৩. মহাপুরিসলক্খণপঞ্হো

৩. রাজা আহ ‘‘ভন্তে নাগসেন, বুদ্ধো দ্ৰত্তিংসমহাপুরিসলক্খণেহি সমন্নাগতো অসীতিযা চ অনুব্যঞ্জনেহি পরিরঞ্জিতো সুৰণ্ণৰণ্ণো কঞ্চনসন্নিভত্তচো ব্যামপ্পভো’’তি? ‘‘আম, মহারাজ, ভগৰা দ্ৰত্তিংসমহাপুরিসলক্খণেহি সমন্নাগতো অসীতিযা চ অনুব্যঞ্জনেহি পরিরঞ্জিতো সুৰণ্ণৰণ্ণো কঞ্চনসন্নিভত্তচো ব্যামপ্পভো’’তি.

‘‘কিং পনস্স, ভন্তে, মাতাপিতরোপি দ্ৰত্তিংসমহাপুরিসলক্খণেহি সমন্নাগতা অসীতিযা চ অনুব্যঞ্জনেহি পরিরঞ্জিতা সুৰণ্ণৰণ্ণা কঞ্চনসন্নিভত্তচা ব্যামপ্পভা’’তি? ‘‘নো চস্স, মহারাজ, মাতাপিতরো দ্ৰত্তিংসমহাপুরিসলক্খণেহি সমন্নাগতা অসীতিযা চ অনুব্যঞ্জনেহি পরিরঞ্জিতা সুৰণ্ণৰণ্ণা কঞ্চনসন্নিভত্তচা ব্যামপ্পভা’’তি.

‘‘এৰং সন্তে খো, ভন্তে নাগসেন, ন উপ্পজ্জতি বুদ্ধো দ্ৰত্তিংসমহাপুরিসলক্খণেহি সমন্নাগতো অসীতিযা চ অনুব্যঞ্জনেহি পরিরঞ্জিতো সুৰণ্ণৰণ্ণো কঞ্চনসন্নিভত্তচো ব্যামপ্পভোতি, অপি চ মাতুসদিসো ৰা পুত্তো হোতি মাতুপক্খো ৰা, পিতুসদিসো ৰা পুত্তো হোতি পিতুপক্খো ৰা’’তি. থেরো আহ ‘‘অত্থি পন, মহারাজ, কিঞ্চি পদুমং সতপত্ত’’ন্তি? ‘‘আম, ভন্তে, অত্থী’’তি. ‘‘তস্স পন কুহিং সম্ভৰো’’তি? ‘‘কদ্দমে জাযতি উদকে আসীযতী’’তি. ‘‘কিংনু খো, মহারাজ, পদুমং কদ্দমেন সদিসং ৰণ্ণেন ৰা গন্ধেন ৰা রসেন ৰা’’তি? ‘‘ন হি, ভন্তে’’তি. ‘‘অথ উদকেন ৰা গন্ধেন ৰা রসেন ৰা’’তি? ‘‘ন হি, ভন্তে’’তি. ‘‘এৰমেৰ খো, মহারাজ, ভগৰা দ্ৰত্তিংসমহাপুরিসলক্খণেহি সমন্নাগতো অসীতিযা চ অনুব্যঞ্জনেহি পরিরঞ্জিতো সুৰণ্ণৰণ্ণো কঞ্চনসন্নিভত্তচো ব্যামপ্পভো, নো চস্স মাতাপিতরো দ্ৰত্তিংসমহাপুরিসলক্খণেহি সমন্নাগতা অসীতিযা চ অনুব্যঞ্জনেহি পরিরঞ্জিতা সুৰণ্ণৰণ্ণা কঞ্চনসন্নিভত্তচা ব্যামপ্পভা’’তি.

‘‘কল্লোসি, ভন্তে নাগসেনা’’তি.

মহাপুরিসলক্খণপঞ্হো ততিযো.