১২. নিগ্রোধকপ্পসুত্তং

এৰং মে সুতং – একং সমযং ভগৰা আল়ৰিযং ৰিহরতি অগ্গাল়ৰে চেতিযে. তেন খো পন সমযেন আযস্মতো ৰঙ্গীসস্স উপজ্ঝাযো নিগ্রোধকপ্পো নাম থেরো অগ্গাল়ৰে চেতিযে অচিরপরিনিব্বুতো হোতি. অথ খো আযস্মতো ৰঙ্গীসস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘পরিনিব্বুতো নু খো মে উপজ্ঝাযো উদাহু নো পরিনিব্বুতো’’তি? অথ খো আযস্মা ৰঙ্গীসো সাযন্হসমযং পটিসল্লানা ৰুট্ঠিতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ৰঙ্গীসো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘পরিনিব্বুতো নু খো মে উপজ্ঝাযো, উদাহু নো পরিনব্বুতো’’’তি. অথ খো আযস্মা ৰঙ্গীসো উট্ঠাযাসনা একংসং চীৰরং কত্ৰা যেন ভগৰা তেনঞ্জলিং পণামেত্ৰা ভগৰন্তং গাথায অজ্ঝভাসি –

৩৪৫. ‘‘পুচ্ছাম [পুচ্ছামি (ক.)] সত্থারমনোমপঞ্ঞং, দিট্ঠেৰ ধম্মে যো ৰিচিকিচ্ছানং ছেত্তা;

অগ্গাল়ৰে কালমকাসি ভিক্খু, ঞাতো যসস্সী অভিনিব্বুতত্তো.

৩৪৬. ‘‘নিগ্রোধকপ্পো ইতি তস্স নামং, তযা কতং ভগৰা ব্রাহ্মণস্স;

সো তং নমস্সং অচরি মুত্যপেক্খো, আরদ্ধৰীরিযো দল়্হধম্মদস্সী.

৩৪৭. ‘‘তং সাৰকং সক্য [সক্ক (সী. স্যা. পী.)] মযম্পি সব্বে, অঞ্ঞাতুমিচ্ছাম সমন্তচক্খু;

সমৰট্ঠিতা নো সৰনায সোতা, তুৰং নো সত্থা ত্ৰমনুত্তরোসি.

৩৪৮. ‘‘ছিন্দেৰ নো ৰিচিকিচ্ছং ব্রূহি মেতং, পরিনিব্বুতং ৰেদয ভূরিপঞ্ঞ;

মজ্ঝেৰ [মজ্ঝে চ (স্যা. ক.)] নো ভাস সমন্তচক্খু, সক্কোৰ দেৰান সহস্সনেত্তো.

৩৪৯. ‘‘যে কেচি গন্থা ইধ মোহমগ্গা, অঞ্ঞাণপক্খা ৰিচিকিচ্ছঠানা;

তথাগতং পত্ৰা ন তে ভৰন্তি, চক্খুঞ্হি এতং পরমং নরানং.

৩৫০. ‘‘নো চে হি জাতু পুরিসো কিলেসে, ৰাতো যথা অব্ভধনং ৰিহানে;

তমোৰস্স নিৰুতো সব্বলোকো, ন জোতিমন্তোপি নরা তপেয্যুং.

৩৫১. ‘‘ধীরা চ পজ্জোতকরা ভৰন্তি, তং তং অহং ৰীর [ধীর (সী. স্যা.)] তথেৰ মঞ্ঞে;

ৰিপস্সিনং জানমুপাগমুম্হা [জানমুপগমম্হা (সী. স্যা.)], পরিসাসু নো আৰিকরোহি কপ্পং.

৩৫২. ‘‘খিপ্পং গিরং এরয ৰগ্গু ৰগ্গুং, হংসোৰ পগ্গয্হ সণিকং [সণিং (স্যা. পী.)] নিকূজ;

বিন্দুস্সরেন সুৰিকপ্পিতেন, সব্বেৰ তে উজ্জুগতা সুণোম.

৩৫৩. ‘‘পহীনজাতিমরণং অসেসং, নিগ্গয্হ ধোনং [ধোতং (সী.)] ৰদেস্সামি ধম্মং;

ন কামকারো হি পুথুজ্জনানং, সঙ্খেয্যকারো চ [সঙ্খয্যকারোৰ (ক.)] তথাগতানং.

৩৫৪. ‘‘সম্পন্নৰেয্যাকরণং তৰেদং, সমুজ্জুপঞ্ঞস্স [সমুজ্জপঞ্ঞস্স (স্যা. ক.)] সমুগ্গহীতং;

অযমঞ্জলী পচ্ছিমো সুপ্পণামিতো, মা মোহযী জানমনোমপঞ্ঞ.

৩৫৫. ‘‘পরোৰরং [ৰরাৰরং (কত্থচি)] অরিযধম্মং ৰিদিত্ৰা, মা মোহযী জানমনোমৰীর;

ৰারিং যথা ঘম্মনি ঘম্মতত্তো, ৰাচাভিকঙ্খামি সুতং পৰস্স [সুতস্স ৰস্স (স্যা.)].

৩৫৬. ‘‘যদত্থিকং [যদত্থিযং (পী.), যদত্থিতং (ক.)] ব্রহ্মচরিযং অচরী, কপ্পাযনো কচ্চিস্স তং অমোঘং;

নিব্বাযি সো আদু সউপাদিসেসো, যথা ৰিমুত্তো অহু তং সুণোম’’.

৩৫৭. ‘‘অচ্ছেচ্ছি [অছেজ্জি (ক.)] তণ্হং ইধ নামরূপে, (ইতি ভগৰা)

কণ্হস্স [তণ্হায (ক.)] সোতং দীঘরত্তানুসযিতং;

অতারি জাতিং মরণং অসেসং,’’

ইচ্চব্রৰী ভগৰা পঞ্চসেট্ঠো.

৩৫৮. ‘‘এস সুত্ৰা পসীদামি, ৰচো তে ইসিসত্তম;

অমোঘং কির মে পুট্ঠং, ন মং ৰঞ্চেসি ব্রাহ্মণো.

৩৫৯. ‘‘যথাৰাদী তথাকারী, অহু বুদ্ধস্স সাৰকো;

অচ্ছিদা মচ্চুনো জালং, ততং মাযাৰিনো দল়্হং.

৩৬০. ‘‘অদ্দসা ভগৰা আদিং, উপাদানস্স কপ্পিযো;

অচ্চগা ৰত কপ্পাযনো, মচ্চুধেয্যং সুদুত্তর’’ন্তি.

নিগ্রোধকপ্পসুত্তং দ্ৰাদসমং নিট্ঠিতং.