২. অভেজ্জৰগ্গো

১. খুদ্দানুখুদ্দকপঞ্হো

১. ‘‘ভন্তে নাগসেন, ভাসিতম্পেতং ভগৰতা ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি. পুন চ ৰিনযপঞ্ঞত্তিযা এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি. কিং নু খো, ভন্তে নাগসেন, খুদ্দানুখুদ্দকানি সিক্খাপদানি দুপ্পঞ্ঞত্তানি, উদাহু অৰত্থুস্মিং অজানিত্ৰা পঞ্ঞত্তানি, যং ভগৰা অত্তনো অচ্চযেন খুদ্দানুখুদ্দকানি সিক্খাপদানি সমূহনাপেতি? যদি, ভন্তে নাগসেন, ভগৰতা ভণিতং ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি, তেন হি ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি যং ৰচনং, তং মিচ্ছা. যদি তথাগতে ৰিনযপঞ্ঞত্তিযা এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি তেন হি ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি তম্পি ৰচনং মিচ্ছা. অযম্পি উভতো কোটিকো পঞ্হো সুখুমো নিপুণো গম্ভীরো সুগম্ভীরো দুন্নিজ্ঝাপযো, সো তৰানুপ্পত্তো, তত্থ তে ঞাণবলৰিপ্ফারং দস্সেহী’’তি.

‘‘ভাসিতম্পেতং, মহারাজ, ভগৰতা ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি, ৰিনযপঞ্ঞত্তিযাপি এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি, তং পন, মহারাজ, তথাগতো ভিক্খূ ৰীমংসমানো আহ ‘উক্কলেস্সন্তি [উক্কড্ঢিস্সন্তি (সী.), উস্সক্কিস্সন্তি (স্যা.)] নু খো মম সাৰকা মযা ৰিস্সজ্জাপীযমানা মমচ্চযেন খুদ্দানুখুদ্দকানি সিক্খাপদানি, উদাহু আদিযিস্সন্তী’তি.

‘‘যথা, মহারাজ, চক্কৰত্তী রাজা পুত্তে এৰং ৰদেয্য ‘অযং খো, তাতা, মহাজনপদো সব্বদিসাসু সাগরপরিযন্তো, দুক্করো, তাতা, তাৰতকেন বলেন ধারেতুং, এথ তুম্হে, তাতা, মমচ্চযেন পচ্চন্তে পচ্চন্তে দেসে পজহথা’তি. অপি নু খো তে, মহারাজ, কুমারা পিতুঅচ্চযেন হত্থগতে জনপদে সব্বে তে পচ্চন্তে পচ্চন্তে দেসে মুঞ্চেয্যু’’ন্তি? ‘‘ন হি ভন্তে, রাজতো [রাজানো (সী. পী.)], ভন্তে, লুদ্ধতরা [লদ্ধতরা (ক.)] কুমারা রজ্জলোভেন তদুত্তরিং দিগুণতিগুণং জনপদং পরিগ্গণ্হেয্যুং [পরিকড্ঢেয্যুং (সী. পী.)], কিং পন তে হত্থগতং জনপদং মুঞ্চেয্যু’’ন্তি? ‘‘এৰমেৰ খো, মহারাজ, তথাগতো ভিক্খূ ৰীমংসমানো এৰমাহ ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি. দুক্খপরিমুত্তিযা, মহারাজ, বুদ্ধপুত্তা ধম্মলোভেন অঞ্ঞম্পি উত্তরিং দিযড্ঢসিক্খাপদসতং গোপেয্যুং, কিং পন পকতিপঞ্ঞত্তং সিক্খাপদং মুঞ্চেয্যু’’ন্তি?

‘‘ভন্তে নাগসেন, যং ভগৰা আহ ‘খুদ্দানুখুদ্দকানি সিক্খাপদানী’তি, এত্থাযং জনো সম্মূল়্হো ৰিমতিজাতো অধিকতো সংসযপক্খন্দো. কতমানি তানি খুদ্দকানি সিক্খাপদানি, কতমানি অনুখুদ্দকানি সিক্খাপদানীতি? দুক্কটং, মহারাজ, খুদ্দকং সিক্খাপদং, দুব্ভাসিতং অনুখুদ্দকং সিক্খাপদং, ইমানি দ্ৰে খুদ্দানুখুদ্দকানি সিক্খাপদানি, পুব্বকেহিপি, মহারাজ, মহাথেরেহি এত্থ ৰিমতি উপ্পাদিতা, তেহিপি একজ্ঝং ন কতো ধম্মসণ্ঠিতিপরিযাযে ভগৰতা এসো পঞ্হো উপদিট্ঠোতি. চিরনিক্খিত্তং, ভন্তে নাগসেন, জিনরহস্সং অজ্জেতরহি লোকে ৰিৰটং পাকটং কত’’ন্তি.

খুদ্দানুখুদ্দকপঞ্হো পঠমো.

২. অব্যাকরণীযপঞ্হো

২. ‘‘ভন্তে নাগসেন, ভাসিতম্পেতং ভগৰতা ‘নত্থানন্দ তথাগতস্স ধম্মেসু আচরিযমুট্ঠী’তি, পুন চ থেরেন মালুক্যপুত্তেন [মালুঙ্ক্যপুত্তেন (সী. স্যা. পী.) সং. নি. ৪.৯৫; অ. নি. ১.৪.২৫৭ পস্সিতব্বং] পঞ্হং পুট্ঠো ন ব্যাকাসি. এসো খো, ভন্তে নাগসেন, পঞ্হো দ্ৰযন্তো [দ্ৰযতো (সী.)] একন্তনিস্সিতো ভৰিস্সতি অজাননেন ৰা গুয্হকরণেন ৰা. যদি, ভন্তে নাগসেন, ভগৰতা ভণিতং ‘নত্থানন্দ তথাগতস্স ধম্মেসু আচরিযমুট্ঠী’তি, তেন হি থেরস্স মালুক্যপুত্তস্স অজানন্তেন ন ব্যাকতং. যদি জানন্তেন ন ব্যাকতং, তেন হি অত্থি তথাগতস্স ধম্মেসু আচরিযমুট্ঠি. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘নত্থানন্দ তথাগতস্স ধম্মেসু আচরিযমুট্ঠী’তি, অব্যাকতো চ থেরেন মালুক্যপুত্তেন পুচ্ছিতো পঞ্হো, তঞ্চ পন ন অজানন্তেন ন গুয্হকরণেন. চত্তারিমানি, মহারাজ, পঞ্হব্যাকরণানি. কতমানি চত্তারি? একংসব্যাকরণীযো পঞ্হো ৰিভজ্জব্যাকরণীযো পঞ্হো পটিপুচ্ছাব্যাকরণীযো পঞ্হো ঠপনীযো পঞ্হোতি.

‘‘কতমো চ, মহারাজ, একংসব্যাকরণীযো পঞ্হো? ‘রূপং অনিচ্চ’ন্তি একংসব্যাকরণীযো পঞ্হো, ‘ৰেদনা অনিচ্চা’তি…পে… ‘সঞ্ঞা অনিচ্চা’তি…পে… ‘সঙ্খারা অনিচ্চা’তি…পে… ‘ৰিঞ্ঞাণং অনিচ্চ’’ন্তি একংসব্যাকরণীযো পঞ্হো, অযং একংসব্যাকরণীযো পঞ্হো.

‘‘কতমো ৰিভজ্জব্যাকরণীযো পঞ্হো? ‘অনিচ্চং পন রূপ’ন্তি ৰিভজ্জব্যাকরণীযো পঞ্হো, ‘অনিচ্চা পন ৰেদনা’তি…পে… ‘অনিচ্চা পন সঞ্ঞা’তি…পে… ‘অনিচ্চা পন সঙ্খারা’তি…পে… ‘অনিচ্চং পন ৰিঞ্ঞাণ’ন্তি ৰিভজ্জব্যাকরণীযো পঞ্হো, অযং ৰিভজ্জব্যাকরণীযো পঞ্হো.

