১. সংসারমোচকপেতিৰত্থু

৯৫. ‘‘নগ্গা দুব্বণ্ণরূপাসি, কিসা ধমনিসন্থতা;

উপ্ফাসুলিকে [উপ্পাসুল়িকে (ক.)] কিসিকে, কা নু ত্ৰং ইধ তিট্ঠসী’’তি.

৯৬. ‘‘অহং ভদন্তে পেতীম্হি, দুগ্গতা যমলোকিকা;

পাপকম্মং করিত্ৰান, পেতলোকং ইতো গতা’’তি.

৯৭. ‘‘কিং নু কাযেন ৰাচায, মনসা দুক্কটং কতং;

কিস্স কম্মৰিপাকেন, পেতলোকং ইতো গতা’’তি.

৯৮. ‘‘অনুকম্পকা ময্হং নাহেসুং ভন্তে, পিতা চ মাতা অথৰাপি ঞাতকা;

যে মং নিযোজেয্যুং দদাহি দানং, পসন্নচিত্তা সমণব্রাহ্মণানং.

৯৯. ‘‘ইতো অহং ৰস্সসতানি পঞ্চ, যং এৰরূপা ৰিচরামি নগ্গা;

খুদায তণ্হায চ খজ্জমানা, পাপস্স কম্মস্স ফলং মমেদং.

১০০. ‘‘ৰন্দামি তং অয্য পসন্নচিত্তা, অনুকম্প মং ৰীর মহানুভাৰ;

দত্ৰা চ মে আদিস যং হি কিঞ্চি, মোচেহি মং দুগ্গতিযা ভদন্তে’’তি.

১০১. সাধূতি সো পটিস্সুত্ৰা, সারিপুত্তোনুকম্পকো;

ভিক্খূনং আলোপং দত্ৰা, পাণিমত্তঞ্চ চোল়কং;

থালকস্স চ পানীযং, তস্সা দক্খিণমাদিসি.

১০২. সমনন্তরানুদ্দিট্ঠে, ৰিপাকো উদপজ্জথ;

ভোজনচ্ছাদনপানীযং, দক্খিণায ইদং ফলং.

১০৩. ততো সুদ্ধা সুচিৰসনা, কাসিকুত্তমধারিনী;

ৰিচিত্তৰত্থাভরণা, সারিপুত্তং উপসঙ্কমি.

১০৪. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১০৫. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১০৬. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১০৭. ‘‘উপ্পণ্ডুকিং কিসং ছাতং, নগ্গং সম্পতিতচ্ছৰিং [আপতিতচ্ছৰিং (সী.)];

মুনি কারুণিকো লোকে, তং মং অদ্দক্খি দুগ্গতং.

১০৮. ‘‘ভিক্খূনং আলোপং দত্ৰা, পাণিমত্তঞ্চ চোল়কং;

থালকস্স চ পানীযং, মম দক্খিণমাদিসি.

১০৯. ‘‘আলোপস্স ফলং পস্স, ভত্তং ৰস্সসতং দস;

ভুঞ্জামি কামকামিনী, অনেকরসব্যঞ্জনং.

১১০. ‘‘পাণিমত্তস্স চোল়স্স, ৰিপাকং পস্স যাদিসং;

যাৰতা নন্দরাজস্স, ৰিজিতস্মিং পটিচ্ছদা.

১১১. ‘‘ততো বহুতরা ভন্তে, ৰত্থানচ্ছাদনানি মে;

কোসেয্যকম্বলীযানি, খোমকপ্পাসিকানি চ.

১১২. ‘‘ৰিপুলা চ মহগ্ঘা চ, তেপাকাসেৰলম্বরে;

সাহং তং পরিদহামি, যং যং হি মনসো পিযং.

১১৩. ‘‘থালকস্স চ পানীযং, ৰিপাকং পস্স যাদিসং;

গম্ভীরা চতুরস্সা চ, পোক্খরঞ্ঞো সুনিম্মিতা.

১১৪. ‘‘সেতোদকা সুপ্পতিত্থা, সীতা অপ্পটিগন্ধিযা;

পদুমুপ্পলসঞ্ছন্না, ৰারিকিঞ্জক্খপূরিতা.

১১৫. ‘‘সাহং রমামি কীল়ামি, মোদামি অকুতোভযা;

মুনিং কারুণিকং লোকে, ভন্তে ৰন্দিতুমাগতা’’তি.

সংসারমোচকপেতিৰত্থু পঠমং.