৭. সরাগৰীতরাগনানাকরণপঞ্হো

৭. রাজা আহ ‘‘ভন্তে নাগসেন, কিং নানাকরণং সরাগস্স চ ৰীতরাগস্স চা’’তি? ‘‘একো খো, মহারাজ, অজ্ঝোসিতো, একো অনজ্ঝোসিতো’’তি. ‘‘কিং এতং, ভন্তে, অজ্ঝোসিতো অনজ্ঝোসিতো নামা’’তি? ‘‘একো খো, মহারাজ, অত্থিকো, একো অনত্থিকো’’তি. ‘‘পস্সামহং, ভন্তে, এৰরূপং যো চ সরাগো, যো চ ৰীতরাগো, সব্বোপেসো সোভনং যেৰ ইচ্ছতি খাদনীযং ৰা ভোজনীযং ৰা, ন কোচি পাপকং ইচ্ছতী’’তি. ‘‘অৰীতরাগো খো, মহারাজ, রসপটিসংৰেদী চ রসরাগপটিসংৰেদী চ ভোজনং ভুঞ্জতি, ৰীতরাগো পন রসপটিসংৰেদী ভোজনং ভুঞ্জতি, নো চ খো রসরাগপটিসংৰেদী’’তি.

‘‘কল্লোসি, ভন্তে নাগসেনা’’তি.

সরাগৰীতরাগনানাকরণপঞ্হো সত্তমো.