৯. ৰরাহঙ্গপঞ্হো

৯. ‘‘ভন্তে নাগসেন, ‘ৰরাহস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, ৰরাহো সন্তত্তকঠিতে [সন্তত্তকঠিনে (সী. পী.)] গিম্হসমযে সম্পত্তে উদকং উপগচ্ছতি, এৰমেৰ খো, মহারাজ, যোগিনা যোগাৰচরেন দোসেন চিত্তে আলুল়িতখলিতৰিব্ভন্তসন্তত্তে সীতলামতপণীতমেত্তাভাৰনং উপগন্তব্বং. ইদং, মহারাজ, ৰরাহস্স পঠমং অঙ্গং গহেতব্বং.

‘‘পুন চপরং, মহারাজ, ৰরাহো চিক্খল্লমুদকমুপগন্ত্ৰা নাসিকায পথৰিং খণিত্ৰা দোণিং কত্ৰা দোণিকায সযতি, এৰমেৰ খো, মহারাজ, যোগিনা যোগাৰচরেন মানসে কাযং নিক্খিপিত্ৰা আরম্মণন্তরগতেন সযিতব্বং. ইদং, মহারাজ, ৰরাহস্স দুতিযং অঙ্গং গহেতব্বং. ভাসিতম্পেতং, মহারাজ, থেরেন পিণ্ডোলভারদ্ৰাজেন –

‘‘‘কাযে [কাযেন (ক.)] সভাৰং দিস্ৰান, ৰিচিনিত্ৰা ৰিপস্সকো;

একাকিযো অদুতিযো, সেতি আরম্মণন্তরে’’’তি.

ৰরাহঙ্গপঞ্হো নৰমো.