৯. সপ্পঙ্গপঞ্হো

৯. ‘‘ভন্তে নাগসেন, ‘সপ্পস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, সপ্পো উরেন গচ্ছতি, এৰমেৰ খো, মহারাজ, যোগিনা যোগাৰচরেন পঞ্ঞায চরিতব্বং, পঞ্ঞায চরমানস্স খো, মহারাজ, যোগিনো চিত্তং ঞাযে চরতি, ৰিলক্খণং ৰিৰজ্জেতি, সলক্খণং ভাৰেতি. ইদং, মহারাজ, সপ্পস্স পঠমং অঙ্গং গহেতব্বং.

‘‘পুন চপরং, মহারাজ, সপ্পো চরমানো ওসধং পরিৰজ্জেন্তো চরতি, এৰমেৰ খো, মহারাজ, যোগিনা যোগাৰচরেন দুচ্চরিতং পরিৰজ্জেন্তেন চরিতব্বং. ইদং, মহারাজ, সপ্পস্স দুতিযং অঙ্গং গহেতব্বং.

‘‘পুন চপরং, মহারাজ, সপ্পো মনুস্সে দিস্ৰা তপ্পতি [মনুস্সং দিস্ৰা কম্পতি (ক.)] সোচতি চিন্তযতি, এৰমেৰ খো মহারাজ যোগিনা যোগাৰচরেন কুৰিতক্কে, ৰিতক্কেত্ৰা অরতিং উপ্পাদযিত্ৰা তপ্পিতব্বং সোচিতব্বং চিন্তযিতব্বং ‘পমাদেন মে দিৰসো ৰীতিনামিতো, ন সো পুন সক্কা লদ্ধু’ন্তি. ইদং, মহারাজ, সপ্পস্স ততিযং অঙ্গং গহেতব্বং. ভাসিতম্পেতং, মহারাজ, ভগৰতা ভল্লাটিযজাতকে দ্ৰিন্নং কিন্নরানং –

‘‘‘মযেকরত্তং [যমেকরত্তিং (সী. পী.)] ৰিপ্পৰসিম্হ লুদ্দ, অকামকা অঞ্ঞমঞ্ঞং সরন্তা;

তমেকরত্তং [তমেকরত্তিং (সী. পী.)] অনুতপ্পমানা, সোচাম ‘সা রত্তি পুন নহেস্সতী’’’তি.

সপ্পঙ্গপঞ্হো নৰমো.