১৪. ধম্মিকসুত্তং

এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ধম্মিকো উপাসকো পঞ্চহি উপাসকসতেহি সদ্ধিং যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো ধম্মিকো উপাসকো ভগৰন্তং গাথাহি অজ্ঝভাসি –

৩৭৮. ‘‘পুচ্ছামি তং গোতম ভূরিপঞ্ঞ, কথংকরো সাৰকো সাধু হোতি;

যো ৰা অগারা অনগারমেতি, অগারিনো ৰা পনুপাসকাসে.

৩৭৯. ‘‘তুৰঞ্হি লোকস্স সদেৰকস্স, গতিং পজানাসি পরাযণঞ্চ;

ন চত্থি তুল্যো নিপুণত্থদস্সী, তুৰঞ্হি বুদ্ধং পৰরং ৰদন্তি.

৩৮০. ‘‘সব্বং তুৰং ঞাণমৰেচ্চ ধম্মং, পকাসেসি সত্তে অনুকম্পমানো;

ৰিৰট্টচ্ছদোসি সমন্তচক্খু, ৰিরোচসি ৰিমলো সব্বলোকে.

৩৮১. ‘‘আগঞ্ছি তে সন্তিকে নাগরাজা, এরাৰণো নাম জিনোতি সুত্ৰা;

সোপি তযা মন্তযিত্ৰাজ্ঝগমা, সাধূতি সুত্ৰান পতীতরূপো.

৩৮২. ‘‘রাজাপি তং ৰেস্সৰণো কুৰেরো, উপেতি ধম্মং পরিপুচ্ছমানো;

তস্সাপি ত্ৰং পুচ্ছিতো ব্রূসি ধীর, সো চাপি সুত্ৰান পতীতরূপো.

৩৮৩. ‘‘যে কেচিমে তিত্থিযা ৰাদসীলা, আজীৰকা ৰা যদি ৰা নিগণ্ঠা;

পঞ্ঞায তং নাতিতরন্তি সব্বে, ঠিতো ৰজন্তং ৰিয সীঘগামিং.

৩৮৪. ‘‘যে কেচিমে ব্রাহ্মণা ৰাদসীলা, ৰুদ্ধা চাপি ব্রাহ্মণা সন্তি কেচি;

সব্বে তযি অত্থবদ্ধা ভৰন্তি, যে চাপি অঞ্ঞে ৰাদিনো মঞ্ঞমানা.

৩৮৫. ‘‘অযঞ্হি ধম্মো নিপুণো সুখো চ, যোযং তযা ভগৰা সুপ্পৰুত্তো;

তমেৰ সব্বেপি [সব্বে মযং (স্যা.)] সুস্সূসমানা, তং নো ৰদ পুচ্ছিতো বুদ্ধসেট্ঠ.

৩৮৬. ‘‘সব্বেপি মে ভিক্খৰো সন্নিসিন্না, উপাসকা চাপি তথেৰ সোতুং;

সুণন্তু ধম্মং ৰিমলেনানুবুদ্ধং, সুভাসিতং ৰাসৰস্সেৰ দেৰা’’.

৩৮৭. ‘‘সুণাথ মে ভিক্খৰো সাৰযামি ৰো, ধম্মং ধুতং তঞ্চ চরাথ সব্বে;

ইরিযাপথং পব্বজিতানুলোমিকং, সেৰেথ নং অত্থদসো মুতীমা.

৩৮৮. ‘‘নো ৰে ৰিকালে ৰিচরেয্য ভিক্খু, গামে চ পিণ্ডায চরেয্য কালে;

অকালচারিঞ্হি সজন্তি সঙ্গা, তস্মা ৰিকালে ন চরন্তি বুদ্ধা.

৩৮৯. ‘‘রূপা চ সদ্দা চ রসা চ গন্ধা, ফস্সা চ যে সম্মদযন্তি সত্তে;

এতেসু ধম্মেসু ৰিনেয্য ছন্দং, কালেন সো পৰিসে পাতরাসং.

৩৯০. ‘‘পিণ্ডঞ্চ ভিক্খু সমযেন লদ্ধা, একো পটিক্কম্ম রহো নিসীদে;

অজ্ঝত্তচিন্তী ন মনো বহিদ্ধা, নিচ্ছারযে সঙ্গহিতত্তভাৰো.

৩৯১. ‘‘সচেপি সো সল্লপে সাৰকেন, অঞ্ঞেন ৰা কেনচি ভিক্খুনা ৰা;

ধম্মং পণীতং তমুদাহরেয্য, ন পেসুণং নোপি পরূপৰাদং.

