১৩. সম্মাপরিব্বাজনীযসুত্তং

৩৬১. ‘‘পুচ্ছামি মুনিং পহূতপঞ্ঞং,

তিণ্ণং পারঙ্গতং পরিনিব্বুতং ঠিতত্তং;

নিক্খম্ম ঘরা পনুজ্জ কামে, কথং ভিক্খু

সম্মা সো লোকে পরিব্বজেয্য’’.

৩৬২. ‘‘যস্স মঙ্গলা সমূহতা, (ইতি ভগৰা)

উপ্পাতা সুপিনা চ লক্খণা চ;

সো মঙ্গলদোসৰিপ্পহীনো,

সম্মা সো লোকে পরিব্বজেয্য.

৩৬৩. ‘‘রাগং ৰিনযেথ মানুসেসু, দিব্বেসু কামেসু চাপি ভিক্খু;

অতিক্কম্ম ভৰং সমেচ্চ ধম্মং, সম্মা সো লোকে পরিব্বজেয্য.

৩৬৪. ‘‘ৰিপিট্ঠিকত্ৰান পেসুণানি, কোধং কদরিযং জহেয্য ভিক্খু;

অনুরোধৰিরোধৰিপ্পহীনো, সম্মা সো লোকে পরিব্বজেয্য.

৩৬৫. ‘‘হিত্ৰান পিযঞ্চ অপ্পিযঞ্চ, অনুপাদায অনিস্সিতো কুহিঞ্চি;

সংযোজনিযেহি ৰিপ্পমুত্তো, সম্মা সো লোকে পরিব্বজেয্য.

৩৬৬. ‘‘ন সো উপধীসু সারমেতি, আদানেসু ৰিনেয্য ছন্দরাগং;

সো অনিস্সিতো অনঞ্ঞনেয্যো, সম্মা সো লোকে পরিব্বজেয্য.

৩৬৭. ‘‘ৰচসা মনসা চ কম্মুনা চ, অৰিরুদ্ধো সম্মা ৰিদিত্ৰা ধম্মং;

নিব্বানপদাভিপত্থযানো, সম্মা সো লোকে পরিব্বজেয্য.

৩৬৮. ‘‘যো ৰন্দতি মন্তি নুণ্ণমেয্য [নুন্নমেয্য (?)], অক্কুট্ঠোপি ন সন্ধিযেথ ভিক্খু;

লদ্ধা পরভোজনং ন মজ্জে, সম্মা সো লোকে পরিব্বজেয্য.

৩৬৯. ‘‘লোভঞ্চ ভৰঞ্চ ৰিপ্পহায, ৰিরতো ছেদনবন্ধনা চ [ছেদনবন্ধনতো (সী. স্যা.)] ভিক্খু;

সো তিণ্ণকথংকথো ৰিসল্লো, সম্মা সো লোকে পরিব্বজেয্য.

৩৭০. ‘‘সারুপ্পং অত্তনো ৰিদিত্ৰা, নো চ ভিক্খু হিংসেয্য কঞ্চি লোকে;

যথা তথিযং ৰিদিত্ৰা ধম্মং, সম্মা সো লোকে পরিব্বজেয্য.

৩৭১. ‘‘যস্সানুসযা ন সন্তি কেচি, মূলা চ [মূলা (সী. স্যা.)] অকুসলা সমূহতাসে;

সো নিরাসো [নিরাসযো (সী.), নিরাসসো (স্যা.)] অনাসিসানো [অনাসযানো (সী. পী.), অনাসসানো (স্যা.)], সম্মা সো লোকে পরিব্বজেয্য.

৩৭২. ‘‘আসৰখীণো পহীনমানো, সব্বং রাগপথং উপাতিৰত্তো;

দন্তো পরিনিব্বুতো ঠিতত্তো, সম্মা সো লোকে পরিব্বজেয্য.

৩৭৩. ‘‘সদ্ধো সুতৰা নিযামদস্সী, ৰগ্গগতেসু ন ৰগ্গসারি ধীরো;

লোভং দোসং ৰিনেয্য পটিঘং, সম্মা সো লোকে পরিব্বজেয্য.

৩৭৪. ‘‘সংসুদ্ধজিনো ৰিৰট্টচ্ছদো, ধম্মেসু ৰসী পারগূ অনেজো;

সঙ্খারনিরোধঞাণকুসলো, সম্মা সো লোকে পরিব্বজেয্য.

৩৭৫. ‘‘অতীতেসু অনাগতেসু চাপি, কপ্পাতীতো অতিচ্চসুদ্ধিপঞ্ঞো;

সব্বাযতনেহি ৰিপ্পমুত্তো, সম্মা সো লোকে পরিব্বজেয্য.

৩৭৬. ‘‘অঞ্ঞায পদং সমেচ্চ ধম্মং, ৰিৰটং দিস্ৰান পহানমাসৰানং;

সব্বুপধীনং পরিক্খযানো [পরিক্খযা (পী.)], সম্মা সো লোকে পরিব্বজেয্য’’.

৩৭৭. ‘‘অদ্ধা হি ভগৰা তথেৰ এতং, যো সো এৰংৰিহারী দন্তো ভিক্খু;

সব্বসংযোজনযোগৰীতিৰত্তো [সব্বসংযোজনিযে চ ৰীতিৰত্তো (সী. স্যা. পী.)], সম্মা সো লোকে পরিব্বজেয্যা’’তি.

সম্মাপরিব্বাজনীযসুত্তং তেরসমং নিট্ঠিতং.