৫. অগদঙ্গপঞ্হো

৫. ‘‘ভন্তে নাগসেন, ‘অগদস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি. ‘‘যথা, মহারাজ, অগদে কিমী ন সণ্ঠহন্তি, এৰমেৰ খো, মহারাজ, যোগিনা যোগাৰচরেন মানসে কিলেসা ন সণ্ঠপেতব্বা. ইদং, মহারাজ, অগদস্স পঠমং অঙ্গং গহেতব্বং.

‘‘পুন চপরং, মহারাজ, অগদো দট্ঠফুট্ঠদিট্ঠঅসিতপীতখাযিতসাযিতং সব্বং ৰিসং পটিহনতি, এৰমেৰ খো, মহারাজ, যোগিনা যোগাৰচরেন রাগদোসমোহমানদিট্ঠিৰিসং সব্বং পটিহনিতব্বং. ইদং, মহারাজ, অগদস্স দুতিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন –

‘‘‘সঙ্খারানং সভাৰত্থং, দট্ঠুকামেন যোগিনা;

অগদেনেৰ হোতব্বং, কিলেসৰিসনাসনে’’’তি.

অগদঙ্গপঞ্হো পঞ্চমো.