১২. নিব্বানসন্নিহিতপঞ্হো

১২. ‘‘ভন্তে নাগসেন, অত্থি সো পদেসো পুরত্থিমায ৰা দিসায দক্খিণায ৰা দিসায পচ্ছিমায ৰা দিসায উত্তরায ৰা দিসায উদ্ধং ৰা অধো ৰা তিরিযং ৰা, যত্থ নিব্বানং সন্নিহিত’’ন্তি? ‘‘নত্থি, মহারাজ, সো পদেসো পুরত্থিমায ৰা দিসায দক্খিণায ৰা দিসায পচ্ছিমায ৰা দিসায উত্তরায ৰা দিসায উদ্ধং ৰা অধো ৰা তিরিযং ৰা, যত্থ নিব্বানং সন্নিহিত’’ন্তি.

‘‘যদি, ভন্তে নাগসেন, নত্থি নিব্বানস্স সন্নিহিতোকাসো, তেন হি নত্থি নিব্বানং? যেসঞ্চ তং নিব্বানং সচ্ছিকতং, তেসম্পি সচ্ছিকিরিযা মিচ্ছা, কারণং তত্থ ৰক্খামি, যথা, ভন্তে নাগসেন, মহিযা ধঞ্ঞুট্ঠানং খেত্তং অত্থি, গন্ধুট্ঠানং পুপ্ফং অত্থি, পুপ্ফুট্ঠানং গুম্বো অত্থি, ফলুট্ঠানং রুক্খো অত্থি, রতনুট্ঠানং আকরো অত্থি, তত্থ যো কোচি যং যং ইচ্ছতি, সো তত্থ গন্ত্ৰা তং তং হরতি, এৰমেৰ খো, ভন্তে নাগসেন, যদি নিব্বানং অত্থি, তস্স নিব্বানস্স উট্ঠানোকাসোপি ইচ্ছিতব্বো, যস্মা চ খো, ভন্তে নাগসেন, নিব্বানস্স উট্ঠানোকাসো নত্থি, তস্মা নত্থি নিব্বানন্তি ব্রূমি, যেসঞ্চ নিব্বানং সচ্ছিকতং, তেসম্পি সচ্ছিকিরিযা মিচ্ছা’’তি.

‘‘নত্থি, মহারাজ, নিব্বানস্স সন্নিহিতোকাসো, অত্থি চেতং নিব্বানং, সম্মাপটিপন্নো যোনিসো মনসিকারেন নিব্বানং সচ্ছিকরোতি. যথা পন, মহারাজ, অত্থি অগ্গি নাম, নত্থি তস্স সন্নিহিতোকাসো, দ্ৰে কট্ঠানি সঙ্ঘট্টেন্তো অগ্গিং অধিগচ্ছতি. এৰমেৰ খো, মহারাজ, অত্থি নিব্বানং, নত্থি তস্স সন্নিহিতোকাসো, সম্মাপটিপন্নো যোনিসো মনসিকারেন নিব্বানং সচ্ছিকরোতি.

‘‘যথা ৰা পন, মহারাজ, অত্থি সত্ত রতনানি নাম. সেয্যথিদং, চক্করতনং হত্থিরতনং অস্সরতনং মণিরতনং ইত্থিরতনং গহপতিরতনং পরিণাযকরতনং. ন চ তেসং রতনানং সন্নিহিতোকাসো অত্থি, খত্তিযস্স পন সম্মাপটিপন্নস্স পটিপত্তিবলেন তানি রতনানি উপগচ্ছন্তি. এৰমেৰ খো, মহারাজ, অত্থি নিব্বানং, নত্থি তস্স সন্নিহিতোকাসো, সম্মাপটিপন্নো যোনিসো মনসিকারেন নিব্বানং সচ্ছিকরোতী’’তি.

‘‘ভন্তে নাগসেন, নিব্বানস্স সন্নিহিতোকাসো মা হোতু, অত্থি পন তং ঠানং, যত্থ ঠিতো সম্মাপটিপন্নো নিব্বানং সচ্ছিকরোতী’’তি? ‘‘আম, মহারাজ, অত্থি তং ঠানং, যত্থ ঠিতো সম্মাপটিপন্নো নিব্বানং সচ্ছিকরোতী’’তি.

‘‘কতমং পন, ভন্তে, তং ঠানং, যত্থ ঠিতো সম্মাপটিপন্নো নিব্বানং সচ্ছিকরোতী’’তি? ‘‘সীলং, মহারাজ, ঠানং, সীলে পতিট্ঠিতো যোনিসো মনসিকরোন্তো সক্কযৰনেপি চীনৰিলাতেপি অলসন্দেপি নিগুম্বেপি [নিকুম্বেপি (সী. স্যা. পী.)] কাসিকোসলেপি কস্মীরেপি গন্ধারেপি নগমুদ্ধনিপি ব্রহ্মলোকেপি যত্থ কত্থচিপি ঠিতো সম্মাপটিপন্নো নিব্বানং সচ্ছিকরোতি. যথা, মহারাজ, যো কোচি চক্খুমা পুরিসো সকযৰনেপি চীনৰিলাতেপি অলসন্দেপি নিগুম্বেপি কাসিকোসলেপি কস্মীরেপি গন্ধারেপি নগমুদ্ধনিপি ব্রহ্মলোকেপি যত্থ কত্থচিপি ঠিতো আকাসং পস্সতি, এৰমেৰ খো, মহারাজ, সীলে পতিট্ঠিতো যোনিসো মনসিকরোন্তো সকযৰনেপি…পে… যত্থ কত্থচিপি ঠিতো সম্মাপটিপন্নো নিব্বানং সচ্ছিকরোতি.

‘‘যথা ৰা পন, মহারাজ, সকযৰনেপি…পে… যত্থ কত্থচিপি ঠিতস্স পুব্বদিসা অত্থি, এৰমেৰ খো, মহারাজ, সীলে পতিট্ঠিতস্স যোনিসো মনসিকরোন্তস্স সক্কযৰনেপি…পে… যত্থ কত্থচিপি ঠিতস্স সম্মাপটিপন্নস্স অত্থি নিব্বানসচ্ছিকিরিযা’’তি. ‘‘সাধু, ভন্তে নাগসেন, দেসিতং তযা নিব্বানং, দেসিতা নিব্বানসচ্ছিকিরিযা, পরিক্খতা সীলগুণা, দস্সিতা সম্মাপটিপত্তি, উস্সাপিতো ধম্মদ্ধজো, সণ্ঠপিতা ধম্মনেত্তি, অৰঞ্ঝো সুপ্পযুত্তানং সম্মাপযোগো, এৰমেতং গণিৰরপৰর তথা সম্পটিচ্ছামী’’তি.

নিব্বানসন্নিহিতপঞ্হো দ্ৰাদসমো.

ৰেস্সন্তরৰগ্গো ততিযো.

ইমস্মিং ৰগ্গে দ্ৰাদস পঞ্হা.