৭. কুম্ভৰগ্গো

১. কুম্ভঙ্গপঞ্হো

১. ‘‘ভন্তে নাগসেন, ‘কুম্ভস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কুম্ভো সম্পুণ্ণো ন সণতি, এৰমেৰ খো, মহারাজ, যোগিনা যোগাৰচরেন আগমে অধিগমে পরিযত্তিযং সামঞ্ঞে পারমিং পত্ৰা ন সণিতব্বং, ন তেন মানো করণীযো, ন দব্বো [দপ্পো (সী.)] দস্সেতব্বো, নিহতমানেন নিহতদব্বেন ভৰিতব্বং, উজুকেন অমুখরেন অৰিকত্থিনা. ইদং, মহারাজ, কুম্ভস্স একং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সুত্তনিপাতে –

‘‘‘যদূনকং তং সণতি, যং পূরং সন্তমেৰ তং;

অড্ঢকুম্ভূপমো [রিত্তকুম্ভূপমো (সী.)] বালো, রহদো পূরোৰ পণ্ডিতো’’’তি.

কুম্ভঙ্গপঞ্হো পঠমো.

২. কাল়াযসঙ্গপঞ্হো

২. ‘‘ভন্তে নাগসেন, ‘কাল়াযসস্স [কাল়হংসস্স (ক.)] দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, কাল়াযসো সুপীতো [সুথিতো (ক.)] ৰমতি [ৰহতি (স্যা. ক.)], এৰমেৰ খো, মহারাজ, যোগিনো যোগাৰচরস্স মানসং যোনিসো মনসিকারেন [যোনিসো মনসিকারে (সী. স্যা. ক.)] অপীতং ৰমতি. ইদং, মহারাজ, কাল়াযসস্স পঠমং অঙ্গং গহেতব্বং.

‘‘পুন চপরং, মহারাজ, কাল়াযসো সকিং পীতং উদকং ন ৰমতি, এৰমেৰ খো, মহারাজ, যোগিনা যোগাৰচরেন যো সকিং উপ্পন্নো পসাদো, ন পুন সো ৰমিতব্বো ‘উল়ারো সো ভগৰা সম্মাসম্বুদ্ধো, স্ৰাক্খাতো ধম্মো, সুপ্পটিপন্নো সঙ্ঘো’তি. ‘রূপং অনিচ্চং, ৰেদনা অনিচ্চা, সঞ্ঞা অনিচ্চা, সঙ্খারা অনিচ্চা, ৰিঞ্ঞাণং অনিচ্চন্তি যং সকিং উপ্পন্নং ঞাণং, ন পুন তং ৰমিতব্বং. ইদং, মহারাজ, কাল়াযসস্স দুতিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন –

‘‘‘দস্সনম্হি পরিসোধিতো [পরিসোধিকে (সী. ক.)] নরো, অরিযধম্মে নিযতো ৰিসেসগূ;

নপ্পৰেধতি অনেকভাগসো, সব্বসো চ মুখভাৰমেৰ সো’’’তি.

কাল়াযসঙ্গপঞ্হো দুতিযো.

৩. ছত্তঙ্গপঞ্হো

৩. ‘‘ভন্তে নাগসেন, ‘ছত্তস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, ছত্তং উপরি মুদ্ধনি চরতি, এৰমেৰ খো, মহারাজ, যোগিনা যোগাৰচরেন কিলেসানং উপরি মুদ্ধনি চরেন ভৰিতব্বং. ইদং, মহারাজ, ছত্তস্স পঠমং অঙ্গং গহেতব্বং.

‘‘পুন চপরং, মহারাজ, ছত্তং মুদ্ধনুপত্থম্ভং হোতি, এৰমেৰ খো, মহারাজ, যোগিনা যোগাৰচরেন যোনিসো মনসিকারুপত্থম্ভেন ভৰিতব্বং. ইদং, মহারাজ, ছত্তস্স দুতিযং অঙ্গং গহেতব্বং.

