৫. বুদ্ধৰগ্গো

১. বুদ্ধস্স অত্থিনত্থিভাৰপঞ্হো

১. রাজা আহ ‘‘ভন্তে নাগসেন, বুদ্ধো তযা দিট্ঠো’’তি? ‘‘ন হি, মহারাজা’’তি. ‘‘অথ তে আচরিযেহি বুদ্ধো দিট্ঠো’’তি? ‘‘ন হি, মহারাজা’’তি. ‘‘তেন হি, ভন্তে নাগসেন, নত্থি বুদ্ধো’’তি. ‘‘কিং পন, মহারাজ, হিমৰতি ঊহা নদী তযা দিট্ঠা’’তি? ‘‘ন হি, ভন্তে’’তি. ‘‘অথ তে পিতরা ঊহা নদী দিট্ঠা’’তি? ‘‘ন হি, ভন্তে’’তি. ‘‘তেন হি, মহারাজ, নত্থি ঊহা নদী’’তি. ‘‘অত্থি, ভন্তে, কিঞ্চাপি মযা ঊহা নদী ন দিট্ঠা, পিতরাপি মে ঊহা নদী ন দিট্ঠা, অপি চ অত্থি ঊহা নদী’’তি. ‘‘এৰমেৰ খো, মহারাজ, কিঞ্চাপি মযা ভগৰা ন দিট্ঠো, আচরিযেহিপি মে ভগৰা ন দিট্ঠো, অপি চ অত্থি ভগৰা’’তি.

‘‘কল্লোসি, ভন্তে নাগসেনা’’তি.

বুদ্ধস্স অত্থিনত্থিভাৰপঞ্হো পঠমো.

২. বুদ্ধস্স অনুত্তরভাৰপঞ্হো

২. রাজা আহ ‘‘ভন্তে নাগসেন, বুদ্ধো অনুত্তরো’’তি? ‘‘আম, মহারাজ, ভগৰা অনুত্তরো’’তি. ‘‘কথং, ভন্তে নাগসেন, অদিট্ঠপুব্বং জানাসি ‘বুদ্ধো অনুত্তরো’’’তি? ‘‘তং কিং মঞ্ঞসি, মহারাজ, যেহি অদিট্ঠপুব্বো মহাসমুদ্দো, জানেয্যুং তে, মহারাজ, মহন্তো খো মহাসমুদ্দো গম্ভীরো অপ্পমেয্যো দুপ্পরিযোগাহো, যত্থিমা পঞ্চ মহানদিযো সততং সমিতং অপ্পেন্তি, সেয্যথিদং, গঙ্গা যমুনা অচিরৰতী সরভূ মহী, নেৰ তস্স ঊনত্তং ৰা পূরত্তং ৰা পঞ্ঞাযতী’’তি? ‘‘আম, ভন্তে, জানেয্যু’’ন্তি. ‘‘এৰমেৰ খো, মহারাজ, সাৰকে মহন্তে পরিনিব্বুতে পস্সিত্ৰা জানামি ‘ভগৰা অনুত্তরো’’’তি.

‘‘কল্লোসি, ভন্তে নাগসেনা’’তি.

বুদ্ধস্স অনুত্তরভাৰপঞ্হো দুতিযো.

৩. বুদ্ধস্স অনুত্তরভাৰজাননপঞ্হো

৩. রাজা আহ ‘‘ভন্তে নাগসেন, সক্কা জানিতুং ‘বুদ্ধো অনুত্তরো’’’তি? ‘‘আম, মহারাজ, সক্কা জানিতুং ‘ভগৰা অনুত্তরো’’’তি. ‘‘কথং, ভন্তে নাগসেন, সক্কা জানিতুং ‘বুদ্ধো অনুত্তরো’’’তি. ‘‘ভূতপুব্বং, মহারাজ, তিস্সত্থেরো নাম লেখাচরিযো অহোসি, বহূনি ৰস্সানি অব্ভতীতানি কালঙ্কতস্স কথং সো ঞাযতী’’তি. ‘‘লেখেন ভন্তে’’তি. ‘‘এৰমেৰ খো, মহারাজ, যো ধম্মং পস্সতি, সো ভগৰন্তং পস্সতি, ধম্মো হি, মহারাজ, ভগৰতা দেসিতো’’তি.

‘‘কল্লোসি, ভন্তে নাগসেনা’’তি.

বুদ্ধস্স অনুত্তরভাৰজাননপঞ্হো ততিযো.

