২. আমগন্ধসুত্তং

২৪২. ‘‘সামাকচিঙ্গূলকচীনকানি চ, পত্তপ্ফলং মূলফলং গৰিপ্ফলং;

ধম্মেন লদ্ধং সতমস্নমানা [সতমসমানা (সী. পী.), সতমস্সমানা (স্যা. কং.)], ন কামকামা অলিকং ভণন্তি.

২৪৩. ‘‘যদস্নমানো সুকতং সুনিট্ঠিতং, পরেহি দিন্নং পযতং পণীতং;

সালীনমন্নং পরিভুঞ্জমানো, সো ভুঞ্জসী কস্সপ আমগন্ধং.

২৪৪. ‘‘ন আমগন্ধো মম কপ্পতীতি, ইচ্চেৰ ত্ৰং ভাসসি ব্রহ্মবন্ধু;

সালীনমন্নং পরিভুঞ্জমানো, সকুন্তমংসেহি সুসঙ্খতেহি;

পুচ্ছামি তং কস্সপ এতমত্থং, কথং পকারো তৰ আমগন্ধো’’.

২৪৫. ‘‘পাণাতিপাতো ৰধছেদবন্ধনং, থেয্যং মুসাৰাদো নিকতিৰঞ্চনানি চ;

অজ্ঝেনকুত্তং [অজ্ঝেন কুজ্জং (সী. পী.)] পরদারসেৰনা, এসামগন্ধো ন হি মংসভোজনং.

২৪৬. ‘‘যে ইধ কামেসু অসঞ্ঞতা জনা, রসেসু গিদ্ধা অসুচিভাৰমস্সিতা [অসুচীকমিস্সিতা (সী. স্যা. কং. পী.)];

নত্থিকদিট্ঠী ৰিসমা দুরন্নযা, এসামগন্ধো ন হি মংসভোজনং.

২৪৭. ‘‘যে লূখসা দারুণা পিট্ঠিমংসিকা [যে লূখরসা দারুণা পরপিট্ঠিমংসিকা (ক.)], মিত্তদ্দুনো নিক্করুণাতিমানিনো;

অদানসীলা ন চ দেন্তি কস্সচি, এসামগন্ধো ন হি মংসভোজনং.

২৪৮. ‘‘কোধো মদো থম্ভো পচ্চুপট্ঠাপনা [পচ্চুট্ঠাপনা চ (সী. স্যা.), পচ্চুট্ঠাপনা (পী.)], মাযা উসূযা ভস্সসমুস্সযো চ;

মানাতিমানো চ অসব্ভি সন্থৰো, এসামগন্ধো ন হি মংসভোজনং.

২৪৯. ‘‘যে পাপসীলা ইণঘাতসূচকা, ৰোহারকূটা ইধ পাটিরূপিকা [পাতিরূপিকা (?)];

নরাধমা যেধ করোন্তি কিব্বিসং, এসামগন্ধো ন হি মংসভোজনং.

২৫০. ‘‘যে ইধ পাণেসু অসঞ্ঞতা জনা, পরেসমাদায ৰিহেসমুয্যুতা;

দুস্সীললুদ্দা ফরুসা অনাদরা, এসামগন্ধো ন হি মংসভোজনং.

২৫১. ‘‘এতেসু গিদ্ধা ৰিরুদ্ধাতিপাতিনো, নিচ্চুয্যুতা পেচ্চ তমং ৰজন্তি যে;

পতন্তি সত্তা নিরযং অৰংসিরা, এসামগন্ধো ন হি মংসভোজনং.

২৫২. ‘‘ন মচ্ছমংসানমনাসকত্তং [ন মচ্ছমংসং ন অনাসকত্তং (সী. অট্ঠ মূলপাঠো), ন মংচ্ছমংসানানাসকত্তং (স্যা. ক.)], ন নগ্গিযং ন মুণ্ডিযং জটাজল্লং;

খরাজিনানি নাগ্গিহুত্তস্সুপসেৰনা, যে ৰাপি লোকে অমরা বহূ তপা;

মন্তাহুতী যঞ্ঞমুতূপসেৰনা, সোধেন্তি মচ্চং অৰিতিণ্ণকঙ্খং.

২৫৩. ‘‘যো তেসু [সোতেসু (সী. পী.)] গুত্তো ৰিদিতিন্দ্রিযো চরে, ধম্মে ঠিতো অজ্জৰমদ্দৰে রতো;

সঙ্গাতিগো সব্বদুক্খপ্পহীনো, ন লিপ্পতি [ন লিম্পতি (স্যা. কং ক.)] দিট্ঠসুতেসু ধীরো’’.

২৫৪. ইচ্চেতমত্থং ভগৰা পুনপ্পুনং, অক্খাসি নং [তং (সী. পী.)] ৰেদযি মন্তপারগূ;

চিত্রাহি গাথাহি মুনী পকাসযি, নিরামগন্ধো অসিতো দুরন্নযো.

২৫৫. সুত্ৰান বুদ্ধস্স সুভাসিতং পদং, নিরামগন্ধং সব্বদুক্খপ্পনূদনং;

নীচমনো ৰন্দি তথাগতস্স, তত্থেৰ পব্বজ্জমরোচযিত্থাতি.

আমগন্ধসুত্তং দুতিযং নিট্ঠিতং.