‘‘কতমো পটিপুচ্ছাব্যাকরণীযো পঞ্হো? ‘কিং নু খো চক্খুনা সব্বং ৰিজানাতী’তি অযং পটিপুচ্ছাব্যাকরণীযো পঞ্হো.

‘‘কতমো ঠপনীযো পঞ্হো? ‘সস্সতো লোকো’তি ঠপনীযো পঞ্হো, ‘অসস্সতো লোকো’তি. ‘অন্তৰা লোকো’তি. ‘অনন্তৰা লোকো’তি. ‘অন্তৰা চ অনন্তৰা চ লোকো’তি. ‘নেৰন্তৰা নানন্তৰা লোকো’তি. ‘তং জীৰং তং সরীর’ন্তি. ‘অঞ্ঞং জীৰং অঞ্ঞং সরীর’ন্তি. ‘হোতি তথাগতো পরং মরণা’তি. ‘ন হোতি তথাগতো পরং মরণা’তি. ‘হোতি চ ন চ হোতি তথাগতো পরং মরণা’তি. ‘নেৰ হোতি ন ন হোতি তথাগতো পরং মরণা’তি ঠপনীযো পঞ্হো, অযং ঠপনীযো পঞ্হো.

‘‘ভগৰা, মহারাজ, থেরস্স মালুক্যপুত্তস্স তং ঠপনীযং পঞ্হং ন ব্যাকাসি. সো পন পঞ্হো কিং কারণা ঠপনীযো? ন তস্স দীপনায হেতু ৰা কারণং ৰা অত্থি, তস্মা সো পঞ্হো ঠপনীযো. নত্থি বুদ্ধানং ভগৰন্তানং অকারণমহেতুকং গিরমুদীরণ’’ন্তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

অব্যাকরণীযপঞ্হো দুতিযো.

৩. মচ্চুভাযনাভাযনপঞ্হো

৩. ‘‘ভন্তে নাগসেন, ভাসিতম্পেতং ভগৰতা ‘সব্বে তসন্তি দণ্ডস্স, সব্বে ভাযন্তি মচ্চুনো’তি, পুন ভণিতং ‘অরহা সব্বভযমতিক্কন্তো’তি. কিং নু খো, ভন্তে নাগসেন, অরহা দণ্ডভযা তসতি, নিরযে ৰা নেরযিকা সত্তা জলিতা কুথিতা তত্তা সন্তত্তা তম্হা জলিতগ্গিজালকা মহানিরযা চৰমানা মচ্চুনো ভাযন্তি. যদি, ভন্তে নাগসেন, ভগৰতা ভণিতং ‘সব্বে তসন্তি দণ্ডস্স, সব্বে ভাযন্তি মচ্চুনো’তি, তেন হি ‘অরহা সব্বভযমতিক্কন্তো’তি যং ৰচনং, তং মিচ্ছা. যদি ভগৰতা ভণিতং ‘অরহা সব্বভযমতিক্কন্তো’তি, তেন হি ‘সব্বে তসন্তি দণ্ডস্স, সব্বে ভাযন্তি মচ্চুনো’তি তম্পি ৰচনং মিচ্ছা. অযং উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘নেতং, মহারাজ, ৰচনং ভগৰতা অরহন্তে উপাদায ভণিতং ‘সব্বে তসন্তি দণ্ডস্স, সব্বে ভাযন্তি মচ্চুনো’তি. ঠপিতো অরহা তস্মিং ৰত্থুস্মিং, সমূহতো ভযহেতু অরহতো. যে তে, মহারাজ, সত্তা সকিলেসা, যেসঞ্চ অধিমত্তা অত্তানুদিট্ঠি, যে চ সুখদুক্খেসু উন্নতাৰনতা, তে উপাদায ভগৰতা ভণিতং ‘সব্বে তসন্তি দণ্ডস্স, সব্বে ভাযন্তি মচ্চুনো’তি. অরহতো, মহারাজ, সব্বগতি উপচ্ছিন্না, যোনি ৰিদ্ধংসিতা, পটিসন্ধি উপহতা, ভগ্গা ফাসুকা, সমূহতা সব্বভৰালযা, সমুচ্ছিন্না সব্বসঙ্খারা, হতং কুসলাকুসলং, ৰিহতা অৰিজ্জা, অবীজং ৰিঞ্ঞাণং কতং, দড্ঢা সব্বকিলেসা, অতিৰত্তা লোকধম্মা, তস্মা অরহা ন তসতি সব্বভযেহি.

‘‘ইধ, মহারাজ, রঞ্ঞো চত্তারো মহামত্তা ভৰেয্যুং অনুরক্খা লদ্ধযসা ৰিস্সাসিকা ঠপিতা মহতি ইস্সরিযে ঠানে. অথ রাজা কিস্মিঞ্চি দেৰ করণীযে সমুপ্পন্নে যাৰতা সকৰিজিতে সব্বজনস্স আণাপেয্য ‘সব্বেৰ মে বলিং করোন্তু, সাধেথ তুম্হে চত্তারো মহামত্তা তং করণীয’ন্তি. অপি নু খো, মহারাজ, তেসং চতুন্নং মহামত্তানং বলিভযা সন্তাসো উপ্পজ্জেয্যা’’তি? ‘‘ন হি ভন্তে’’তি. ‘‘কেন কারণেন মহারাজা’’তি. ‘‘ঠপিতা তে, ভন্তে, রঞ্ঞা উত্তমট্ঠানে, নত্থি তেসং বলি, সমতিক্কন্তবলিনো তে, অৰসেসে উপাদায রঞ্ঞা আণাপিতং ‘সব্বেৰ মে বলিং করোন্তূ’তি. ‘‘এৰমেৰ খো, মহারাজ, নেতং ৰচনং ভগৰতা অরহন্তে উপাদায ভণিতং, ঠপিতো অরহা তস্মিং ৰত্থুস্মিং, সমূহতো ভযহেতু অরহতো, যে তে, মহারাজ, সত্তা সকিলেসা, যেসঞ্চ অধিমত্তা অত্তানুদিট্ঠি, যে চ সুখদুক্খেসু উন্নতাৰনতা, তে উপাদায ভগৰতা ভণিতং ‘সব্বে তসন্তি দণ্ডস্স, সব্বে ভাযন্তি মচ্চুনো’তি. তস্মা অরহা ন তসতি সব্বভযেহী’’তি.

‘‘নেতং, ভন্তে নাগসেন, ৰচনং সাৰসেসং, নিরৰসেসৰচনমেতং ‘সব্বে’তি. তত্থ মে উত্তরিং কারণং ব্রূহি তং ৰচনং পতিট্ঠাপেতু’’ন্তি.

