২. সারিপুত্তত্থেরমাতুপেতিৰত্থু

১১৬. ‘‘নগ্গা দুব্বণ্ণরূপাসি, কিসা ধমনিসন্থতা;

উপ্ফাসুলিকে কিসিকে, কা নু ত্ৰং ইধ তিট্ঠসি’’.

১১৭. ‘‘অহং তে সকিযা মাতা, পুব্বে অঞ্ঞাসু জাতীসু;

উপপন্না পেত্তিৰিসযং, খুপ্পিপাসসমপ্পিতা.

১১৮. ‘‘ছড্ডিতং খিপিতং খেল়ং, সিঙ্ঘাণিকং সিলেসুমং;

ৰসঞ্চ ডয্হমানানং, ৰিজাতানঞ্চ লোহিতং.

১১৯. ‘‘ৰণিকানঞ্চ যং ঘান-সীসচ্ছিন্নান লোহিতং;

খুদাপরেতা ভুঞ্জামি, ইত্থিপুরিসনিস্সিতং.

১২০. ‘‘পুব্বলোহিতং ভক্খামি [পুব্বলোহিতভক্খাস্মি (সী.)], পসূনং মানুসান চ;

অলেণা অনগারা চ, নীলমঞ্চপরাযণা.

১২১. ‘‘দেহি পুত্তক মে দানং, দত্ৰা অন্ৰাদিসাহি মে;

অপ্পেৰ নাম মুচ্চেয্যং, পুব্বলোহিতভোজনা’’তি.

১২২. মাতুযা ৰচনং সুত্ৰা, উপতিস্সোনুকম্পকো;

আমন্তযি মোগ্গল্লানং, অনুরুদ্ধঞ্চ কপ্পিনং.

১২৩. চতস্সো কুটিযো কত্ৰা, সঙ্ঘে চাতুদ্দিসে অদা;

কুটিযো অন্নপানঞ্চ, মাতু দক্খিণমাদিসী.

১২৪. সমনন্তরানুদ্দিট্ঠে, ৰিপাকো উদপজ্জথ;

ভোজনং পানীযং ৰত্থং, দক্খিণায ইদং ফলং.

১২৫. ততো সুদ্ধা সুচিৰসনা, কাসিকুত্তমধারিনী;

ৰিচিত্তৰত্থাভরণা, কোলিতং উপসঙ্কমি.

১২৬. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১২৭. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১২৮. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১২৯. ‘‘সারিপুত্তস্সাহং মাতা, পুব্বে অঞ্ঞাসু জাতীসু;

উপপন্না পেত্তিৰিসযং, খুপ্পিপাসসমপ্পিতা.

১৩০. ‘‘ছড্ডিতং খিপিতং খেল়ং, সিঙ্ঘাণিকং সিলেসুমং;

ৰসঞ্চ ডয্হমানানং, ৰিজাতানঞ্চ লোহিতং.

১৩১. ‘‘ৰণিকানঞ্চ যং ঘান-সীসচ্ছিন্নান লোহিতং;

খুদাপরেতা ভুঞ্জামি, ইত্থিপুরিসনিস্সিতং.

১৩২. ‘‘পুব্বলোহিতং ভক্খিস্সং, পসূনং মানুসান চ;

অলেণা অনগারা চ, নীলমঞ্চপরাযণা.

১৩৩. ‘‘সারিপুত্তস্স দানেন, মোদামি অকুতোভযা;

মুনিং কারুণিকং লোকে, ভন্তে ৰন্দিতুমাগতা’’তি.

সারিপুত্তত্থেরস্স মাতুপেতিৰত্থু দুতিযং.