৯. সংসারপঞ্হো

৯. রাজা আহ ‘‘ভন্তে নাগসেন, যং পনেতং ব্রূসি ‘সংসারো’তি, কতমো সো সংসারো’’তি? ‘‘ইধ, মহারাজ, জাতো ইধেৰ মরতি, ইধ মতো অঞ্ঞত্র উপ্পজ্জতি, তহিং জাতো তহিং যেৰ মরতি, তহিং মতো অঞ্ঞত্র উপ্পজ্জতি, এৰং খো, মহারাজ, সংসারো হোতী’’তি. ‘‘ওপম্মং করোহী’’তি. ‘‘যথা, মহারাজ, কোচিদেৰ পুরিসো পক্কং অম্বং খাদিত্ৰা অট্ঠিং রোপেয্য, ততো মহন্তো অম্বরুক্খো নিব্বত্তিত্ৰা ফলানি দদেয্য, অথ সো পুরিসো ততোপি পক্কং অম্বং খাদিত্ৰা অট্ঠিং রোপেয্য, ততোপি মহন্তো অম্বরুক্খো নিব্বত্তিত্ৰা ফলানি দদেয্য, এৰমেতেসং রুক্খানং কোটি ন পঞ্ঞাযতি, এৰমেৰ খো, মহারাজ, ইধ জাতো ইধেৰ মরতি, ইধ মতো অঞ্ঞত্র উপ্পজ্জতি, তহিং জাতো তহিং যেৰ মরতি, তহিং মতো অঞ্ঞত্র উপ্পজ্জতি, এৰং খো, মহারাজ, সংসারো হোতী’’তি.

‘‘কল্লোসি, ভন্তে নাগসেনা’’তি.

সংসারপঞ্হো নৰমো.