নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

নেত্তিপ্পকরণপাল়ি

১. সঙ্গহৰারো

যং লোকো পূজযতে, সলোকপালো সদা নমস্সতি চ;

তস্সেত সাসনৰরং, ৰিদূহি ঞেয্যং নরৰরস্স.

দ্ৰাদস পদানি সুত্তং, তং সব্বং ব্যঞ্জনঞ্চ অত্থো চ;

তং ৰিঞ্ঞেয্যং উভযং, কো অত্থো ব্যঞ্জনং কতমং.

সোল়সহারা নেত্তি [নেত্তী (ক.)], পঞ্চনযা সাসনস্স পরিযেট্ঠি;

অট্ঠারসমূলপদা, মহকচ্চানেন [মহাকচ্চানেন (সী.)] নিদ্দিট্ঠা.

হারা ব্যঞ্জনৰিচযো, সুত্তস্স নযা তযো চ সুত্তত্থো;

উভযং পরিগ্গহীতং, ৰুচ্চতি সুত্তং যথাসুত্তং.

যা চেৰ দেসনা যঞ্চ, দেসিতং উভযমেৰ ৰিঞ্ঞেয্যং;

তত্রাযমানুপুব্বী, নৰৰিধসুত্তন্তপরিযেট্ঠীতি.

সঙ্গহৰারো.

২. উদ্দেসৰারো

১. তত্থ কতমে সোল়স হারা? দেসনা ৰিচযো যুত্তি পদট্ঠানো লক্খণো চতুব্যূহো আৰট্টো ৰিভত্তি পরিৰত্তনো ৰেৰচনো পঞ্ঞত্তি ওতরণো সোধনো অধিট্ঠানো পরিক্খারো সমারোপনো ইতি.

তস্সানুগীতি

দেসনা ৰিচযো যুত্তি, পদট্ঠানো চ লক্খণো;

চতুব্যূহো চ আৰট্টো, ৰিভত্তি পরিৰত্তনো.

ৰেৰচনো চ পঞ্ঞত্তি, ওতরণো চ সোধনো;

অধিট্ঠানো পরিক্খারো, সমারোপনো সোল়সো [সোল়স (সী.)].

এতে সোল়স হারা, পকিত্তিতা অত্থতো অসংকিণ্ণা;

এতেসঞ্চেৰ ভৰতি, ৰিত্থারতযা নযৰিভত্তীতি.

২. তত্থ কতমে পঞ্চ নযা? নন্দিযাৰট্টো তিপুক্খলো সীহৰিক্কীল়িতো দিসালোচনো অঙ্কুসো ইতি.

তস্সানুগীতি

পঠমো নন্দিযাৰট্টো, দুতিযো চ তিপুক্খলো;

সীহৰিক্কীল়িতো নাম, ততিযো নযলঞ্জকো [নযলঞ্ছকো (সী.)].

দিসালোচনমাহংসু, চতুত্থং নযমুত্তমং;

পঞ্চমো অঙ্কুসো নাম, সব্বে পঞ্চ নযা গতাতি.

৩. তত্থ কতমানি অট্ঠারস মূলপদানি? নৰ পদানি কুসলানি নৰ পদানি অকুসলানি. তত্থ কতমানি নৰ পদানি অকুসলানি, তণ্হা অৰিজ্জা লোভো দোসো মোহো সুভসঞ্ঞা সুখসঞ্ঞা নিচ্চসঞ্ঞা অত্তসঞ্ঞাতি, ইমানি নৰ পদানি অকুসলানি, যত্থ সব্বো অকুসলপক্খো সঙ্গহং সমোসরণং গচ্ছতি.

তত্থ কতমানি নৰ পদানি কুসলানি? সমথো ৰিপস্সনা অলোভো অদোসো অমোহো অসুভসঞ্ঞা দুক্খসঞ্ঞা অনিচ্চসঞ্ঞা অনত্তসঞ্ঞাতি, ইমানি নৰ পদানি কুসলানি, যত্থ সব্বো কুসলপক্খো সঙ্গহং সমোসরণং গচ্ছতি.

তত্রিদং উদ্দানং

তণ্হা চ অৰিজ্জাপি চ, লোভো দোসো তথেৰ মোহো চ;

চতুরো চ ৰিপল্লাসা, কিলেসভূমী নৰ পদানি.

সমথো চ ৰিপস্সনা চ, কুসলানি চ যানি তীণি মূলানি;

চতুরো সতিপট্ঠানা, ইন্দ্রিযভূমী নৰ পদানি.

নৰহি চ পদেহি কুসলা, নৰহি চ যুজ্জন্তি অকুসলপক্খা;

এতে খো মূলপদা, ভৰন্তি অট্ঠারস পদানীতি.

উদ্দেসৰারো.