‘‘ইধ, মহারাজ, গামে গামস্সামিকো আণাপকং আণাপেয্য ‘এহি, ভো আণাপক, যাৰতা গামে গামিকা, তে সব্বে সীঘং মম সন্তিকে সন্নিপাতেহী’তি. সো ‘সাধু সামী’তি সম্পটিচ্ছিত্ৰা গামমজ্ঝে ঠত্ৰা তিক্খত্তুং সদ্দমনুস্সাৰেয্য ‘যাৰতা গামে গামিকা, তে সব্বে সীঘসীঘং সামিনো সন্তিকে সন্নিপতন্তূ’তি. ততো তে গামিকা আণাপকস্স ৰচনেন তুরিততুরিতা সন্নিপতিত্ৰা গামস্সামিকস্স আরোচেন্তি ‘সন্নিপতিতা, সামি, সব্বে গামিকা, যং তে করণীযং তং করোহী’তি. ইতি সো, মহারাজ, গামস্সামিকো কুটিপুরিসে সন্নিপাতেন্তো সব্বে গামিকে আণাপেতি, তে চ আণত্তা ন সব্বে সন্নিপতন্তি, কুটিপুরিসা যেৰ সন্নিপতন্তি, ‘এত্তকা যেৰ মে গামিকা’তি গামস্সামিকো চ তথা সম্পটিচ্ছতি, অঞ্ঞে বহুতরা অনাগতা ইত্থিপুরিসা দাসিদাসা ভতকা কম্মকরা গামিকা গিলানা গোমহিংসা অজেল়কা সুৰানা, যে অনাগতা, সব্বে তে অগণিতা, কুটিপুরিসে যেৰ উপাদায আণাপিতত্তা ‘সব্বে সন্নিপতন্তূ’তি. এৰমেৰ খো, মহারাজ, নেতং ৰচনং ভগৰতা অরহন্তে উপাদায ভণিতং, ঠপিতো অরহা তস্মিং ৰত্থুস্মিং, সমূহতো ভযহেতু অরহতো, যে তে, মহারাজ, সত্তা সকিলেসা, যেসঞ্চ অধিমত্তা অত্তানুদিট্ঠি, যে চ সুখদুক্খেসু উন্নতাৰনতা, তে উপাদায ভগৰতা ভণিতং ‘সব্বে তসন্তি দণ্ডস্স, সব্বে ভাযন্তি মচ্চুনো’তি. তস্মা অরহা ন তসতি সব্বভযেহি.

‘‘অত্থি, মহারাজ, সাৰসেসং ৰচনং সাৰসেসো অত্থো, অত্থি সাৰসেসং ৰচনং নিরৰসেসো অত্থো, অত্থি নিরৰসেসং ৰচনং সাৰসেসো অত্থো, অত্থি নিরৰসেসং ৰচনং নিরৰসেসো অত্থো. তেন তেন অত্থো সম্পটিচ্ছিতব্বো.

‘‘পঞ্চৰিধেহি, মহারাজ, কারণেহি অত্থো সম্পটিচ্ছিতব্বো আহচ্চপদেন রসেন আচরিযৰংসেন [আচরিযৰংসতায (পী. ক.)] অধিপ্পাযা কারণুত্তরিযতায. এত্থ হি আহচ্চপদন্তি সুত্তং অধিপ্পেতং. রসোতি সুত্তানুলোমং. আচরিযৰংসোতি আচরিযৰাদো. অধিপ্পাযোতি অত্তনো মতি. কারণুত্তরিযতাতি ইমেহি চতূহি সমেন্তং [সমেতং (সী.)] কারণং. ইমেহি খো, মহারাজ, পঞ্চহি কারণেহি অত্থো সম্পটিচ্ছিতব্বো. এৰমেসো পঞ্হো সুৰিনিচ্ছিতো হোতী’’তি.

‘‘হোতু, ভন্তে নাগসেন, তথা তং সম্পটিচ্ছামি. ঠপিতো হোতু অরহা তস্মিং ৰত্থুস্মিং, তসন্তু অৰসেসা সত্তা, নিরযে পন নেরযিকা সত্তা দুক্খা তিব্বা কটুকা ৰেদনা ৰেদযমানা জলিতপজ্জলিতসব্বঙ্গপচ্চঙ্গা রুণ্ণকারুঞ্ঞকন্দিতপরিদেৰিতলালপ্পিতমুখা অসয্হতিব্বদুক্খাভিভূতা অতাণা অসরণা অসরণীভূতা অনপ্পসোকাতুরা অন্তিমপচ্ছিমগতিকা একন্তসোকপরাযণা উণ্হতিখিণচণ্ডখরতপনতেজৰন্তো ভীমভযজনকনিনাদমহাসদ্দা সংসিব্বিতছব্বিধজালামালাকুলা সমন্তা সতযোজনানুফরণচ্চিৰেগা কদরিযা তপনা মহানিরযা চৰমানা মচ্চুনো ভাযন্তী’’তি? ‘‘আম, মহারাজা’’তি.

‘‘ননু, ভন্তে নাগসেন, নিরযো একন্তদুক্খৰেদনীযো, কিস্স পন তে নেরযিকা সত্তা একন্তদুক্খৰেদনীযা নিরযা চৰমানা মচ্চুনো ভাযন্তি, কিস্স নিরযে রমন্তী’’তি? ‘‘ন তে, মহারাজ, নেরযিকা সত্তা নিরযে রমন্তি, মুঞ্চিতুকামাৰ তে নিরযা. মরণস্সেৰ সো [মরণস্সেসো (সী. পী.)], মহারাজ, আনুভাৰো, যেন তেসং সন্তাসো উপ্পজ্জতী’’তি. ‘‘এতং খো, ভন্তে নাগসেন, ন সদ্দহামি, যং মুচ্চিতুকামানং চুতিযা সন্তাসো উপ্পজ্জতীতি, হাসনীযং, ভন্তে নাগসেন, তং ঠানং, যং তে পত্থিতং লভন্তি, কারণেন মং সঞ্ঞাপেহী’’তি.

‘‘মরণন্তি খো, মহারাজ, এতং অদিট্ঠসচ্চানং তাসনীযট্ঠানং, এত্থাযং জনো তসতি চ উব্বিজ্জতি চ. যো চ, মহারাজ, কণ্হসপ্পস্স ভাযতি, সো মরণস্স ভাযন্তো কণ্হসপ্পস্স ভাযতি. যো চ হত্থিস্স ভাযতি…পে… সীহস্স…পে… ব্যগ্ঘস্স…পে… দীপিস্স…পে… অচ্ছস্স…পে… তরচ্ছস্স…পে… মহিংসস্স…পে… গৰযস্স…পে… অগ্গিস্স…পে… উদকস্স…পে… খাণুকস্স…পে… কণ্টকস্স ভাযতি. যো চ সত্তিযা ভাযতি, সো মরণস্স ভাযন্তো সত্তিযা ভাযতি. মরণস্সেৰ সো [মরণস্সেসো (সী. পী.)], মহারাজ, সরসসভাৰতেজো [সরসভাৰতেজো (সী. পী.)], তস্স সরসসভাৰতেজেন সকিলেসা সত্তা মরণস্স তসন্তি ভাযন্তি, মুচ্চিতুকামাপি, মহারাজ, নেরযিকা সত্তা মরণস্স তসন্তি ভাযন্তি.

‘‘ইধ, মহারাজ, পুরিসস্স কাযে মেদো গণ্ঠি উপ্পজ্জেয্য. সো তেন রোগেন দুক্খিতো উপদ্দৰা পরিমুচ্চিতুকামো ভিসক্কং সল্লকত্তং আমন্তাপেয্য. তস্স ৰচনং সো ভিসক্কো সল্লকত্তো সম্পটিচ্ছিত্ৰা তস্স রোগস্স উদ্ধরণায উপকরণং উপট্ঠাপেয্য, সত্থকং তিখিণং করেয্য, যমকসলাকা [দহনসলাকং (ক.)] অগ্গিম্হি পক্খিপেয্য, খারলৰণং নিসদায পিসাপেয্য, অপি নু খো, মহারাজ, তস্স আতুরস্স তিখিণসত্থকচ্ছেদনেন যমকসলাকাদহনেন খারলোণপ্পৰেসনেন তাসো উপ্পজ্জেয্যা’’তি? ‘‘আম ভন্তে’’তি. ‘‘ইতি, মহারাজ, তস্স আতুরস্স রোগা মুচ্চিতুকামস্সাপি ৰেদনাভযা সন্তাসো উপ্পজ্জতি. এৰমেৰ খো, মহারাজ, নিরযা মুচ্চিতুকামানম্পি নেরযিকানং সত্তানং মরণভযা সন্তাসো উপ্পজ্জতি.

