১১. সুত্তপেতৰত্থু

৩৪১. ‘‘অহং পুরে পব্বজিতস্স ভিক্খুনো, সুত্তং অদাসিং উপসঙ্কম্ম যাচিতা;

তস্স ৰিপাকো ৰিপুলফলূপলব্ভতি, বহুকা চ মে উপ্পজ্জরে [বহূ চ মে উপপজ্জরে (সী.)] ৰত্থকোটিযো.

৩৪২. ‘‘পুপ্ফাভিকিণ্ণং রমিতং [রম্মমিদং (ক.)] ৰিমানং, অনেকচিত্তং নরনারিসেৰিতং;

সাহং ভুঞ্জামি চ পারুপামি চ, পহূতৰিত্তা ন চ তাৰ খীযতি.

৩৪৩. ‘‘তস্সেৰ কম্মস্স ৰিপাকমন্ৰযা, সুখঞ্চ সাতঞ্চ ইধূপলব্ভতি;

সাহং গন্ত্ৰা পুনদেৰ মানুসং, কাহামি পুঞ্ঞানি নযয্যপুত্ত ম’’ন্তি.

৩৪৪. ‘‘সত্ত তুৰং ৰস্সসতা ইধাগতা,

জিণ্ণা চ ৰুড্ঢা চ তহিং ভৰিস্সসি;

সব্বেৰ তে কালকতা চ ঞাতকা,

কিং তত্থ গন্ত্ৰান ইতো করিস্সসী’’তি.

৩৪৫. ‘‘সত্তেৰ ৰস্সানি ইধাগতায মে, দিব্বঞ্চ সুখঞ্চ সমপ্পিতায;

সাহং গন্ত্ৰান পুনদেৰ মানুসং, কাহামি পুঞ্ঞানি নযয্যপুত্ত ম’’ন্তি.

৩৪৬. সো তং গহেত্ৰান পসয্হ বাহাযং, পচ্চানযিত্ৰান থেরিং সুদুব্বলং;

‘‘ৰজ্জেসি অঞ্ঞম্পি জনং ইধাগতং, ‘করোথ পুঞ্ঞানি সুখূপলব্ভতি’’.

৩৪৭. ‘‘দিট্ঠা মযা অকতেন সাধুনা, পেতা ৰিহঞ্ঞন্তি তথেৰ মনুস্সা;

কম্মঞ্চ কত্ৰা সুখৰেদনীযং, দেৰা মনুস্সা চ সুখে ঠিতা পজা’’তি.

সুত্তপেতৰত্থু একাদসমং.