৮. কম্মফলঅত্থিভাৰপঞ্হো

৮. রাজা আহ ‘‘ভন্তে নাগসেন, ইমিনা নামরূপেন কম্মং কতং কুসলং ৰা অকুসলং ৰা, কুহিং তানি কম্মানি তিট্ঠন্তী’’তি? ‘‘অনুবন্ধেয্যুং খো, মহারাজ, তানি কম্মানি ছাযাৰ অনপাযিনী’’তি [অনুপাযিনীতি (ক.)]. ‘‘সক্কা পন, ভন্তে, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি? ‘‘ন সক্কা, মহারাজ, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি.

‘‘ওপম্মং করোহী’’তি. ‘‘তং কিং মঞ্ঞসি, মহারাজ, যানিমানি রুক্খানি অনিব্বত্তফলানি, সক্কা তেসং ফলানি দস্সেতুং ‘ইধ ৰা ইধ ৰা তানি ফলানি তিট্ঠন্তী’’’তি. ‘‘ন হি, ভন্তে’’তি. ‘‘এৰমেৰ খো, মহারাজ, অব্বোচ্ছিন্নায সন্ততিযা ন সক্কা তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’তি.

‘‘কল্লোসি, ভন্তে নাগসেনা’’তি.

কম্মফলঅত্থিভাৰপঞ্হো অট্ঠমো.