‘‘ইধ, মহারাজ, পুরিসো ইস্সরাপরাধিকো বদ্ধো সঙ্খলিকবন্ধনেন গব্ভে পক্খিত্তো পরিমুচ্চিতুকামো অস্স, তমেনং সো ইস্সরো মোচেতুকামো পক্কোসাপেয্য. অপি নু খো, মহারাজ, তস্স ইস্সরাপরাধিকস্স পুরিসস্স ‘কতদোসো অহ’ন্তি জানন্তস্স ইস্সরদস্সনেন সন্তাসো উপ্পজ্জেয্যা’’তি? ‘‘আম ভন্তে’’তি. ‘‘ইতি, মহারাজ, তস্স ইস্সরাপরাধিকস্স পুরিসস্স পরিমুচ্চিতুকামাস্সাপি ইস্সরভযা সন্তাসো উপ্পজ্জতি. এৰমেৰ খো, মহারাজ, নিরযা মুচ্চিতুকামানম্পি নেরযিকানং সত্তানং মরণভযা সন্তাসো উপ্পজ্জতী’’তি.

‘‘অপরম্পি, ভন্তে, উত্তরিং কারণং ব্রূহি, যেনাহং কারণেন ওকপ্পেয্য’’ন্তি. ‘‘ইধ, মহারাজ, পুরিসো দট্ঠৰিসেন আসীৰিসেন দট্ঠো ভৰেয্য, সো তেন ৰিসৰিকারেন পতেয্য উপ্পতেয্য ৰট্টেয্য পৰট্টেয্য, অথঞ্ঞতরো পুরিসো বলৰন্তেন মন্তপদেন তং দট্ঠৰিসং আসীৰিসং আনেত্ৰা তং দট্ঠৰিসং পচ্চাচমাপেয্য, অপি নু খো, মহারাজ, তস্স ৰিসগতস্স পুরিসস্স তস্মিং দট্ঠৰিসে সপ্পে সোত্থিহেতু উপগচ্ছন্তে সন্তাসো উপ্পজ্জেয্যা’’তি? ‘‘আম ভন্তে’’তি. ইতি, মহারাজ, তথারূপে অহিম্হি সোত্থিহেতুপি উপগচ্ছন্তে তস্স সন্তাসো উপ্পজ্জতি. এৰমেৰ খো, মহারাজ, নিরযা মুচ্চিতুকামানম্পি নেরযিকানং সন্তানং মরণভযা সন্তাসো উপ্পজ্জতি. অনিট্ঠং, মহারাজ, সব্বসত্তানং মরণং, তস্মা নেরযিকা সত্তা নিরযা পরিমুচ্চিতুকামাপি মচ্চুনো ভাযন্তী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

মচ্চুভাযনাভাযনপঞ্হো ততিযো.

৪. মচ্চুপাসমুত্তিপঞ্হো

৪. ‘‘ভন্তে নাগসেন, ভাসিতম্পেতং ভগৰতা –

‘‘‘ন অন্তলিক্খে ন সমুদ্দমজ্ঝে, ন পব্বতানং ৰিৰরং পৰিস্স;

ন ৰিজ্জতী সো জগতিপ্পদেসো, যত্থট্ঠিতো মুচ্চেয্য মচ্চুপাসা’তি.

‘‘পুন ভগৰতা পরিত্তা চ উদ্দিট্ঠা. সেয্যথিদং, রতনসুত্তং মেত্তসুত্তং খন্ধপরিত্তং মোরপরিত্তং ধজগ্গপরিত্তং আটানাটিযপরিত্তং অঙ্গুলিমালপরিত্তং. যদি, ভন্তে নাগসেন, আকাসগতোপি সমুদ্দমজ্ঝগতোপি পাসাদকুটিলেণগুহাপব্ভারদরিবিলগিরি ৰিৰরপব্বতন্তরগতোপি ন মুচ্চতি মচ্চুপাসা, তেন হি পরিত্তকম্মং মিচ্ছা. যদি পরিত্তকরণেন মচ্চুপাসা পরিমুত্তি ভৰতি, তেন হি ‘ন অন্তলিক্খে…পে… মচ্চুপাসা’তি তম্পি ৰচনং মিচ্ছা. অযম্পি উভতো কোটিকো পঞ্হো গণ্ঠিতোপি গণ্ঠিতরো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘ন অন্তলিক্খে…পে… মচ্চুপাসা’তি, পরিত্তা চ ভগৰতা উদ্দিট্ঠা, তঞ্চ পন সাৰসেসাযুকস্স ৰযসম্পন্নস্স অপেতকম্মাৰরণস্স, নত্থি, মহারাজ, খীণাযুকস্স ঠিতিযা কিরিযা ৰা উপক্কমো ৰা.

‘‘যথা মহারাজ মতস্স রুক্খস্স সুক্খস্স কোল়াপস্স নিস্নেহস্স উপরুদ্ধজীৰিতস্স গতাযুসঙ্খারস্স কুম্ভসহস্সেনপি উদকে আকিরন্তে অল্লত্তং ৰা পল্লৰিতহরিতভাৰো ৰা ন ভৰেয্য. এৰমেৰ খো, মহারাজ, ভেসজ্জপরিত্তকম্মেন নত্থি খীণাযুকস্স ঠিতিযা কিরিযা ৰা উপক্কমো ৰা, যানি তানি, মহারাজ, মহিযা ওসধানি ভেসজ্জানি, তানিপি খীণাযুকস্স অকিচ্চকরানি ভৰন্তি. সাৰসেসাযুকং, মহারাজ, ৰযসম্পন্নং অপেতকম্মাৰরণং পরিত্তং রক্খতি গোপেতি, তস্সত্থায ভগৰতা পরিত্তা উদ্দিট্ঠা.

‘‘যথা, মহারাজ, কস্সকো পরিপক্কে ধঞ্ঞে মতে সস্সনাল়ে উদকপ্পৰেসনং ৰারেয্য, যং পন সস্সং তরুণং মেঘসন্নিভং ৰযসম্পন্নং, তং উদকৰড্ঢিযা ৰড্ঢতি. এৰমেৰ খো, মহারাজ, খীণাযুকস্স ভেসজ্জপরিত্তকিরিযা ঠপিতা পটিক্খিত্তা, যে পন তে মনুস্সা সাৰসেসাযুকা ৰযসম্পন্না, তেসং অত্থায পরিত্তভেসজ্জানি ভণিতানি, তে পরিত্তভেসজ্জেহি ৰড্ঢন্তী’’তি.

‘‘যদি, ভন্তে নাগসেন, খীণাযুকো মরতি, সাৰসেসাযুকো জীৰতি, তেন হি পরিত্তভেসজ্জানি নিরত্থকানি হোন্তী’’তি? ‘‘দিট্ঠপুব্বো পন তযা, মহারাজ, কোচি রোগো ভেসজ্জেহি পটিনিৰত্তিতো’’তি? ‘‘আম, ভন্তে, অনেকসতানি দিট্ঠানী’’তি. ‘‘তেন হি, মহারাজ, ‘পরিত্তভেসজ্জকিরিযা নিরত্থকা’তি যং ৰচনং, তং মিচ্ছা ভৰতী’’তি.

‘‘দিস্সন্তি, ভন্তে নাগসেন, ৰেজ্জানং উপক্কমা ভেসজ্জপানানুলেপা, তেন তেসং উপক্কমেন রোগো পটিনিৰত্ততী’’তি. ‘‘পরিত্তানম্পি, মহারাজ, পৰত্তীযমানানং সদ্দো সুয্যতি, জিৰ্হা সুক্খতি, হদযং ব্যাৰট্টতি, কণ্ঠো আতুরতি. তেন তেসং পৰত্তেন সব্বে ব্যাধযো ৰূপসমন্তি, সব্বা ঈতিযো অপগচ্ছন্তীতি.

