৭. ঘটিকারপঞ্হো

৭. ‘‘ভন্তে নাগসেন, ভাসিতম্পেতং ভগৰতা ‘ঘটিকারস্স কুম্ভকারস্স আৰেসনং সব্বং তেমাসং আকাসচ্ছদনং অট্ঠাসি, ন দেৰোতিৰস্সী’তি. পুন চ ভণিতং ‘কস্সপস্স তথাগতস্স [ভগৰতো অরহতো সম্মাসম্বুদ্ধস্স (ম. নি. ২.২৮৯)] কুটি ওৰস্সতী’তি. কিস্স পন, ভন্তে নাগসেন, তথাগতস্স এৰমুস্সন্নকুসলমূলস্স [এৰরূপস্স উস্সন্নকুসলমূলস্স (ক.)] কুটি ওৰস্সতি, তথাগতস্স নাম সো আনুভাৰো ইচ্ছিতব্বো? যদি, ভন্তে নাগসেন, ঘটিকারস্স কুম্ভকারস্স আৰেসনং অনোৰস্সং আকাসচ্ছদনং অহোসি, তেন হি ‘তথাগতস্স কুটি ওৰস্সতী’তি যং ৰচনং, তং মিচ্ছা. যদি তথাগতস্স কুটি ওৰস্সতি, তেন হি ‘ঘটিকারস্স কুম্ভকারস্স আৰেসনং অনোৰস্সকং অহোসি আকাসচ্ছদন’ন্তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘ঘটিকারস্স কুম্ভকারস্স আৰেসনং সব্বং তেমাসং আকাসচ্ছদনং অট্ঠাসি, ন দেৰোতিৰস্সী’তি. ভণিতঞ্চ ‘কস্সপস্স তথাগতস্স কুটি ওৰস্সতী’তি. ঘটিকারো, মহারাজ, কুম্ভকারো সীলৰা কল্যাণধম্মো উস্সন্নকুসলমূলো অন্ধে জিণ্ণে মাতাপিতরো পোসেতি, তস্স অসম্মুখা অনাপুচ্ছাযেৰস্স ঘরে তিণং হরিত্ৰা ভগৰতো কুটিং ছাদেসুং, সো তেন তিণহরণেন অকম্পিতং অসঞ্চলিতং সুসণ্ঠিতং ৰিপুলমসমং পীতিং পটিলভতি, ভিয্যো সোমনস্সঞ্চ অতুলং উপ্পাদেসি ‘অহো ৰত মে ভগৰা লোকুত্তমো সুৰিস্সত্থো’তি, তেন তস্স দিট্ঠধম্মিকো ৰিপাকো নিব্বত্তো. ন হি, মহারাজ, তথাগতো তাৰতকেন ৰিকারেন চলতি.

‘‘যথা, মহারাজ, সিনেরু গিরিরাজা অনেকসতসহস্সৰাতসম্পহারেনপি ন কম্পতি ন চলতি, মহোদধি ৰরপ্পৰরসাগরো অনেকসতনহুতমহাগঙ্গাসতসহস্সেহিপি ন পূরতি ন ৰিকারমাপজ্জতি, এৰমেৰ খো, মহারাজ, তথাগতো ন তাৰতকেন ৰিকারেন চলতি.

‘‘যং পন, মহারাজ, তথাগতস্স কুটি ওৰস্সতি, তং মহতো জনকাযস্স অনুকম্পায. দ্ৰেমে, মহারাজ, অত্থৰসে সম্পস্সমানা তথাগতা সযং নিম্মিতং পচ্চযং নপ্পটিসেৰন্তি, ‘অযং অগ্গদক্খিণেয্যো সত্থা’তি ভগৰতো পচ্চযং দত্ৰা দেৰমনুস্সা সব্বদুগ্গতিতো পরিমুচ্চিস্সন্তীতি, দস্সেত্ৰা ৰুত্তিং পরিযেসন্তীতি ‘মা অঞ্ঞে উপৰদেয্যু’ন্তি. ইমে দ্ৰে অত্থৰসে সম্পস্সমানা তথাগতা সযং নিম্মিতং পচ্চযং নপ্পটিসেৰন্তি. যদি, মহারাজ, সক্কো ৰা তং কুটিং অনোৰস্সং করেয্য ব্রহ্মা ৰা সযং ৰা, সাৰজ্জং ভৰেয্য তং যেৰ করণং [কারণং (সী. পী.)] সদোসং সনিগ্গহং, ইমে ৰিভূতং [ৰিভূসং (সী. পী.)] কত্ৰা লোকং সম্মোহেন্তি অধিকতং করোন্তীতি, তস্মা তং করণং ৰজ্জনীযং. ন, মহারাজ, তথাগতা ৰত্থুং যাচন্তি, তায অৰত্থুযাচনায অপরিভাসিযা ভৰন্তী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

ঘটিকারপঞ্হো সত্তমো.