১০. হত্থিঙ্গপঞ্হো

১০. ‘‘ভন্তে নাগসেন, ‘হত্থিস্স পঞ্চ অঙ্গানি গহেতব্বানী’তি যং ৰদেসি, কতমানি তানি পঞ্চ অঙ্গানি গহেতব্বানী’’তি? ‘‘যথা, মহারাজ, হত্থী নাম চরন্তো যেৰ পথৰিং দালেতি, এৰমেৰ খো, মহারাজ, যোগিনা যোগাৰচরেন কাযং সম্মসমানেনেৰ সব্বে কিলেসা দালেতব্বা. ইদং, মহারাজ, হত্থিস্স পঠমং অঙ্গং গহেতব্বং.

‘‘পুন চপরং, মহারাজ, হত্থী সব্বকাযেনেৰ অপলোকেতি, উজুকং যেৰ পেক্খতি, ন দিসাৰিদিসা ৰিলোকেতি, এৰমেৰ খো, মহারাজ, যোগিনা যোগাৰচরেন সব্বকাযেন অপলোকিনা ভৰিতব্বং, ন দিসাৰিদিসা ৰিলোকেতব্বা, ন উদ্ধং উল্লোকেতব্বং, ন অধো ওলোকেতব্বং, যুগমত্তপেক্খিনা ভৰিতব্বং. ইদং, মহারাজ, হত্থিস্স দুতিযং অঙ্গং গহেতব্বং.

‘‘পুন চপরং, মহারাজ, হত্থী অনিবদ্ধসযনো গোচরাযমনুগন্ত্ৰা ন তমেৰ দেসং ৰাসত্থমুপগচ্ছতি, ন ধুৰপ্পতিট্ঠালযো, এৰমেৰ খো, মহারাজ, যোগিনা যোগাৰচরেন অনিবদ্ধসযনেন ভৰিতব্বং, নিরালযেন পিণ্ডায গন্তব্বং, যদি পস্সতি ৰিপস্সকো মনুঞ্ঞং পতিরূপং রুচিরদেসে ভৰং মণ্ডপং ৰা রুক্খমূলং ৰা গুহং ৰা পব্ভারং ৰা, তত্থেৰ ৰাসমুপগন্তব্বং, ধুৰপ্পতিট্ঠালযো ন কাতব্বো. ইদং, মহারাজ, হত্থিস্স ততিযং অঙ্গং গহেতব্বং.

‘‘পুন চপরং, মহারাজ, হত্থী উদকং ওগাহিত্ৰা সুচিৰিমলসীতলসলিলপরিপুণ্ণং কুমুদুপ্পলপদুমপুণ্ডরীকসঞ্ছন্নং মহতিমহন্তং পদুমসরং ওগাহিত্ৰা কীল়তি গজৰরকীল়ং, এৰমেৰ খো, মহারাজ, যোগিনা যোগাৰচরেন সুচিৰিমলৰিপ্পসন্নমনাৰিলধম্মৰরৰারিপুণ্ণং ৰিমুত্তিকুসুমসঞ্ছন্নং মহাসতিপট্ঠানপোক্খরণিং ওগাহিত্ৰা ঞাণেন সঙ্খারা ওধুনিতব্বা ৰিধুনিতব্বা, যোগাৰচরকীল়া কীল়িতব্বা. ইদং, মহারাজ, হত্থিস্স চতুত্থং অঙ্গং গহেতব্বং.

‘‘পুন চপরং, মহারাজ, হত্থী সতো পাদং উদ্ধরতি, সতো পাদং নিক্খিপতি, এৰমেৰ খো, মহারাজ, যোগিনা যোগাৰচরেন সতেন সম্পজানেন পাদং উদ্ধরিতব্বং, সতেন সম্পজানেন পাদং নিক্খিপিতব্বং, অভিক্কমপটিক্কমে সমিঞ্জনপসারণে সব্বত্থ সতেন সম্পজানেন ভৰিতব্বং. ইদং, মহারাজ, হত্থিস্স পঞ্চমং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে –

‘‘‘কাযেন সংৰরো সাধু, সাধু ৰাচায সংৰরো;

মনসা সংৰরো সাধু, সাধু সব্বত্থ সংৰরো;

সব্বত্থ সংৰুতো লজ্জী, রক্খিতোতি পৰুচ্চতী’’’তি.

হত্থিঙ্গপঞ্হো দসমো.উপচিকাৰগ্গো চতুত্থো.

তস্সুদ্দানং –

উপচিকা বিল়ারো চ, উন্দূরো ৰিচ্ছিকেন চ;

নকুলো সিঙ্গালো মিগো,

গোরূপো ৰরাহো হত্থিনা দসাতি.