‘‘দিট্ঠপুব্বো পন তযা, মহারাজ, কোচি অহিনা দট্ঠো মন্তপদেন ৰিসং পাতীযমানো ৰিসং চিক্খস্সন্তো উদ্ধমধো আচমযমানো’’তি? ‘‘আম, ভন্তে, অজ্জেতরহিপি তং লোকে ৰত্ততী’’তি. ‘‘তেন হি, মহারাজ, ‘পরিত্তভেসজ্জকিরিযা নিরত্থকা’তি যং ৰচনং, তং মিচ্ছা ভৰতি. কতপরিত্তঞ্হি, মহারাজ, পুরিসং ডংসিতুকামো অহি ন ডংসতি, ৰিৰটং মুখং পিদহতি, চোরানং উক্খিত্তলগুল়ম্পি ন সম্ভৰতি, তে লগুল়ং মুঞ্চিত্ৰা পেমং করোন্তি, কুপিতোপি হত্থিনাগো সমাগন্ত্ৰা উপরমতি, পজ্জলিতমহাঅগ্গিক্খন্ধোপি উপগন্ত্ৰা নিব্বাযতি, ৰিসং হলাহলম্পি খাযিতং অগদং সম্পজ্জতি, আহারত্থং ৰা ফরতি, ৰধকা হন্তুকামা উপগন্ত্ৰা দাসভূতা সম্পজ্জন্তি, অক্কন্তোপি পাসো ন সংৰরতি [ন সংচরতি (সী.)].

‘‘সুতপুব্বং পন তযা, মহারাজ, ‘মোরস্স কতপরিত্তস্স সত্তৰস্সসতানি লুদ্দকো নাসক্খি পাসং উপনেতুং, অকতপরিত্তস্স তং যেৰ দিৰসং পাসং উপনেসী’’তি? ‘‘আম, ভন্তে, সুয্যতি, অব্ভুগ্গতো সো সদ্দো সদেৰকে লোকে’’তি. ‘‘তেন হি, মহারাজ ‘পরিত্তভেসজ্জকিরিযা নিরত্থকা’তি যং ৰচনং, তং মিচ্ছা ভৰতি.

‘‘সুতপুব্বং পন তযা, মহারাজ, ‘দানৰো ভরিযং পরিরক্খন্তো সমুগ্গে পক্খিপিত্ৰা গিলিত্ৰা কুচ্ছিনা পরিহরতি, অথেকো ৰিজ্জাধরো তস্স দানৰস্স মুখেন পৰিসিত্ৰা তায সদ্ধিং অভিরমতি, যদা সো দানৰো অঞ্ঞাসি, অথ সমুগ্গং ৰমিত্ৰা ৰিৰরি, সহ সমুগ্গে ৰিৰটে ৰিজ্জাধরো যথাকামং [যেন কামং (ক.)] পক্কামী’’তি? ‘‘আম, ভন্তে, সুয্যতি, অব্ভুগ্গতো সোপি সদ্দো সদেৰকে লোকে’’তি. ‘‘ননু সো, মহারাজ, ৰিজ্জাধরো পরিত্তবলেন [মন্তবলেন (?)] গহণা মুত্তো’’তি. ‘‘আম ভন্তে’’তি. ‘‘তেন হি, মহারাজ, অত্থি পরিত্তবলং.

‘‘সুতপুব্বং পন তযা, মহারাজ, ‘অপরোপি ৰিজ্জাধরো বারাণসিরঞ্ঞো অন্তেপুরে মহেসিযা সদ্ধিং সম্পদুট্ঠো [সংসট্ঠো (সী.)] গহণপ্পত্তো সমানো খণেন অদস্সনং গতো মন্তবলেনা’’তি. ‘‘আম, ভন্তে, সুয্যতী’’তি. ‘‘ননু সো, মহারাজ, ৰিজ্জাধরো পরিত্তবলেন গহণা মুত্তো’’তি? ‘‘আম ভন্তে’’তি. ‘‘তেন হি, মহারাজ, অত্থি পরিত্তবল’’ন্তি.

‘‘ভন্তে নাগসেন, ‘কিং সব্বে যেৰ পরিত্তং রক্খতী’তি? ‘‘একচ্চে, মহারাজ, রক্খতি, একচ্চে ন রক্খতী’’তি. ‘‘তেন হি, ভন্তে নাগসেন, পরিত্তং ন সব্বত্থিক’’ন্তি? ‘‘অপি নু খো, মহারাজ, ভোজনং সব্বেসং জীৰিতং রক্খতী’’তি? ‘‘একচ্চে, ভন্তে, রক্খতি, একচ্চে ন রক্খতী’’তি. ‘‘কিং কারণা’’তি. ‘‘যতো, ভন্তে, একচ্চে তং যেৰ ভোজনং অতিভুঞ্জিত্ৰা ৰিসূচিকায মরন্তী’’তি. ‘‘তেন হি, মহারাজ, ভোজনং ন সব্বেসং জীৰিতং রক্খতী’’তি? ‘‘দ্ৰীহি, ভন্তে নাগসেন, কারণেহি ভোজনং জীৰিতং হরতি অতিভুত্তেন ৰা উস্মাদুব্বলতায ৰা, আযুদদং, ভন্তে নাগসেন, ভোজনং দুরুপচারেন জীৰিতং হরতী’’তি. ‘‘এৰমেৰ খো, মহারাজ, পরিত্তং একচ্চে রক্খতি, একচ্চে ন রক্খতি.

‘‘তীহি, মহারাজ, কারণেহি পরিত্তং ন রক্খতি কম্মাৰরণেন, কিলেসাৰরণেন, অসদ্দহনতায. সত্তানুরক্খণং, মহারাজ, পরিত্তং অত্তনা কতেন আরক্খং জহতি, যথা, মহারাজ, মাতা পুত্তং কুচ্ছিগতং পোসেতি, হিতেন উপচারেন জনেতি, জনযিত্ৰা অসুচিমলসিঙ্ঘাণিকমপনেত্ৰা উত্তমৰরসুগন্ধং উপলিম্পতি, সো অপরেন সমযেন পরেসং পুত্তে অক্কোসন্তে ৰা পহরন্তে ৰা পহারং দেতি. তে তস্স কুজ্ঝিত্ৰা পরিসায আকড্ঢিত্ৰা তং গহেত্ৰা সামিনো উপনেন্তি, যদি পন তস্সা পুত্তো অপরদ্ধো হোতি ৰেলাতিৰত্তো. অথ নং সামিনো মনুস্সা আকড্ঢযমানা দণ্ডমুগ্গরজাণুমুট্ঠীহি তাল়েন্তি পোথেন্তি, অপি নু খো, মহারাজ, তস্স মাতা লভতি আকড্ঢনপরিকড্ঢনং গাহং সামিনো উপনযনং কাতু’’ন্তি? ‘‘ন হি ভন্তে’’তি. ‘‘কেন কারণেন, মহারাজা’’তি. ‘‘অত্তনো, ভন্তে, অপরাধেনা’’তি. ‘‘এৰমেৰ খো, মহারাজ, সত্তানং আরক্খং পরিত্তং অত্তনো অপরাধেন ৰঞ্ঝং করোতী’’তি [কারেতীতি (সী.)]. ‘‘সাধু, ভন্তে নাগসেন, সুৰিনিচ্ছিতো পঞ্হো, গহনং অগহনং কতং, অন্ধকারো আলোকো কতো, ৰিনিৰেঠিতং দিট্ঠিজালং, ত্ৰং গণিৰরপৰরমাসজ্জা’’তি.

মচ্চুপাসমুত্তিপঞ্হো চতুত্থো.