‘‘পুন চপরং, মহারাজ, ছত্তং ৰাতাতপমেঘৰুট্ঠিযো পটিহনতি, এৰমেৰ খো, মহারাজ, যোগিনা যোগাৰচরেন নানাৰিধদিট্ঠিপুথুসমণব্রাহ্মণানং [মহাৰাত (ক.)] মতৰাততিৰিধগ্গিসন্তাপকিলেসৰুট্ঠিযো পটিহন্তব্বা. ইদং, মহারাজ, ছত্তস্স ততিযং অঙ্গং গহেতব্বং. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –

‘‘‘যথাপি ছত্তং ৰিপুলং, অচ্ছিদ্দং থিরসংহিতং;

ৰাতাতপং নিৰারেতি, মহতী মেঘৰুট্ঠিযো.

‘‘‘তথেৰ বুদ্ধপুত্তোপি, সীলছত্তধরো সুচি;

কিলেসৰুট্ঠিং ৰারেতি, সন্তাপতিৰিধগ্গযো’’’তি.

ছত্তঙ্গপঞ্হো ততিযো.

৪. খেত্তঙ্গপঞ্হো

৪. ‘‘ভন্তে নাগসেন, ‘খেত্তস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, খেত্তং মাতিকাসম্পন্নং হোতি, এৰমেৰ খো, মহারাজ, যোগিনা যোগাৰচরেন সুচরিতৰত্তপ্পটিৰত্তমাতিকাসম্পন্নেন ভৰিতব্বং. ইদং, মহারাজ, খেত্তস্স পঠমং অঙ্গং গহেতব্বং.

‘‘পুন চপরং, মহারাজ, খেত্তং মরিযাদাসম্পন্নং হোতি, তায চ মরিযাদায উদকং রক্খিত্ৰা ধঞ্ঞং পরিপাচেতি, এৰমেৰ খো, মহারাজ, যোগিনা যোগাৰচরেন সীলহিরিমরিযাদাসম্পন্নেন ভৰিতব্বং, তায চ সীলহিরিমরিযাদায সামঞ্ঞং রক্খিত্ৰা চত্তারি সামঞ্ঞফলানি গহেতব্বানি. ইদং, মহারাজ, খেত্তস্স দুতিযং অঙ্গং গহেতব্বং.

‘‘পুন চপরং, মহারাজ, খেত্তং উট্ঠানসম্পন্নং হোতি, কস্সকস্স হাসজনকং অপ্পম্পি বীজং ৰুত্তং বহু হোতি, বহু ৰুত্তং বহুতরং হোতি, এৰমেৰ খো, মহারাজ, যোগিনা যোগাৰচরেন উট্ঠানসম্পন্নেন ৰিপুলফলদাযিনা ভৰিতব্বং, দাযকানং হাসজনকেন ভৰিতব্বং, যথা অপ্পং দিন্নং বহু হোতি, বহু দিন্নং বহুতরং হোতি. ইদং, মহারাজ, খেত্তস্স ততিযং অঙ্গং গহেতব্বং. ভাসিতম্পেতং, মহারাজ, থেরেন উপালিনা ৰিনযধরেন –

‘‘‘খেত্তূপমেন ভৰিতব্বং, উট্ঠানৰিপুলদাযিনা;

এস খেত্তৰরো নাম, যো দদাতি ৰিপুলং ফল’’’ন্তি.

খেত্তঙ্গপঞ্হো চতুত্থো.

৫. অগদঙ্গপঞ্হো

৫. ‘‘ভন্তে নাগসেন, ‘অগদস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি. ‘‘যথা, মহারাজ, অগদে কিমী ন সণ্ঠহন্তি, এৰমেৰ খো, মহারাজ, যোগিনা যোগাৰচরেন মানসে কিলেসা ন সণ্ঠপেতব্বা. ইদং, মহারাজ, অগদস্স পঠমং অঙ্গং গহেতব্বং.

