৩. কলন্দকঙ্গপঞ্হো

৩. ‘‘ভন্তে নাগসেন, ‘কলন্দকস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কলন্দকো পটিসত্তুম্হি ওপতন্তে নঙ্গুট্ঠং পপ্ফোটেত্ৰা মহন্তং কত্ৰা তেনেৰ নঙ্গুট্ঠলগুল়েন পটিসত্তুং পটিবাহতি, এৰমেৰ খো, মহারাজ, যোগিনা যোগাৰচরেন কিলেসসত্তুম্হি ওপতন্তে সতিপট্ঠানলগুল়ং পপ্ফোটেত্ৰা মহন্তং কত্ৰা তেনেৰ সতিপট্ঠানলগুল়েন সব্বকিলেসা পটিবাহিতব্বা. ইদং, মহারাজ, কলন্দকস্স একং অঙ্গং গহেতব্বং. ভাসিতম্পেতং, মহারাজ, থেরেন চূল়পন্থকেন –

‘যদা কিলেসা ওপতন্তি, সামঞ্ঞগুণধংসনা;

সতিপট্ঠানলগুল়েন, হন্তব্বা তে পুনপ্পুন’’’ন্তি.

কলন্দকঙ্গপঞ্হো ততিযো.