৫. বুদ্ধলাভন্তরাযপঞ্হো

৫. ‘‘ভন্তে নাগসেন, তুম্হে ভণথ ‘লাভী তথাগতো চীৰরপিণ্ডপাতসেনাসনগিলানপ্পচ্চযভেসজ্জপরিক্খারান’ন্তি. পুন চ তথাগতো পঞ্চসালং ব্রাহ্মণগামং পিণ্ডায পৰিসিত্ৰা কিঞ্চিদেৰ অলভিত্ৰা যথাধোতেন পত্তেন নিক্খন্তোতি. যদি, ভন্তে নাগসেন, তথাগতো লাভী চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং, তেন হি পঞ্চসালং ব্রাহ্মণগামং পিণ্ডায পৰিসিত্ৰা কিঞ্চিদেৰ অলভিত্ৰা যথাধোতেন পত্তেন নিক্খন্তোতি যং ৰচনং, তং মিচ্ছা. যদি পঞ্চসালং ব্রাহ্মণগামং পিণ্ডায পৰিসিত্ৰা কিঞ্চিদেৰ অলভিত্ৰা যথাধোতেন পত্তেন নিক্খন্তো, তেন হি লাভী তথাগতো চীৰরপিণ্ডপাতসেনাসনগিলানপ্পচ্চযভেসজ্জপরিক্খারানন্তি তম্পি ৰচনং মিচ্ছা. অযম্পি উভতো কোটিকো পঞ্হো সুমহন্তো দুন্নিব্বেঠো তৰানুপ্পত্তো, সো তযা নিব্বাহিতব্বো’’তি.

‘‘লাভী, মহারাজ, তথাগতো চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং, পঞ্চসালঞ্চ ব্রাহ্মণগামং পিণ্ডায পৰিসিত্ৰা কিঞ্চিদেৰ অলভিত্ৰা যথাধোতেন পত্তেন নিক্খন্তো, তঞ্চ পন মারস্স পাপিমতো কারণা’’তি. ‘‘তেন হি, ভন্তে নাগসেন, ভগৰতো গণনপথং ৰীতিৰত্তকপ্পে [গণনপথৰীতিৰত্তে কপ্পে (সী.)] অভিসঙ্খতং কুসলং কিন্তি নিট্ঠিতং, অধুনুট্ঠিতেন মারেন পাপিমতা তস্স কুসলস্স বলৰেগং [তং কুসলবলৰেগৰিপ্ফারং (সী.)] কিন্তি পিহিতং, তেন হি, ভন্তে নাগসেন, তস্মিং ৰত্থুস্মিং দ্ৰীসু ঠানেসু উপৰাদো আগচ্ছতি, কুসলতোপি অকুসলং বলৰতরং হোতি, বুদ্ধবলতোপি মারবলং বলৰতরং হোতীতি, তেন হি রুক্খস্স মূলতোপি অগ্গং ভারতরং হোতি, গুণসম্পরিকিণ্ণতোপি পাপিযং বলৰতরং হোতী’’তি. ‘‘ন, মহারাজ, তাৰতকেন কুসলতোপি অকুসলং বলৰতরং নাম হোতি, ন বুদ্ধবলতোপি মারবলং বলৰতরং নাম হোতি. অপি চেত্থ কারণং ইচ্ছিতব্বং.

‘‘যথা, মহারাজ, পুরিসো রঞ্ঞো চক্কৰত্তিস্স মধুং ৰা মধুপিণ্ডিকং ৰা অঞ্ঞং ৰা উপাযনং অভিহরেয্য, তমেনং রঞ্ঞো দ্ৰারপালো এৰং ৰদেয্য ‘অকালো, ভো, অযং রঞ্ঞো দস্সনায, তেন হি, ভো, তৰ উপাযনং গহেত্ৰা সীঘসীঘং পটিনিৰত্ত, পুরে তৰ রাজা দণ্ডং ধারেস্সতী’তি [মা তে রাজা দণ্ডং পাপেয্যাতি (সী.)]. ততো সো পুরিসো দণ্ডভযা তসিতো উব্বিগ্গো তং উপাযনং আদায সীঘসীঘং পটিনিৰত্তেয্য, অপি নু খো সো, মহারাজ, রাজা চক্কৰত্তী তাৰতকেন উপাযনৰিকলমত্তকেন দ্ৰারপালতো দুব্বলতরো নাম হোতি, অঞ্ঞং ৰা পন কিঞ্চি উপাযনং ন লভেয্যা’’তি? ‘‘ন হি, ভন্তে, ইস্সাপকতো সো, ভন্তে, দ্ৰারপালো উপাযনং নিৰারেসি, অঞ্ঞেন পন দ্ৰারেন সতসহস্সগুণম্পি রঞ্ঞো উপাযনং উপেতী’’তি. ‘‘এৰমেৰ খো, মহারাজ, ইস্সাপকতো মারো পাপিমা পঞ্চসালকে ব্রাহ্মণগহপতিকে অন্ৰাৰিসি, অঞ্ঞানি পন অনেকানি দেৰতাসতসহস্সানি অমতং দিব্বং ওজং গহেত্ৰা উপগতানি ‘ভগৰতো কাযে ওজং ওদহিস্সামা’তি ভগৰন্তং নমস্সমানানি পঞ্জলিকানি ঠিতানী’’তি.

‘‘হোতু, ভন্তে নাগসেন, সুলভা ভগৰতো চত্তারো পচ্চযা লোকে উত্তমপুরিসস্স, যাচিতোৰ ভগৰা দেৰমনুস্সোহি চত্তারো পচ্চযে পরিভুঞ্জতি, অপি চ খো পন মারস্স যো অধিপ্পাযো, সো তাৰতকেন সিদ্ধো, যং সো ভগৰতো ভোজনস্স অন্তরাযমকাসি. এত্থ মে, ভন্তে, কঙ্খা ন ছিজ্জতি, ৰিমতিজাতোহং তত্থ সংসযপক্খন্দো. ন মে তত্থ মানসং পক্খন্দতি, যং তথাগতস্স অরহতো সম্মাসম্বুদ্ধস্স সদেৰকে লোকে অগ্গপুগ্গলৰরস্স কুসলৰরপুঞ্ঞসম্ভৰস্স অসমসমস্স অনুপমস্স অপ্পটিসমস্স ছৰকং লামকং পরিত্তং পাপং অনরিযং ৰিপন্নং মারো লাভন্তরাযমকাসী’’তি.

‘‘চত্তারো খো, মহারাজ, অন্তরাযা অদিট্ঠন্তরাযো উদ্দিস্স কতন্তরাযো উপক্খটন্তরাযো পরিভোগন্তরাযোতি. তত্থ কতমো অদিট্ঠন্তরাযো? অনোদিস্স অদস্সনেন অনভিসঙ্খতং কোচি অন্তরাযং করোতি ‘কিং পরস্স দিন্নেনা’তি, অযং অদিট্ঠন্তরাযো নাম.

‘‘কতমো উদ্দিস্স কতন্তরাযো? ইধেকচ্চং পুগ্গলং উপদিসিত্ৰা উদ্দিস্স ভোজনং পটিযত্তং হোতি, তং কোচি অন্তরাযং করোতি, অযং উদ্দিস্স কতন্তরাযো নাম.

‘‘কতমো উপক্খটন্তরাযো? ইধ যং কিঞ্চি উপক্খটং হোতি অপ্পটিগ্গহিতং, তত্থ কোচি অন্তরাযং করোতি, অযং উপক্খটন্তরাযো নাম.

‘‘কতমো পরিভোগন্তরাযো? ইধ যং কিঞ্চি পরিভোগং, তত্থ কোচি অন্তরাযং করোতি, অযং পরিভোগন্তরাযো নাম. ইমে খো, মহারাজ, চত্তারো অন্তরাযা.

