৫. উলূকঙ্গপঞ্হো

৫. ‘‘ভন্তে নাগসেন, ‘উলূকস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, উলূকো কাকেহি পটিৰিরুদ্ধো, রত্তিং কাকসঙ্ঘং গন্ত্ৰা বহূপি কাকে হনতি, এৰমেৰ খো, মহারাজ, যোগিনা যোগাৰচরেন অঞ্ঞাণেন পটিৰিরুদ্ধো কাতব্বো, একেন রহো নিসীদিত্ৰা অঞ্ঞাণং সম্পমদ্দিতব্বং, মূলতো ছিন্দিতব্বং. ইদং, মহারাজ, উলূকস্স পঠমং গহেতব্বং.

‘‘পুন চপরং, মহারাজ, উলূকো সুপ্পটিসল্লীনো হোতি, এৰমেৰ খো, মহারাজ, যোগিনা যোগাৰচরেন পটিসল্লানারামেন ভৰিতব্বং পটিসল্লানরতেন. ইদং, মহারাজ, উলূকস্স দুতিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে –

‘‘‘ইধ, ভিক্খৰে, ভিক্খু পটিসল্লানারামো পটিসল্লানরতো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথা ভূথং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতী’’’তি.

উলূকঙ্গপঞ্হো পঞ্চমো.