৩. নিদ্দেসৰারো

৪. তত্থ সঙ্খেপতো নেত্তি কিত্তিতা.

হারসঙ্খেপো

১. অস্সাদাদীনৰতা, নিস্সরণম্পি চ ফলং উপাযো চ;

আণত্তী চ ভগৰতো, যোগীনং দেসনাহারো.

২. যং পুচ্ছিতঞ্চ ৰিস্সজ্জিতঞ্চ, সুত্তস্স যা চ অনুগীতি;

সুত্তস্স যো পৰিচযো, হারো ৰিচযোতি নিদ্দিট্ঠো.

৩. সব্বেসং হারানং, যা ভূমী যো চ গোচরো তেসং;

যুত্তাযুত্তপরিক্খা, হারো যুত্তীতি নিদ্দিট্ঠো.

৪. ধম্মং দেসেতি জিনো, তস্স চ ধম্মস্স যং পদট্ঠানং;

ইতি যাৰ সব্বধম্মা, এসো হারো পদট্ঠানো.

৫. ৰুত্তম্হি একধম্মে, যে ধম্মা একলক্খণা কেচি;

ৰুত্তা ভৰন্তি সব্বে, সো হারো লক্খণো নাম.

৬. নেরুত্তমধিপ্পাযো, ব্যঞ্জনমথ দেসনানিদানঞ্চ;

পুব্বাপরানুসন্ধী, এসো হারো চতুব্যূহো.

৭. একম্হি পদট্ঠানে, পরিযেসতি সেসকং পদট্ঠানং;

আৰট্টতি পটিপক্খে, আৰট্টো নাম সো হারো.

৮. ধম্মঞ্চ পদট্ঠানং, ভূমিঞ্চ ৰিভজ্জতে অযং হারো;

সাধারণে অসাধারণে চ নেয্যো ৰিভত্তীতি.

৯. কুসলাকুসলে ধম্মে, নিদ্দিট্ঠে ভাৰিতে পহীনে চ;

পরিৰত্ততি পটিপক্খে, হারো পরিৰত্তনো নাম.

১০. ৰেৰচনানি বহূনি তু, সুত্তে ৰুত্তানি একধম্মস্স;

যো জানাতি সুত্তৰিদূ, ৰেৰচনো নাম সো হারো.

১১. একং ভগৰা ধম্মং, পঞ্ঞত্তীহি ৰিৰিধাহি দেসেতি;

সো আকারো ঞেয্যো, পঞ্ঞত্তী নাম হারোতি.

১২. যো চ পটিচ্চুপ্পাদো, ইন্দ্রিযখন্ধা চ ধাতু আযতনা;

এতেহি ওতরতি যো, ওতরণো নাম সো হারো.

১৩. ৰিস্সজ্জিতম্হি পঞ্হে, গাথাযং পুচ্ছিতাযমারব্ভ;

সুদ্ধাসুদ্ধপরিক্খা, হারো সো সোধনো নাম.

১৪. একত্ততায ধম্মা, যেপি চ ৰেমত্ততায নিদ্দিট্ঠা;

তেন ৰিকপ্পযিতব্বা, এসো হারো অধিট্ঠানো.

১৫. যে ধম্মা যং ধম্মং, জনযন্তিপ্পচ্চযা পরম্পরতো;

হেতুমৰকড্ঢযিত্ৰা, এসো হারো পরিক্খারো.

১৬. যে ধম্মা যং মূলা, যে চেকত্থা পকাসিতা মুনিনা;

তে সমরোপযিতব্বা, এস সমারোপনো হারো.

নযসঙ্খেপো

১৭. তণ্হঞ্চ অৰিজ্জম্পি চ, সমথেন ৰিপস্সনা যো নেতি;

সচ্চেহি যোজযিত্ৰা, অযং নযো নন্দিযাৰট্টো.

১৮. যো অকুসলে সমূলেহি, নেতি কুসলে চ কুসলমূলেহি;

ভূতং তথং অৰিতথং, তিপুক্খলং তং নযং আহু.

১৯. যো নেতি ৰিপল্লাসেহি, কিলেসে ইন্দ্রিযেহি সদ্ধম্মে;

এতং নযং নযৰিদূ, সীহৰিক্কীল়িতং আহু.

২০. ৰেয্যাকরণেসু হি যে, কুসলাকুসলা তহিং তহিং ৰুত্তা;

মনসা ৰোলোকযতে, তং খু দিসালোচনং আহু.

২১. ওলোকেত্ৰা দিসলোচনেন, উক্খিপিয যং সমানেতি;

সব্বে কুসলাকুসলে, অযং নযো অঙ্কুসো নাম.