‘‘যং পন মারো পাপিমা পঞ্চসালকে ব্রাহ্মণগহপতিকে অন্ৰাৰিসি, তং নেৰ ভগৰতো পরিভোগং ন উপক্খটং ন উদ্দিস্সকতং, অনাগতং অসম্পত্তং অদস্সনেন অন্তরাযং কতং, তং পন নেকস্স ভগৰতো যেৰ, অথ খো যে তে তেন সমযেন নিক্খন্তা অব্ভাগতা, সব্বেপি তে তং দিৰসং ভোজনং ন লভিংসু, নাহং তং, মহারাজ, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যো তস্স ভগৰতো উদ্দিস্স কতং উপক্খটং পরিভোগং অন্তরাযং করেয্য. সচে কোচি ইস্সায উদ্দিস্স কতং উপক্খটং পরিভোগং অন্তরাযং করেয্য, ফলেয্য তস্স মুদ্ধা সতধা ৰা সহস্সধা ৰা.

‘‘চত্তারোমে, মহারাজ, তথাগতস্স কেনচি অনাৰরণীযা গুণা. কতমে চত্তারো? লাভো, মহারাজ, ভগৰতো উদ্দিস্স কতো উপক্খটো ন সক্কা কেনচি অন্তরাযং কাতুং; সরীরানুগতা, মহারাজ, ভগৰতো ব্যামপ্পভা ন সক্কা কেনচি অন্তরাযং কাতুং; সব্বঞ্ঞুতং, মহারাজ, ভগৰতো ঞাণরতনং ন সক্কা কেনচি অন্তরাযং কাতুং; জীৰিতং, মহারাজ, ভগৰতো ন সক্কা কেনচি অন্তরাযং কাতুং. ইমে খো, মহারাজ, চত্তারো তথাগতস্স কেনচি অনাৰরণীযা গুণা, সব্বেপেতে, মহারাজ, গুণা একরসা অরোগা অকুপ্পা অপরূপক্কমা অফুসানি কিরিযানি. অদস্সনেন, মহারাজ, মারো পাপিমা নিলীযিত্ৰা পঞ্চসালকে ব্রাহ্মণগহপতিকে অন্ৰাৰিসি.

‘‘যথা, মহারাজ, রঞ্ঞো পচ্চন্তে দেসে ৰিসমে অদস্সনেন নিলীযিত্ৰা চোরা পন্থং দূসেন্তি. যদি পন রাজা তে চোরে পস্সেয্য, অপি নু খো তে চোরা সোত্থিং লভেয্যু’’ন্তি? ‘‘ন হি, ভন্তে, ফরসুনা ফালাপেয্য সতধা ৰা সহস্সধা ৰা’’তি. ‘‘এৰমেৰ খো, মহারাজ, অদস্সনেন মারো পাপিমা নিলীযিত্ৰা পঞ্চসালকে ব্রাহ্মণগহপতিকে অন্ৰাৰিসি.

‘‘যথা ৰা পন, মহারাজ, ইত্থী সপতিকা অদস্সনেন নিলীযিত্ৰা পরপুরিসং সেৰতি, এৰমেৰ খো, মহারাজ, অদস্সনেন মারো পাপিমা নিলীযিত্ৰা পঞ্চসালকে ব্রাহ্মণগহপতিকে অন্ৰাৰিসি. যদি, মহারাজ, ইত্থী সামিকস্স সম্মুখা পরপুরিসং সেৰতি, অপি নু খো সা ইত্থী সোত্থিং লভেয্যা’’তি? ‘‘ন হি, ভন্তে, হনেয্যাপি তং, ভন্তে, সামিকো ৰধেয্যাপি বন্ধেয্যাপি দাসিত্তং ৰা উপনেয্যা’’তি. ‘‘এৰমেৰ খো, মহারাজ, অদস্সনেন মারো পাপিমা নিলীযিত্ৰা পঞ্চসালকে ব্রাহ্মণগহপতিকে অন্ৰাৰিসি. যদি, মহারাজ, মারো পাপিমা ভগৰতো উদ্দিস্স কতং উপক্খটং পরিভোগং অন্তরাযং করেয্য, ফলেয্য তস্স মুদ্ধা সতধা ৰা সহস্সধা ৰা’’তি. ‘‘এৰমেতং, ভন্তে নাগসেন, চোরিকায কতং মারেন পাপিমতা, নিলীযিত্ৰা মারো পাপিমা পঞ্চসালকে ব্রাহ্মণগহপতিকে অন্ৰাৰিসি. সচে সো, ভন্তে, মারো পাপিমা ভগৰতো উদ্দিস্স কতং উপক্খটং পরিভোগং অন্তরাযং করেয্য, মুদ্ধা ৰাস্স ফলেয্য সতধা ৰা সহস্সধা ৰা, কাযো ৰাস্স ভুসমুট্ঠি ৰিয ৰিকিরেয্য, সাধু, ভন্তে নাগসেন, এৰমেতং তথা সম্পটিচ্ছামী’’তি.

বুদ্ধলাভন্তরাযপঞ্হো পঞ্চমো.

৬. অপুঞ্ঞপঞ্হো

৬. ‘‘ভন্তে নাগসেন, তুম্হে ভণথ ‘যো অজানন্তো পাণাতিপাতং করোতি, সো বলৰতরং অপুঞ্ঞং পসৰতী’তি. পুন চ ভগৰতা ৰিনযপঞ্ঞত্তিযা ভণিতং ‘অনাপত্তি অজানন্তস্সা’তি. যদি, ভন্তে নাগসেন, অজানিত্ৰা পাণাতিপাতং করোন্তো বলৰতরং অপুঞ্ঞং পসৰতি, তেন হি ‘অনাপত্তি অজানন্তস্সা’তি যং ৰচনং, তং মিচ্ছা. যদি অনাপত্তি অজানন্তস্স, তেন হি ‘অজানিত্ৰা পাণাতিপাতং করোন্তো বলৰতরং অপুঞ্ঞং পসৰতী’তি তম্পি ৰচনং মিচ্ছা. অযম্পি উভতো কোটিকো পঞ্হো দুরুত্তরো দুরতিক্কমো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘যো অজানন্তো পাণাতিপাতং করোতি, সো বলৰতরং অপুঞ্ঞং পসৰতী’তি. পুন চ ৰিনযপঞ্ঞত্তিযা ভগৰতা ভণিতং ‘অনাপত্তি অজানন্তস্সা’তি. তত্থ অত্থন্তরং অত্থি. কতমং অত্থন্তরং? অত্থি, মহারাজ, আপত্তি সঞ্ঞাৰিমোক্খা, অত্থি আপত্তি নোসঞ্ঞাৰিমোক্খা. যাযং, মহারাজ, আপত্তি সঞ্ঞাৰিমোক্খা, তং আপত্তিং আরব্ভ ভগৰতা ভণিতং ‘অনাপত্তি অজানন্তস্সা’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

অপুঞ্ঞপঞ্হো ছট্ঠো.

