১. রতনসুত্তং

২২৪. যানীধ ভূতানি সমাগতানি, ভুম্মানি [ভূমানি (ক.)] ৰা যানি ৰ অন্তলিক্খে;

সব্বেৰ ভূতা সুমনা ভৰন্তু, অথোপি সক্কচ্চ সুণন্তু ভাসিতং.

২২৫. তস্মা হি ভূতা নিসামেথ সব্বে, মেত্তং করোথ মানুসিযা পজায;

দিৰা চ রত্তো চ হরন্তি যে বলিং, তস্মা হি নে রক্খথ অপ্পমত্তা.

২২৬. যং কিঞ্চি ৰিত্তং ইধ ৰা হুরং ৰা, সগ্গেসু ৰা যং রতনং পণীতং;

ন নো সমং অত্থি তথাগতেন, ইদম্পি বুদ্ধে রতনং পণীতং;

এতেন সচ্চেন সুৰত্থি হোতু.

২২৭. খযং ৰিরাগং অমতং পণীতং, যদজ্ঝগা সক্যমুনী সমাহিতো;

ন তেন ধম্মেন সমত্থি কিঞ্চি, ইদম্পি ধম্মে রতনং পণীতং;

এতেন সচ্চেন সুৰত্থি হোতু.

২২৮. যং বুদ্ধসেট্ঠো পরিৰণ্ণযী সুচিং, সমাধিমানন্তরিকঞ্ঞমাহু;

সমাধিনা তেন সমো ন ৰিজ্জতি, ইদম্পি ধম্মে রতনং পণীতং;

এতেন সচ্চেন সুৰত্থি হোতু.

২২৯. যে পুগ্গলা অট্ঠ সতং পসত্থা, চত্তারি এতানি যুগানি হোন্তি;

তে দক্খিণেয্যা সুগতস্স সাৰকা, এতেসু দিন্নানি মহপ্ফলানি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩০. যে সুপ্পযুত্তা মনসা দল়্হেন, নিক্কামিনো গোতমসাসনম্হি;

তে পত্তিপত্তা অমতং ৰিগয্হ, লদ্ধা মুধা নিব্বুতিং [নিব্বুতি (ক.)] ভুঞ্জমানা;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩১. যথিন্দখীলো পথৰিস্সিতো [পদৰিস্সিতো (ক. সী.), পঠৰিং সিতো (ক. সী. স্যা. কং. পী.)] সিযা, চতুব্ভি ৰাতেহি অসম্পকম্পিযো;

তথূপমং সপ্পুরিসং ৰদামি, যো অরিযসচ্চানি অৰেচ্চ পস্সতি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩২. যে অরিযসচ্চানি ৰিভাৰযন্তি, গম্ভীরপঞ্ঞেন সুদেসিতানি;

কিঞ্চাপি তে হোন্তি ভুসং পমত্তা, ন তে ভৰং অট্ঠমমাদিযন্তি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩৩. সহাৰস্স দস্সনসম্পদায [সহাৰসদ্দস্সনসম্পদায (ক.)], তযস্সু ধম্মা জহিতা ভৰন্তি;

সক্কাযদিট্ঠি ৰিচিকিচ্ছিতঞ্চ, সীলব্বতং ৰাপি যদত্থি কিঞ্চি.

২৩৪. চতূহপাযেহি চ ৰিপ্পমুত্তো, ছচ্চাভিঠানানি [ছ চাভিঠানানি (সী. স্যা.)] ভব্ব কাতুং [অভব্বো কাতুং (সী.)];

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩৫. কিঞ্চাপি সো কম্ম [কম্মং (সী. স্যা. কং. পী.)] করোতি পাপকং, কাযেন ৰাচা উদ চেতসা ৰা;

অভব্ব [অভব্বো (বহূসু)] সো তস্স পটিচ্ছদায [পটিচ্ছাদায (সী.)], অভব্বতা দিট্ঠপদস্স ৰুত্তা;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩৬. ৰনপ্পগুম্বে যথ [যথা (সী. স্যা.)] ফুস্সিতগ্গে, গিম্হানমাসে পঠমস্মিং [পঠমস্মি (?)] গিম্হে;

তথূপমং ধম্মৰরং অদেসযি [অদেসযী (সী.)], নিব্বানগামিং পরমং হিতায;

ইদম্পি বুদ্ধে রতনং পণীতং, এতেন সচ্চেন সুৰত্থি হোতু.

২৩৭. ৰরো ৰরঞ্ঞূ ৰরদো ৰরাহরো, অনুত্তরো ধম্মৰরং অদেসযি;

ইদম্পি বুদ্ধে রতনং পণীতং, এতেন সচ্চেন সুৰত্থি হোতু.

২৩৮. খীণং পুরাণং নৰ নত্থি সম্ভৰং, ৰিরত্তচিত্তাযতিকে ভৰস্মিং;

তে খীণবীজা অৰিরূল়্হিছন্দা, নিব্বন্তি ধীরা যথাযং [যথযং (ক.)] পদীপো;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

২৩৯. যানীধ ভূতানি সমাগতানি, ভুম্মানি ৰা যানি ৰ অন্তলিক্খে;

তথাগতং দেৰমনুস্সপূজিতং, বুদ্ধং নমস্সাম সুৰত্থি হোতু.

২৪০. যানীধ ভূতানি সমাগতানি, ভুম্মানি ৰা যানি ৰ অন্তলিক্খে;

তথাগতং দেৰমনুস্সপূজিতং, ধম্মং নমস্সাম সুৰত্থি হোতু.

২৪১. যানীধ ভূতানি সমাগতানি, ভুম্মানি ৰা যানি ৰ অন্তলিক্খে;

তথাগতং দেৰমনুস্সপূজিতং, সঙ্ঘং নমস্সাম সুৰত্থি হোতূতি.

রতনসুত্তং পঠমং নিট্ঠিতং.