২২. সোল়স হারা পঠমং, দিসলোচনতো [দিসলোচনেন (ক.)] দিসা ৰিলোকেত্ৰা;

সঙ্খিপিয অঙ্কুসেন হি, নযেহি তীহি নিদ্দিসে সুত্তং.

দ্ৰাদসপদ

২৩. অক্খরং পদং ব্যঞ্জনং, নিরুত্তি তথেৰ নিদ্দেসো;

আকারছট্ঠৰচনং, এত্তাৰ ব্যঞ্জনং সব্বং.

২৪. সঙ্কাসনা পকাসনা, ৰিৰরণা ৰিভজনুত্তানীকম্মপঞ্ঞত্তি;

এতেহি ছহি পদেহি, অত্থো কম্মঞ্চ নিদ্দিট্ঠং.

২৫. তীণি চ নযা অনূনা, অত্থস্স চ ছপ্পদানি গণিতানি;

নৰহি পদেহি ভগৰতো, ৰচনস্সত্থো সমাযুত্তো.

২৬. অত্থস্স নৰপ্পদানি, ব্যঞ্জনপরিযেট্ঠিযা চতুব্বীস;

উভযং সঙ্কলযিত্ৰা [সঙ্খেপযতো (ক.)], তেত্তিংসা এত্তিকা নেত্তীতি.

নিদ্দেসৰারো.

৪. পটিনিদ্দেসৰারো

১. দেসনাহারৰিভঙ্গো

৫. তত্থ কতমো দেসনাহারো? ‘‘অস্সাদাদীনৰতা’’তি গাথা অযং দেসনাহারো. কিং দেসযতি? অস্সাদং আদীনৰং নিস্সরণং ফলং উপাযং আণত্তিং. ধম্মং ৰো, ভিক্খৰে, দেসেস্সামি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেস্সামীতি.

তত্থ কতমো অস্সাদো?

‘‘কামং [কামমাদিকা ইমা ছ গাথা সু. নি. ৭৭২ পস্সিতব্বা] কামযমানস্স, তস্স চেতং সমিজ্ঝতি;

অদ্ধা পীতিমনো হোতি, লদ্ধা মচ্চো যদিচ্ছতী’’তি.

অযং অস্সাদো.

তত্থ কতমো আদীনৰো?

‘‘তস্স চে কামযানস্স, ছন্দজাতস্স জন্তুনো;

তে কামা পরিহাযন্তি, সল্লৰিদ্ধোৰ রুপ্পতী’’তি.

অযং আদীনৰো.

তত্থ কতমং নিস্সরণং?

‘‘যো কামে পরিৰজ্জেতি, সপ্পস্সেৰ পদা সিরো;

সোমং ৰিসত্তিকং লোকে, সতো সমতিৰত্ততী’’তি.

ইদং নিস্সরণং.

তত্থ কতমো অস্সাদো?

‘‘খেত্তং ৰত্থুং হিরঞ্ঞং ৰা, গৰাস্সং দাসপোরিসং;

থিযো বন্ধূ পুথূ কামে, যো নরো অনুগিজ্ঝতী’’তি.

অযং অস্সাদো.

তত্থ কতমো আদীনৰো?

‘‘অবলা নং বলীযন্তি, মদ্দন্তে নং পরিস্সযা;

ততো নং দুক্খমন্ৰেতি, নাৰং ভিন্নমিৰোদক’’ন্তি.

অযং আদীনৰো.

তত্থ কতমং নিস্সরণং?

‘‘তস্মা জন্তু সদা সতো, কামানি পরিৰজ্জযে;

তে পহায তরে ওঘং, নাৰং সিত্ৰাৰ পারগূ’’তি.

ইদং নিস্সরণং.

তত্থ কতমং ফলং?

‘‘ধম্মো হৰে রক্খতি ধম্মচারিং, ছত্তং মহন্তং যথ ৰস্সকালে;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী’’তি.

ইদং ফলং.

তত্থ কতমো উপাযো?

‘‘সব্বে সঙ্খারা অনিচ্চা’’তি…পে…

‘‘সব্বে সঙ্খারা [পস্স ধ. প. ২৭৭] দুক্খা’’তি…পে…

‘‘সব্বে ধম্মা অনত্তা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা’’তি.

অযং উপাযো.

তত্থ কতমা আণত্তি?

‘‘চক্খুমা [পস্স উদা. ৪৩] ৰিসমানীৰ, ৰিজ্জমানে পরক্কমে;

পণ্ডিতো জীৰলোকস্মিং, পাপানি পরিৰজ্জযে’’তি.

অযং আণত্তি.

‘‘‘সুঞ্ঞতো লোকং অৰেক্খস্সু,

মোঘরাজা’তি আণত্তি, ‘সদা সতো’তি উপাযো;

‘অত্তানুদিট্ঠিং ঊহচ্চ [উহচ্চ (ক.) পস্স সু. নি. ১১২৫], এৰং মচ্চুতরো সিযা’’’.