৭. ভিক্খুসঙ্ঘপরিহরণপঞ্হো

৭. ‘‘ভন্তে নাগসেন, ভাসিতম্পেতং ভগৰতা ‘তথাগতস্স খো, আনন্দ, ন এৰং হোতি ‘‘অহং ভিক্খুসঙ্ঘং পরিহরিস্সামী’’’তি ৰা, ‘‘মমুদ্দেসিকো ভিক্খুসঙ্ঘো’’তি ৰা’তি. পুন চ মেত্তেয্যস্স ভগৰতো সভাৰগুণং পরিদীপযমানেন ভগৰতা এৰং ভণিতং ‘‘সো অনেকসহস্সং ভিক্খুসঙ্ঘং পরিহরিস্সতি, সেয্যথাপি অহং এতরহি অনেকসতং ভিক্খুসঙ্ঘং পরিহরামী’’তি. যদি, ভন্তে নাগসেন, ভগৰতা ভণিতং ‘তথাগতস্স খো, আনন্দ, ন এৰং হোতি ‘‘অহং ভিক্খুসঙ্ঘং পরিহরিস্সামী’’তি ৰা, ‘‘মমুদ্দেসিকো ভিক্খুসঙ্ঘো’’তি ৰা’তি, তেন হি অনেকসতং ভিক্খুসঙ্ঘং পরিহরামীতি যং ৰচনং, তং মিচ্ছা. যদি তথাগতেন ভণিতং ‘সো অনেকসহস্সং ভিক্খুসঙ্ঘং পরিহরিস্সতি, সেয্যথাপি অহং এতরহি অনেকসতং ভিক্খুসঙ্ঘং পরিহরামী’তি, তেন হি তথাগতস্স খো, আনন্দ, ন এৰং হোতি ‘অহং ভিক্খুসঙ্ঘং পরিহরিস্সামী’তি ৰা, ‘মমুদ্দেসিকো ভিক্খুসঙ্ঘো’তি ৰাতি তম্পি ৰচনং মিচ্ছা, অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘তথাগতস্স খো, আনন্দ, ন এৰং হোতি ‘‘অহং ভিক্খুসঙ্ঘং পরিহরিস্সামী’’তি ৰা, ‘‘মমুদ্দেসিকো ভিক্খুসঙ্ঘো’’তি ৰা’তি. পুন চ মেত্তেয্যস্সাপি ভগৰতো সভাৰগুণং পরিদীপযমানেন ভগৰতা ভণিতং ‘সো অনেকসহস্সং ভিক্খুসঙ্ঘং পরিহরিস্সতি, সেয্যথাপি অহং এতরহি অনেকসতং ভিক্খুসঙ্ঘং পরিহরামী’তি. এতস্মিঞ্চ, মহারাজ, পঞ্হে একো অত্থো সাৰসেসো, একো অত্থো নিরৰসেসো. ন, মহারাজ, তথাগতো পরিসায অনুগামিকো, পরিসা পন তথাগতস্স অনুগামিকা. সম্মুতি, মহারাজ, এসা ‘অহ’ন্তি ‘মমা’তি, ন পরমত্থো এসো, ৰিগতং, মহারাজ, তথাগতস্স পেমং, ৰিগতো সিনেহো, ‘ময্হ’ন্তিপি তথাগতস্স গহণং নত্থি, উপাদায পন অৰস্সযো হোতি.

‘‘যথা, মহারাজ, পথৰী ভূমট্ঠানং সত্তানং পতিট্ঠা হোতি উপস্সযং, পথৰিট্ঠা চেতে সত্তা, ন চ মহাপথৰিযা ‘ময্হেতে’তি অপেক্খা হোতি, এৰমেৰ খো, মহারাজ, তথাগতো সব্বসত্তানং পতিট্ঠা হোতি উপস্সযং, তথাগতট্ঠা [তথাগতপতিট্ঠা এৰ (সী.)] চেতে সত্তা, ন চ তথাগতস্স ‘ময্হেতে’তি অপেক্খা হোতি. যথা ৰা পন, মহারাজ, মহতিমহামেঘো অভিৰস্সন্তো তিণরুক্খপসুমনুস্সানং ৰুড্ঢিং দেতি সন্ততিং অনুপালেতি. ৰুট্ঠূপজীৰিনো চেতে সত্তা সব্বে, ন চ মহামেঘস্স ‘ময্হেতে’তি অপেক্খা হোতি. এৰমেৰ খো, মহারাজ, তথাগতো সব্বসত্তানং কুসলধম্মে জনেতি অনুপালেতি, সত্থূপজীৰিনো চেতে সত্তা সব্বে, ন চ তথাগতস্স ‘ময্হেতে’তি অপেক্খা হোতি. তং কিস্স হেতু? অত্তানুদিট্ঠিযা পহীনত্তা’’তি.

‘‘সাধু, ভন্তে নাগসেন, সুনিব্বেঠিতো পঞ্হো বহুৰিধেহি কারণেহি, গম্ভীরো উত্তানীকতো, গণ্ঠি ভিন্নো, গহনং অগহনং কতং, অন্ধকারো আলোকো কতো, ভগ্গা পরৰাদা, জিনপুত্তানং চক্খুং উপ্পাদিত’’ন্তি.

ভিক্খুসঙ্ঘপরিহরণপঞ্হো সত্তমো.

৮. অভেজ্জপরিসপঞ্হো

৮. ‘‘ভন্তে নাগসেন, তুম্হে ভণথ ‘তথাগতো অভেজ্জপরিসো’তি, পুন চ ভণথ ‘দেৰদত্তেন একপ্পহারং পঞ্চ ভিক্খুসতানি ভিন্নানী’তি. যদি, ভন্তে নাগসেন, তথাগতো অভেজ্জপরিসো, তেন হি দেৰদত্তেন একপ্পহারং পঞ্চ ভিক্খুসতানি ভিন্নানীতি যং ৰচনং, তং মিচ্ছা. যদি দেৰদত্তেন একপ্পহারং পঞ্চ ভিক্খুসতানি ভিন্নানি, তেন হি ‘তথাগতো অভেজ্জপরিসো’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, গম্ভীরো দুন্নিৰেঠিযো, গণ্ঠিতোপি গণ্ঠিতরো, এত্থাযং জনো আৰটো নিৰুতো ওৰুতো পিহিতো পরিযোনদ্ধো, এত্থ তৰ ঞাণবলং দস্সেহি পরৰাদেসূ’’তি.

‘‘অভেজ্জপরিসো, মহারাজ, তথাগতো, দেৰদত্তেন চ একপ্পহারং পঞ্চ ভিক্খুসতানি ভিন্নানি, তঞ্চ পন ভেদকস্স বলেন, ভেদকে ৰিজ্জমানে নত্থি, মহারাজ, অভেজ্জং নাম. ভেদকে সতি মাতাপি পুত্তেন ভিজ্জতি, পুত্তোপি মাতরা ভিজ্জতি, পিতাপি পুত্তেন ভিজ্জতি, পুত্তোপি পিতরা ভিজ্জতি, ভাতাপি ভগিনিযা ভিজ্জতি, ভগিনীপি ভাতরা ভিজ্জতি, সহাযোপি সহাযেন ভিজ্জতি, নাৰাপি নানাদারুসঙ্ঘটিতা ঊমিৰেগসম্পহারেন ভিজ্জতি, রুক্খোপি মধুকপ্পসম্পন্নফলো অনিলবলৰেগাভিহতো ভিজ্জতি, সুৰণ্ণম্পি জাতিমন্তং [জাতরূপম্পি (সী.)] লোহেন ভিজ্জতি. অপি চ, মহারাজ, নেসো অধিপ্পাযো ৰিঞ্ঞূনং, নেসা বুদ্ধানং অধিমুত্তি, নেসো পণ্ডিতানং ছন্দো ‘তথাগতো ভেজ্জপরিসো’তি. অপি চেত্থ কারণং অত্থি, যেন কারণেন তথাগতো ৰুচ্চতি ‘অভেজ্জপরিসো’তি. কতমং এত্থ কারণং? তথাগতস্স, মহারাজ, কতেন অদানেন ৰা অপ্পিযৰচনেন ৰা অনত্থচরিযায ৰা অসমানত্ততায ৰা যতো কুতোচি চরিযং চরন্তস্সপি পরিসা ভিন্নাতি ন সুতপুব্বং, তেন কারণেন তথাগতো ৰুচ্চতি ‘অভেজ্জপরিসো’তি. তযাপেতং, মহারাজ, ঞাতব্বং ‘অত্থি কিঞ্চি নৰঙ্গে বুদ্ধৰচনে সুত্তাগতং, ইমিনা নাম কারণেন বোধিসত্তস্স কতেন তথাগতস্স পরিসা ভিন্না’তি? ‘‘নত্থি ভন্তে, নো চেতং লোকে দিস্সতি নোপি সুয্যতি. সাধু, ভন্তে নাগসেন, এৰমেতং তথা সম্পটিচ্ছামী’’তি.

অভেজ্জপরিসপঞ্হো অট্ঠমো.

অভেজ্জৰগ্গো দুতিযো.

ইমস্মিং ৰগ্গে অট্ঠ পঞ্হা.