পব্বজিতোপি চে হোতি, অগারা অনগারিযং.

২৭৭. সো চে মুখরজাতিকো, ৰিহেসাভিরতো মগো;

জীৰিতং তস্স পাপিযো, রজং ৰড্ঢেতি অত্তনো.

২৭৮. কলহাভিরতো ভিক্খু, মোহধম্মেন আৰুতো;

অক্খাতম্পি ন জানাতি, ধম্মং বুদ্ধেন দেসিতং.

২৭৯. ৰিহেসং ভাৰিতত্তানং, অৰিজ্জায পুরক্খতো;

সংকিলেসং ন জানাতি, মগ্গং নিরযগামিনং.

২৮০. ৰিনিপাতং সমাপন্নো, গব্ভা গব্ভং তমা তমং;

স ৰে তাদিসকো ভিক্খু, পেচ্চ দুক্খং নিগচ্ছতি.

২৮১. গূথকূপো যথা অস্স, সম্পুণ্ণো গণৰস্সিকো;

যো চ এৰরূপো অস্স, দুব্বিসোধো হি সাঙ্গণো.

২৮২. যং এৰরূপং জানাথ, ভিক্খৰো গেহনিস্সিতং;

পাপিচ্ছং পাপসঙ্কপ্পং, পাপআচারগোচরং.

২৮৩. সব্বে সমগ্গা হুত্ৰান, অভিনিব্বজ্জিযাথ [অভিনিব্বজ্জযাথ (সী. পী. অ. নি. ৮.১০)] নং;

কারণ্ডৰং [কারণ্ডং ৰ (স্যা. ক.) অ. নি. ৮.১০] নিদ্ধমথ, কসম্বুং অপকস্সথ [অৰকস্সথ (সী. স্যা. ক.)].

২৮৪. ততো পলাপে [পলাসে (ক.)] ৰাহেথ, অস্সমণে সমণমানিনে;

নিদ্ধমিত্ৰান পাপিচ্ছে, পাপআচারগোচরে.

২৮৫. সুদ্ধা সুদ্ধেহি সংৰাসং, কপ্পযৰ্হো পতিস্সতা;

ততো সমগ্গা নিপকা, দুক্খস্সন্তং করিস্সথাতি.

ধম্মচরিযসুত্তং [কপিলসুত্তং (অট্ঠ.)] ছট্ঠং নিট্ঠিতং.