১. ফস্সাদিৰিনিব্ভুজনপঞ্হো

১. রাজা আহ ‘‘ভন্তে নাগসেন, সক্কা ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’তি’’? ‘‘ন সক্কা, মহারাজ, ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’’’তি.

‘‘ওপম্মং করোহী’’তি. ‘‘যথা, মহারাজ, রঞ্ঞো সূদো অরসং ৰা রসং ৰা [যূসং ৰা রসং ৰা (সী. স্যা. পী.)] করেয্য, সো তত্থ দধিম্পি পক্খিপেয্য, লোণম্পি পক্খিপেয্য, সিঙ্গিৰেরম্পি পক্খিপেয্য, জীরকম্পি পক্খিপেয্য, মরিচম্পি পক্খিপেয্য, অঞ্ঞানিপি পকারানি পক্খিপেয্য, তমেনং রাজা এৰং ৰদেয্য, ‘দধিস্স মে রসং আহর, লোণস্স মে রসং আহর, সিঙ্গিৰেরস্স মে রসং আহর, জীরকস্স মে রসং আহর, মরিচস্স মে রসং আহর, সব্বেসং মে পক্খিত্তানং রসং আহরা’তি. সক্কা নু খো, মহারাজ, তেসং রসানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা রসং আহরিতুং অম্বিলত্তং ৰা লৰণত্তং ৰা তিত্তকত্তং ৰা কটুকত্তং ৰা কসাযত্তং ৰা মধুরত্তং ৰা’’তি? ‘‘ন হি, ভন্তে, সক্কা তেসং রসানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা রসং আহরিতুং অম্বিলত্তং ৰা লৰণত্তং ৰা তিত্তকত্তং ৰা কটুকত্তং ৰা কসাযত্তং ৰা মধুরত্তং ৰা, অপি চ খো পন সকেন সকেন লক্খণেন উপট্ঠহন্তী’’তি. ‘‘এৰমেৰ খো, মহারাজ, ন সক্কা ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’তি, অপি চ খো পন সকেন সকেন লক্খণেন উপট্ঠহন্তী’’তি.

‘‘কল্লোসি, ভন্তে নাগসেনা’’তি.

ফস্সাদিৰিনিব্ভুজনপঞ্হো পঠমো.