‘‘পুন চপরং, মহারাজ, অগদো দট্ঠফুট্ঠদিট্ঠঅসিতপীতখাযিতসাযিতং সব্বং ৰিসং পটিহনতি, এৰমেৰ খো, মহারাজ, যোগিনা যোগাৰচরেন রাগদোসমোহমানদিট্ঠিৰিসং সব্বং পটিহনিতব্বং. ইদং, মহারাজ, অগদস্স দুতিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন –

‘‘‘সঙ্খারানং সভাৰত্থং, দট্ঠুকামেন যোগিনা;

অগদেনেৰ হোতব্বং, কিলেসৰিসনাসনে’’’তি.

অগদঙ্গপঞ্হো পঞ্চমো.

৬. ভোজনঙ্গপঞ্হো

৬. ‘‘ভন্তে নাগসেন, ‘ভোজনস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, ভোজনং সব্বসত্তানং উপত্থম্ভো, এৰমেৰ খো, মহারাজ, যোগিনা যোগাৰচরেন সব্বসত্তানং মগ্গুপত্থম্ভেন ভৰিতব্বং. ইদং, মহারাজ, ভোজনস্স পঠমং অঙ্গং গহেতব্বং.

‘‘পুন চপরং, মহারাজ, ভোজনং সব্বসত্তানং বলং ৰড্ঢেতি, এৰমেৰ খো, মহারাজ, যোগিনা যোগাৰচরেন পুঞ্ঞৰড্ঢিযা ৰড্ঢিতব্বং. ইদং, মহারাজ, ভোজনস্স দুতিযং অঙ্গং গহেতব্বং.

‘‘পুন চপরং, মহারাজ, ভোজনং সব্বসত্তানং অভিপত্থিতং, এৰমেৰ খো, মহারাজ, যোগিনা যোগাৰচরেন সব্বলোকাভিপত্থিতেন ভৰিতব্বং. ইদং, মহারাজ, ভোজনস্স ততিযং অঙ্গং গহেতব্বং. ভাসিতম্পেতং, মহারাজ, থেরেন মহামোগ্গল্লানেন –

‘‘‘সংযমেন নিযমেন, সীলেন পটিপত্তিযা;

পত্থিতেন ভৰিতব্বং, সব্বলোকস্স যোগিনা’’’তি.

ভোজনঙ্গপঞ্হো ছট্ঠো.

৭. ইস্সাসঙ্গপঞ্হো

৭. ‘‘ভন্তে নাগসেন, ‘ইস্সাসস্স চত্তারি অঙ্গানি গহেতব্বানী’তি যং ৰদেসি, কতমানি তানি চত্তারি অঙ্গানি গহেতব্বানী’’তি? ‘‘যথা, মহারাজ, ইস্সাসো সরে পাতযন্তো উভো পাদে পথৰিযং দল়্হং পতিট্ঠাপেতি, জণ্ণুঅৰেকল্লং করোতি, সরকলাপং কটিসন্ধিম্হি ঠপেতি, কাযং উপত্থদ্ধং করোতি, দ্ৰে হত্থে সন্ধিট্ঠানং আরোপেতি, মুট্ঠিং পীল়যতি, অঙ্গুলিযো নিরন্তরং করোতি, গীৰং পগ্গণ্হাতি, চক্খূনি মুখঞ্চ পিদহতি, নিমিত্তং উজুং করোতি, হাসমুপ্পাদেতি ‘ৰিজ্ঝিস্সামী’তি, এৰমেৰ খো, মহারাজ, যোগিনা যোগাৰচরেন সীলপথৰিযং ৰীরিযপাদে পতিট্ঠাপেতব্বং, খন্তিসোরচ্চং অৰেকল্লং কাতব্বং, সংৰরে চিত্তং ঠপেতব্বং, সংযমনিযমে অত্তা উপনেতব্বো, ইচ্ছা মুচ্ছা পীল়যিতব্বা, যোনিসো মনসিকারে চিত্তং নিরন্তরং কাতব্বং, ৰীরিযং পগ্গহেতব্বং, ছ দ্ৰারা পিদহিতব্বা, সতি উপট্ঠপেতব্বা, হাসমুপ্পাদেতব্বং ‘সব্বকিলেসে ঞাণনারাচেন ৰিজ্ঝিস্সামী’তি. ইদং, মহারাজ, ইস্সাসস্স পঠমং অঙ্গং গহেতব্বং.