ইদং ফলং.

৬. তত্থ ভগৰা উগ্ঘটিতঞ্ঞুস্স পুগ্গলস্স নিস্সরণং দেসযতি, ৰিপঞ্চিতঞ্ঞুস্স পুগ্গলস্স আদীনৰঞ্চ নিস্সরণঞ্চ দেসযতি, নেয্যস্স পুগ্গলস্স অস্সাদঞ্চ আদীনৰঞ্চ নিস্সরণঞ্চ দেসযতি.

তত্থ চতস্সো পটিপদা, চত্তারো পুগ্গলা. তণ্হাচরিতো মন্দো সতিন্দ্রিযেন দুক্খায পটিপদায দন্ধাভিঞ্ঞায নিয্যাতি সতিপট্ঠানেহি নিস্সযেহি. তণ্হাচরিতো উদত্তো [উদত্থো (সী.) উ + আ + দা + ত] সমাধিন্দ্রিযেন দুক্খায পটিপদায খিপ্পাভিঞ্ঞায নিয্যাতি ঝানেহি নিস্সযেহি. দিট্ঠিচরিতো মন্দো ৰীরিযিন্দ্রিযেন সুখায পটিপদায দন্ধাভিঞ্ঞায নিয্যাতি সম্মপ্পধানেহি নিস্সযেহি. দিট্ঠিচরিতো উদত্তো পঞ্ঞিন্দ্রিযেন সুখায পটিপদায খিপ্পাভিঞ্ঞায নিয্যাতি সচ্চেহি নিস্সযেহি.

উভো তণ্হাচরিতা সমথপুব্বঙ্গমায ৰিপস্সনা নিয্যন্তি রাগৰিরাগায চেতোৰিমুত্তিযা. উভো দিট্ঠিচরিতা ৰিপস্সনাপুব্বঙ্গমে সমথেন নিয্যন্তি অৰিজ্জাৰিরাগায পঞ্ঞাৰিমুত্তিযা.

তত্থ যে সমথপুব্বঙ্গমাহি পটিপদাহি নিয্যন্তি, তে নন্দিযাৰট্টেন নযেন হাতব্বা, যে ৰিপস্সনাপুব্বঙ্গমাহি পটিপদাহি নিয্যন্তি, তে সীহৰিক্কীল়িতেন নযেন হাতব্বা.

৭. স্ৰাযং হারো কত্থ সম্ভৰতি, যস্স সত্থা ৰা ধম্মং দেসযতি অঞ্ঞতরো ৰা গরুট্ঠানীযো সব্রহ্মচারী, সো তং ধম্মং সুত্ৰা সদ্ধং পটিলভতি. তত্থ যা ৰীমংসা উস্সাহনা তুলনা উপপরিক্খা, অযং সুতমযী পঞ্ঞা. তথা সুতেন নিস্সযেন যা ৰীমংসা তুলনা উপপরিক্খা মনসানুপেক্খণা, অযং চিন্তামযী পঞ্ঞা. ইমাহি দ্ৰীহি পঞ্ঞাহি মনসিকারসম্পযুত্তস্স যং ঞাণং উপ্পজ্জতি দস্সনভূমিযং ৰা ভাৰনাভূমিযং ৰা, অযং ভাৰনামযী পঞ্ঞা.

৮. পরতোঘোসা সুতমযী পঞ্ঞা. পচ্চত্তসমুট্ঠিতা যোনিসো মনসিকারা চিন্তামযী পঞ্ঞা. যং পরতো চ ঘোসেন পচ্চত্তসমুট্ঠিতেন চ যোনিসোমনসিকারেন ঞাণং উপ্পজ্জতি, অযং ভাৰনামযী পঞ্ঞা. যস্স ইমা দ্ৰে পঞ্ঞা অত্থি সুতমযী চিন্তামযী চ, অযং উগ্ঘটিতঞ্ঞূ. যস্স সুতমযী পঞ্ঞা অত্থি, চিন্তামযী নত্থি, অযং ৰিপঞ্চিতঞ্ঞূ [ৰিপচ্চিতঞ্ঞূ (সী.)]. যস্স নেৰ সুতমযী পঞ্ঞা অত্থি ন চিন্তামযী, অযং নেয্যো.

৯. সাযং ধম্মদেসনা কিং দেসযতি? চত্তারি সচ্চানি দুক্খং সমুদযং নিরোধং মগ্গং. আদীনৰো চ ফলঞ্চ দুক্খং, অস্সাদো সমুদযো, নিস্সরণং নিরোধো, উপাযো আণত্তি চ মগ্গো. ইমানি চত্তারি সচ্চানি. ইদং ধম্মচক্কং.