৩৯২. ‘‘ৰাদঞ্হি একে পটিসেনিযন্তি, ন তে পসংসাম পরিত্তপঞ্ঞে;

ততো ততো নে পসজন্তি সঙ্গা, চিত্তঞ্হি তে তত্থ গমেন্তি দূরে.

৩৯৩. ‘‘পিণ্ডং ৰিহারং সযনাসনঞ্চ, আপঞ্চ সঙ্ঘাটিরজূপৰাহনং;

সুত্ৰান ধম্মং সুগতেন দেসিতং, সঙ্খায সেৰে ৰরপঞ্ঞসাৰকো.

৩৯৪. ‘‘তস্মা হি পিণ্ডে সযনাসনে চ, আপে চ সঙ্ঘাটিরজূপৰাহনে;

এতেসু ধম্মেসু অনূপলিত্তো, ভিক্খু যথা পোক্খরে ৰারিবিন্দু.

৩৯৫. ‘‘গহট্ঠৰত্তং পন ৰো ৰদামি, যথাকরো সাৰকো সাধু হোতি;

ন হেস [ন হেসো (সী.)] লব্ভা সপরিগ্গহেন, ফস্সেতুং যো কেৰলো ভিক্খুধম্মো.

৩৯৬. ‘‘পাণং ন হনে [ন হানে (সী.)] ন চ ঘাতযেয্য, ন চানুজঞ্ঞা হনতং পরেসং;

সব্বেসু ভূতেসু নিধায দণ্ডং, যে থাৰরা যে চ তসা সন্তি [তসন্তি (সী. পী.)] লোকে.

৩৯৭. ‘‘ততো অদিন্নং পরিৰজ্জযেয্য, কিঞ্চি ক্ৰচি সাৰকো বুজ্ঝমানো;

ন হারযে হরতং নানুজঞ্ঞা, সব্বং অদিন্নং পরিৰজ্জযেয্য.

৩৯৮. ‘‘অব্রহ্মচরিযং পরিৰজ্জযেয্য, অঙ্গারকাসুং জলিতংৰ ৰিঞ্ঞূ;

অসম্ভুণন্তো পন ব্রহ্মচরিযং, পরস্স দারং ন অতিক্কমেয্য.

৩৯৯. ‘‘সভগ্গতো ৰা পরিসগ্গতো ৰা, একস্স ৰেকো [চেতো (সী. স্যা.)] ন মুসা ভণেয্য;

ন ভাণযে ভণতং নানুজঞ্ঞা, সব্বং অভূতং পরিৰজ্জযেয্য.

৪০০. ‘‘মজ্জঞ্চ পানং ন সমাচরেয্য, ধম্মং ইমং রোচযে যো গহট্ঠো;

ন পাযযে পিৰতং নানুজঞ্ঞা, উম্মাদনন্তং ইতি নং ৰিদিত্ৰা.

৪০১. ‘‘মদা হি পাপানি করোন্তি বালা, কারেন্তি চঞ্ঞেপি জনে পমত্তে;

এতং অপুঞ্ঞাযতনং ৰিৰজ্জযে, উম্মাদনং মোহনং বালকন্তং.

৪০২. ‘‘পাণং ন হনে ন চাদিন্নমাদিযে, মুসা ন ভাসে ন চ মজ্জপো সিযা;

অব্রহ্মচরিযা ৰিরমেয্য মেথুনা, রত্তিং ন ভুঞ্জেয্য ৰিকালভোজনং.

৪০৩. ‘‘মালং ন ধারে ন চ গন্ধমাচরে, মঞ্চে ছমাযং ৰ সযেথ সন্থতে;

এতঞ্হি অট্ঠঙ্গিকমাহুপোসথং, বুদ্ধেন দুক্খন্তগুনা পকাসিতং.

৪০৪. ‘‘ততো চ পক্খস্সুপৰস্সুপোসথং, চাতুদ্দসিং পঞ্চদসিঞ্চ অট্ঠমিং;

পাটিহারিযপক্খঞ্চ পসন্নমানসো, অট্ঠঙ্গুপেতং সুসমত্তরূপং.

৪০৫. ‘‘ততো চ পাতো উপৰুত্থুপোসথো, অন্নেন পানেন চ ভিক্খুসঙ্ঘং;

পসন্নচিত্তো অনুমোদমানো, যথারহং সংৰিভজেথ ৰিঞ্ঞূ.

৪০৬. ‘‘ধম্মেন মাতাপিতরো ভরেয্য, পযোজযে ধম্মিকং সো ৰণিজ্জং;

এতং গিহী ৰত্তযমপ্পমত্তো, সযম্পভে নাম উপেতি দেৰে’’তি.

ধম্মিকসুত্তং চুদ্দসমং নিট্ঠিতং.

চূল়ৰগ্গো দুতিযো নিট্ঠিতো.