১. বুদ্ধস্স অত্থিনত্থিভাৰপঞ্হো

১. রাজা আহ ‘‘ভন্তে নাগসেন, বুদ্ধো তযা দিট্ঠো’’তি? ‘‘ন হি, মহারাজা’’তি. ‘‘অথ তে আচরিযেহি বুদ্ধো দিট্ঠো’’তি? ‘‘ন হি, মহারাজা’’তি. ‘‘তেন হি, ভন্তে নাগসেন, নত্থি বুদ্ধো’’তি. ‘‘কিং পন, মহারাজ, হিমৰতি ঊহা নদী তযা দিট্ঠা’’তি? ‘‘ন হি, ভন্তে’’তি. ‘‘অথ তে পিতরা ঊহা নদী দিট্ঠা’’তি? ‘‘ন হি, ভন্তে’’তি. ‘‘তেন হি, মহারাজ, নত্থি ঊহা নদী’’তি. ‘‘অত্থি, ভন্তে, কিঞ্চাপি মযা ঊহা নদী ন দিট্ঠা, পিতরাপি মে ঊহা নদী ন দিট্ঠা, অপি চ অত্থি ঊহা নদী’’তি. ‘‘এৰমেৰ খো, মহারাজ, কিঞ্চাপি মযা ভগৰা ন দিট্ঠো, আচরিযেহিপি মে ভগৰা ন দিট্ঠো, অপি চ অত্থি ভগৰা’’তি.

‘‘কল্লোসি, ভন্তে নাগসেনা’’তি.

বুদ্ধস্স অত্থিনত্থিভাৰপঞ্হো পঠমো.