‘‘পুন চপরং, মহারাজ, ইস্সাসো আল়কং পরিহরতি ৰঙ্কজিম্হকুটিলনারাচস্স উজুকরণায. এৰমেৰ খো, মহারাজ, যোগিনা যোগাৰচরেন ইমস্মিং কাযে সতিপট্ঠানআল়কং পরিহরিতব্বং ৰঙ্কজিম্হকুটিলচিত্তস্স উজুকরণায. ইদং, মহারাজ, ইস্সাসস্স দুতিযং অঙ্গং গহেতব্বং.

‘‘পুন চপরং, মহারাজ, ইস্সাসো লক্খে উপাসেতি, এৰমেৰ খো, মহারাজ, যোগিনা যোগাৰচরেন ইমস্মিং কাযে উপাসিতব্বং. কথং মহারাজ যোগিনা যোগাৰচরেন ইমস্মিং কাযে উপাসিতব্বং? অনিচ্চতো উপাসিতব্বং, দুক্খতো উপাসিতব্বং, অনত্ততো উপাসিতব্বং, রোগতো…পে… গণ্ডতো…পে… সল্লতো…পে… অঘতো…পে… আবাধতো…পে… পরতো…পে… পলোকতো…পে… ঈতিতো…পে… উপদ্দৰতো…পে… ভযতো…পে… উপসগ্গতো…পে… চলতো…পে… পভঙ্গুতো…পে… অদ্ধুৰতো…পে… অতাণতো…পে… অলেণতো…পে… অসরণতো…পে… রিত্ততো…পে… তুচ্ছতো…পে… সুঞ্ঞতো…পে… আদীনৰতো…পে… ৰিপরিণামধম্মতো…পে… অসারতো …পে… অঘমূলতো…পে… ৰধকতো…পে… ৰিভৰতো…পে… সাসৰতো…পে… সঙ্খততো…পে… মারামিসতো…পে… জাতিধম্মতো…পে… জরাধম্মতো…পে… ব্যাধিধম্মতো…পে… মরণধম্মতো…পে… সোকধম্মতো…পে… পরিদেৰধম্মতো…পে… উপাযাসধম্মতো…পে… সংকিলেসধম্মতো…পে… এৰং খো, মহারাজ, যোগিনা যোগাৰচরেন ইমস্মিং কাযে উপাসিতব্বং. ইদং, মহারাজ, ইস্সাসস্স ততিযং অঙ্গং গহেতব্বং.

‘‘পুন চপরং, মহারাজ, ইস্সাসো সাযং পাতং উপাসতি. এৰমেৰ খো, মহারাজ, যোগিনা যোগাৰচরেন সাযং পাতং আরম্মণে উপাসিতব্বং. ইদং, মহারাজ, ইস্সাসস্স চতুত্থং অঙ্গং গহেতব্বং. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –

‘‘‘যথা ইস্সাসকো নাম, সাযং পাতং উপাসতি;

উপাসনং অরিঞ্চন্তো [ন রিচ্ছন্তো (সী. ক.)], লভতে ভত্তৰেতনং.

‘‘‘তথেৰ বুদ্ধপুত্তোপি, করোতি কাযুপাসনং;

কাযুপাসনং অরিঞ্চন্তো, অরহত্তমধিগচ্ছতী’’’তি.

ইস্সাসঙ্গপঞ্হো সত্তমো.

কুম্ভৰগ্গো সত্তমো [ইতো পরং রাজঙ্গপঞ্হাদিকা অট্ঠতিংস পঞ্হা ৰিনট্ঠা, যেহি তা দিট্ঠা,§তেহি নো আরোচেতব্বা পুন মুদ্দাপনকালে পক্খিপনত্থাযাতি (ন, বু, স)].

তস্সুদ্দানং –

কুম্ভো চ কাল়াযসো চ, ছত্তং খেত্তঞ্চ অগদো;

ভোজনেন চ ইস্সাসো, ৰুত্তং দানি ৰিদূহীতি.

ওপম্মকথাপঞ্হো নিট্ঠিতো.