১২. কণ্ণমুণ্ডপেতিৰত্থু

৩৪৮. ‘‘সোণ্ণসোপানফলকা, সোণ্ণৰালুকসন্থতা;

তত্থ সোগন্ধিযা ৰগ্গূ, সুচিগন্ধা মনোরমা.

৩৪৯. ‘‘নানারুক্খেহি সঞ্ছন্না, নানাগন্ধসমেরিতা;

নানাপদুমসঞ্ছন্না, পুণ্ডরীকসমোততা [সমোহতা (ক.)].

৩৫০. ‘‘সুরভিং সম্পৰাযন্তি, মনুঞ্ঞা মালুতেরিতা;

হংসকোঞ্চাভিরুদা চ, চক্কৰক্কাভিকূজিতা.

৩৫১. ‘‘নানাদিজগণাকিণ্ণা, নানাসরগণাযুতা;

নানাফলধরা রুক্খা, নানাপুপ্ফধরা ৰনা.

৩৫২. ‘‘ন মনুস্সেসু ঈদিসং, নগরং যাদিসং ইদং;

পাসাদা বহুকা তুয্হং, সোৰণ্ণরূপিযামযা;

দদ্দল্লমানা আভেন্তি [আভন্তি (ক.)], সমন্তা চতুরো দিসা.

৩৫৩. ‘‘পঞ্চ দাসিসতা তুয্হং, যা তেমা পরিচারিকা;

তা [কা (ক.)] কম্বুকাযূরধরা [কম্বুকেযূরধরা (সী.)], কঞ্চনাৰেল়ভূসিতা.

৩৫৪. ‘‘পল্লঙ্কা বহুকা তুয্হং, সোৰণ্ণরূপিযামযা;

কদলিমিগসঞ্ছন্না [কাদলিমিগসঞ্ছন্না (সী.)], সজ্জা গোনকসন্থতা.

৩৫৫. ‘‘যত্থ ত্ৰং ৰাসূপগতা, সব্বকামসমিদ্ধিনী;

সম্পত্তাযড্ঢরত্তায [… রত্তিযা (ক.)], ততো উট্ঠায গচ্ছসি.

৩৫৬. ‘‘উয্যানভূমিং গন্ত্ৰান, পোক্খরঞ্ঞা সমন্ততো;

তস্সা তীরে তুৰং ঠাসি, হরিতে সদ্দলে সুভে.

৩৫৭. ‘‘ততো তে কণ্ণমুণ্ডো সুনখো, অঙ্গমঙ্গানি খাদতি;

যদা চ খাযিতা আসি, অট্ঠিসঙ্খলিকা কতা;

ওগাহসি পোক্খরণিং, হোতি কাযো যথা পুরে.

৩৫৮. ‘‘ততো ত্ৰং অঙ্গপচ্চঙ্গী [অঙ্গপচ্চঙ্গা (ক.)], সুচারু পিযদস্সনা;

ৰত্থেন পারুপিত্ৰান, আযাসি মম সন্তিকং.

৩৫৯. ‘‘কিং নু কাযেন ৰাচায, মনসা দুক্কটং কতং;

কিস্স কম্মৰিপাকেন, কণ্ণমুণ্ডো সুনখো তৰঅঙ্গমঙ্গানি খাদতী’’তি.

৩৬০. ‘‘কিমিলাযং [কিম্বিলাযং (সী. স্যা.)] গহপতি, সদ্ধো আসি উপাসকো;

তস্সাহং ভরিযা আসিং, দুস্সীলা অতিচারিনী.

৩৬১. ‘‘সো মং অতিচরমানায [এৰমাতিচরমানায (স্যা. পী.)], সামিকো এতদব্রৰি;

‘নেতং ছন্নং [নেতং ছন্নং ন (সী.), নেতং ছন্নং নেতং (ক.)] পতিরূপং, যং ত্ৰং অতিচরাসি মং’.

৩৬২. ‘‘সাহং ঘোরঞ্চ সপথং, মুসাৰাদঞ্চ ভাসিসং;

‘নাহং তং অতিচরামি, কাযেন উদ চেতসা.

৩৬৩. ‘‘‘সচাহং তং অতিচরামি, কাযেন উদ চেতসা;

কণ্ণমুণ্ডো যং সুনখো, অঙ্গমঙ্গানি খাদতু’.

৩৬৪. ‘‘তস্স কম্মস্স ৰিপাকং, মুসাৰাদস্স চূভযং;

সত্তেৰ ৰস্সসতানি, অনুভূতং যতো হি মে;

কণ্ণমুণ্ডো চ সুনখো, অঙ্গমঙ্গানি খাদতি.

৩৬৫. ‘‘ত্ৰঞ্চ দেৰ বহুকারো, অত্থায মে ইধাগতো;

সুমুত্তাহং কণ্ণমুণ্ডস্স, অসোকা অকুতোভযা.

৩৬৬. ‘‘তাহং দেৰ নমস্সামি, যাচামি পঞ্জলীকতা;

ভুঞ্জ অমানুসে কামে, রম দেৰ মযা সহা’’তি.

৩৬৭. ‘‘ভুত্তা অমানুসা কামা, রমিতোম্হি তযা সহ;

তাহং সুভগে যাচামি, খিপ্পং পটিনযাহি ম’’ন্তি.

কণ্ণমুণ্ডপেতিৰত্থু দ্ৰাদসমং.