৪. ধম্মদিট্ঠপঞ্হো

৪. রাজা আহ ‘‘ভন্তে নাগসেন, ধম্মো তযা দিট্ঠো’’তি. ‘‘বুদ্ধনেত্তিযা খো, মহারাজ, বুদ্ধপঞ্ঞত্তিযা যাৰজীৰং সাৰকেহি ৰত্তিতব্ব’’ন্তি.

‘‘কল্লোসি, ভন্তে নাগসেনা’’তি.

ধম্মদিট্ঠপঞ্হো চতুত্থো.

৫. অসঙ্কমনপটিসন্দহনপঞ্হো

৫. রাজা আহ ‘‘ভন্তে নাগসেন, ন চ সঙ্কমতি পটিসন্দহতি চা’’তি? ‘‘আম, মহারাজ, ন চ সঙ্কমতি পটিসন্দহতি চা’’তি. ‘‘কথং, ভন্তে নাগসেন, ন চ সঙ্কমতি পটিসন্দহতি চ, ওপম্মং করোহী’’তি? ‘‘যথা, মহারাজ, কোচিদেৰ পুরিসো পদীপতো পদীপং পদীপেয্য, কিংনু খো সো, মহারাজ, পদীপো পদীপম্হা সঙ্কন্তো’’তি? ‘‘ন হি, ভন্তে’’তি. ‘‘এৰমেৰ খো, মহারাজ, ন চ সঙ্কমতি পটিসন্দহতি চা’’তি.

‘‘ভিয্যো ওপম্মং করোহী’’তি. ‘‘অভিজানাসি নু, ত্ৰং মহারাজ, দহরকো সন্তো সিলোকাচরিযস্স সন্তিকে কিঞ্চি সিলোকং গহিত’’ন্তি? ‘‘আম, ভন্তে’’তি. ‘‘কিংনু খো, মহারাজ, সো সিলোকো আচরিযম্হা সঙ্কন্তো’’তি? ‘‘ন হি, ভন্তে’’তি. ‘‘এৰমেৰ খো, মহারাজ, ন চ সঙ্কমতি পটিসন্দহতি চাতি.

‘‘কল্লোসি, ভন্তে নাগসেনা’’তি.

অসঙ্কমনপটিসন্দহনপঞ্হো পঞ্চমো.

৬. ৰেদগূপঞ্হো

৬. রাজা আহ ‘‘ভন্তে নাগসেন, ৰেদগূ উপলব্ভতী’’তি? থেরো আহ ‘‘পরমত্থেন খো, মহারাজ, ৰেদগূ নুপলব্ভতী’’তি.

‘‘কল্লোসি, ভন্তে নাগসেনা’’তি.

ৰেদগূপঞ্হো ছট্ঠো.

৭. অঞ্ঞকাযসঙ্কমনপঞ্হো

৭. রাজা আহ ‘‘ভন্তে নাগসেন, অত্থি কোচি সত্তো যো ইমম্হা কাযা অঞ্ঞং কাযং সঙ্কমতী’’তি? ‘‘ন হি, মহারাজা’’তি. ‘‘যদি, ভন্তে নাগসেন, ইমম্হা কাযা অঞ্ঞং কাযং সঙ্কমন্তো নত্থি, ননু মুত্তো ভৰিস্সতি পাপকেহি কম্মেহী’’তি? ‘‘আম, মহারাজ, যদি ন পটিসন্দহেয্য, মুত্তো ভৰিস্সতি পাপকেহি কম্মেহীতি, যস্মা চ খো, মহারাজ, পটিসন্দহতি, তস্মা ন পরিমুত্তো পাপকেহি কম্মেহী’’তি.

‘‘ওপম্মং করোহী’’তি. ‘‘যথা, মহারাজ, কোচিদেৰ পুরিসো অঞ্ঞতরস্স পুরিসস্স অম্বং অৰহরেয্য, কিং সো দণ্ডপ্পত্তো ভৰেয্যা’’তি? ‘‘আম, ভন্তে, দণ্ডপ্পত্তো ভৰেয্যা’’তি. ‘‘ন খো সো, মহারাজ, তানি অম্বানি অৰহরি, যানি তেন রোপিতানি, কস্মা দণ্ডপ্পত্তো ভৰেয্যা’’তি? ‘‘তানি, ভন্তে, অম্বানি নিস্সায জাতানি, তস্মা দণ্ডপ্পত্তো ভৰেয্যা’’তি. ‘‘এৰমেৰ খো, মহারাজ, ইমিনা নামরূপেন কম্মং করোতি সোভনং ৰা অসোভনং ৰা, তেন কম্মেন অঞ্ঞং নামরূপং পটিসন্দহতি, তস্মা ন পরিমুত্তো পাপকেহি কম্মেহী’’তি.

‘‘কল্লোসি, ভন্তে নাগসেনা’’তি.

অঞ্ঞকাযসঙ্কমনপঞ্হো সত্তমো.

৮. কম্মফলঅত্থিভাৰপঞ্হো

৮. রাজা আহ ‘‘ভন্তে নাগসেন, ইমিনা নামরূপেন কম্মং কতং কুসলং ৰা অকুসলং ৰা, কুহিং তানি কম্মানি তিট্ঠন্তী’’তি? ‘‘অনুবন্ধেয্যুং খো, মহারাজ, তানি কম্মানি ছাযাৰ অনপাযিনী’’তি [অনুপাযিনীতি (ক.)]. ‘‘সক্কা পন, ভন্তে, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি? ‘‘ন সক্কা, মহারাজ, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি.

‘‘ওপম্মং করোহী’’তি. ‘‘তং কিং মঞ্ঞসি, মহারাজ, যানিমানি রুক্খানি অনিব্বত্তফলানি, সক্কা তেসং ফলানি দস্সেতুং ‘ইধ ৰা ইধ ৰা তানি ফলানি তিট্ঠন্তী’’’তি. ‘‘ন হি, ভন্তে’’তি. ‘‘এৰমেৰ খো, মহারাজ, অব্বোচ্ছিন্নায সন্ততিযা ন সক্কা তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’তি.

‘‘কল্লোসি, ভন্তে নাগসেনা’’তি.

কম্মফলঅত্থিভাৰপঞ্হো অট্ঠমো.

৯. উপ্পজ্জতিজাননপঞ্হো

৯. রাজা আহ ‘‘ভন্তে নাগসেন, যো উপ্পজ্জতি, জানাতি সো ‘উপ্পজ্জিস্সামী’’’তি? ‘‘আম, মহারাজ, যো উপ্পজ্জতি জানাতি সো ‘উপ্পজ্জিস্সামী’’’তি. ‘‘ওপম্মং করোহী’’তি. ‘‘যথা, মহারাজ, কস্সকো গহপতিকো বীজানি পথৰিযং নিক্খিপিত্ৰা সম্মা দেৰে ৰস্সন্তে জানাতি ‘ধঞ্ঞং নিব্বত্তিস্সতী’’’তি? ‘‘আম, ভন্তে, জানেয্যা’’তি. ‘‘এৰমেৰ খো, মহারাজ, যো উপ্পজ্জতি, জানাতি সো ‘উপ্পজ্জিস্সামী’’’তি.

‘‘কল্লোসি, ভন্তে নাগসেনা’’তি.

উপ্পজ্জতিজাননপঞ্হো নৰমো.

১০. বুদ্ধনিদস্সনপঞ্হো

১০. রাজা আহ ‘‘ভন্তে নাগসেন, বুদ্ধো অত্থী’’তি? ‘‘আম, মহারাজ, ভগৰা অত্থী’’তি. ‘‘সক্কা পন, ভন্তে নাগসেন, বুদ্ধো নিদস্সেতুং ইধৰা ইধৰা’’তি? ‘‘পরিনিব্বুতো, মহারাজ, ভগৰা অনুপাদিসেসায নিব্বানধাতুযা, ন সক্কা ভগৰা নিদস্সেতুং ‘ইধ ৰা ইধ ৰা’’’তি.

‘‘ওপম্মং করোহী’’তি. ‘‘তং কিং মঞ্ঞসি, মহারাজ, মহতো অগ্গিক্খন্ধস্স জলমানস্স যা অচ্চি অত্থঙ্গতা, সক্কা সা অচ্চি দস্সেতুং ‘ইধ ৰা ইধ ৰা’’’তি? ‘‘ন হি, ভন্তে, নিরুদ্ধা সা অচ্চি অপ্পঞ্ঞত্তিং গতা’’তি. ‘‘এৰমেৰ খো, মহারাজ, ভগৰা অনুপাদিসেসায নিব্বানধাতুযা পরিনিব্বুতো অত্থঙ্গতো, ন সক্কা ভগৰা নিদস্সেতুং ‘ইধ ৰা ইধ ৰা’ তি, ধম্মকাযেন পন খো, মহারাজ, সক্কা ভগৰা নিদস্সেতুং. ধম্মো হি, মহারাজ, ভগৰতা দেসিতো’’তি.

‘‘কল্লোসি, ভন্তে নাগসেনা’’তি.

বুদ্ধনিদস্সনপঞ্হো দসমো.

বুদ্ধৰগ্গো পঞ্চমো.

ইমস্মিং ৰগ্গে দস পঞ্হা.